French Open 2021: ನಡಾಲ್​ಗೆ ಶಾಕ್​ ಕೊಟ್ಟ ಜೋಕೊವಿಕ್​ ಫೈನಲ್​ಗೆ ಎಂಟ್ರಿ!

ಸರ್ಬಿಯಾದ ಟೆನ್ನಿಸ್​ ಆಟಗಾರ ನೊವಾಕ್​ ಜೋಕೊವಿಕ್ ಫ್ರೆಂಚ್​ ಓಪನ್​ ಟೆನ್ನಿಸ್ ಟೂರ್ನಿಯ ಫೈನಲ್​ ತಲುಪಿದ್ದು, ಪ್ರಶಸ್ತಿಗಾಗಿ ಗ್ರೀಕ್​ನ ಸ್ಟೆಫನೊಸ್ ಸಿಟ್ಸಿಪಾಸ್ ಅವರನ್ನು ಎದುರಿಸಲಿದ್ದಾರೆ.

ಪ್ಯಾರೀಸ್​:ವಿಶ್ವದ ನಂ.1 ಆಟಗಾರ ನೊವಾಕ್​ ಜೋಕೊವಿಕ್ ಫ್ರೆಂಚ್​ ಓಪನ್​ ಟೆನ್ನಿಸ್​ ಟೂರ್ನಿಯ ಫೈನಲ್​ ಪ್ರವೇಶಿಸಿದ್ದಾರೆ. ಸೆಮಿಫೈನಲ್​ನಲ್ಲಿ ಹಾಲಿ ಹಾಗೂ 13 ಬಾರಿಯ ಚಾಂಪಿಯನ್ ರಾಫೆಲ್​ ನಡಾಲ್​ ಅವರನ್ನು ಜೋಕೊವಿಕ್ 3-6, 6-3, 7-6, 6-2 ಸೆಟ್​​ಗಳಿಂದ ಮಣಿಸಿದರು.

ಮೊದಲ ಸೆಟ್​ನಲ್ಲಿ ಸೋತರೂ ಕೂಡ ಬಳಿಕ ಮೂರೂ ಸೆಟ್​ಗಳಲ್ಲಿ ಪ್ರಾಬಲ್ಯ ತೋರಿದ ಜೋಕೊವಿಕ್​ ಮಣ್ಣಿನ ಅಂಕಣದ ದೊರೆ ನಡಾಲ್​ಗೆ ಸೋಲುಣಿಸಿದರು. ಎರಡನೇ ಸೆಟ್​ನಲ್ಲಿ 6-3ರಿಂದ ತಿರುಗೇಟು ನೀಡಿದ ಜೋಕೊವಿಕ್​ 3ನೇ ಸೆಟ್​ನಲ್ಲಿ ಭಾರೀ ಪೈಪೋಟಿ ನಡೆಸಿ ಗೆಲ್ಲುವಲ್ಲಿ ಯಶಸ್ವಿಯಾದರು. 6-6ರಿಂದ ಸಮಬಲವಾಗಿದ್ದ 3ನೇ ಸೆಟ್​​, ಕೊನೆಯಲ್ಲಿ 7-6ರಿಂದ ನೊವಾಕ್​ ಪಾಲಾಯಿತು. ಬಳಿಕ 4ನೇ ಸೆಟ್​ನಲ್ಲಿ ಗೆಲ್ಲಲೇಬೇಕಾದ ಅನಿವಾರ್ಯತೆ ಹಿನ್ನೆಲೆ ರಾಫಾ ಆರಂಭಿಕ ಅಂಕಗಳ ಮುನ್ನಡೆ ಪಡೆದರೂ ರೋಚಕ ಆಟ ಪ್ರದರ್ಶಿಸಿದ ಜೋಕೊವಿಕ್​ 6-2ರಿಂದ ಗೆದ್ದು, ಸತತ ಮೂರು ಸೆಟ್​ಗಳ ಜಯದೊಂದಿಗೆ ಫೈನಲ್​ಗೆ ಲಗ್ಗೆ ಇಟ್ಟರು.

ಈ ಸೋಲಿನೊಂದಿಗೆ 21ನೇ ಬಾರಿಗೆ ಗ್ರಾಂಡ್​ಸ್ಲಾಂ ಗೆದ್ದು ಇತಿಹಾಸ ಬರೆಯುವ ನಡಾಲ್​ ಕನಸು ನನಸಾಗಲಿಲ್ಲ. ಫೈನಲ್​ನಲ್ಲಿ ಜೋಕೊವಿಕ್ 22 ವರ್ಷದ ಗ್ರೀಕ್​ನ​ ಸ್ಟೆಫನೊಸ್ ಸಿಟ್ಸಿಪಾಸ್ ವಿರುದ್ಧ 19ನೇ ವೃತ್ತಿಪರ ಗ್ರಾಂಡ್​ಸ್ಲಾಂಗಾಗಿ ಸೆಣೆಸಾಡಲಿದ್ದಾರೆ. ಇಲ್ಲಿ ಗೆಲುವು ಕಂಡರೆ 2016ರ ಬಳಿಕ ಫ್ರೆಂಚ್​ ಓಪನ್​ಗೆ ನೊವಾಕ್​ ಮುತ್ತಿಕ್ಕಲಿದ್ದಾರೆ. ಅಲ್ಲದೆ ರಾಡ್​ ಲಾವರ್​ ಹಾಗೂ ರಾಯ್​ ಎಮರ್ಸನ್​ ಬಳಿಕ ಎಲ್ಲಾ 4 ಗ್ರಾಂಡ್​ಸ್ಲಾಂ ಪ್ರಶಸ್ತಿಗಳನ್ನು ಎರಡೆರಡು ಬಾರಿ ಜಯಿಸಿದ ಆಟಗಾರ ಎಂಬ ಹೆಗ್ಗಳಿಗೆ ನೊವಾಕ್​ ಪಾಲಾಗಲಿದೆ.

ಗ್ರೀಕ್​ನ ಸ್ಟೆಫನೊಸ್ ಸಿಟ್ಸಿಪಾಸ್ ಜರ್ಮನಿಯ ಅಲೆಕ್ಸಾಂಡರ್ ಜ್ವೆರೆವ್​ರನ್ನು 6-4, 6-4, 3-6, 3-6, 6-3ರ ಸೆಟ್​ಗಳ ಅಂತರಲ್ಲಿ ಮಣಿಸಿ ಫೈನಲ್​ಗೇರಿದ್ದಾರೆ. ಜೋಕೊವಿಕ್ ಹಾಗೂ ಸ್ಟೆಫನೊಸ್ ಈ ಹಿಂದೆ 5 ಬಾರಿ ಪರಸ್ಪರ ಎದುರಾಗಿದ್ದು, ನೊವಾಕ್​ 5-2ರ ಗೆಲುವಿನ ಸರಾಸರಿ ಹೊಂದಿದ್ದಾರೆ. ಫೈನಲ್​ ಪಂದ್ಯವು ನಾಳೆ (ಭಾನುವಾರ) ನಡೆಯಲಿದೆ.