ದುಬೈ: ಐಸಿಸಿ ಟಿ-20 ವಿಶ್ವಕಪ್ನ ಸೂಪರ್-12 ಹಂತದ ಗ್ರೂಪ್ 1ರಲ್ಲಿ ಶ್ರೀಲಂಕಾ ವಿರುದ್ಧ 7 ವಿಕೆಟ್ಗಳ ಜಯ ದಾಖಲು ಮಾಡಿರುವ ಆಸ್ಟ್ರೇಲಿಯಾ ಸತತ ಎರಡನೇ ಜಯ ದಾಖಲು ಮಾಡಿದೆ.
ಆಸ್ಟ್ರೇಲಿಯಾ ಆರಂಭಿಕರ ಜೊತೆಯಾಟ ದುಬೈನ ಅಂತಾರಾಷ್ಟ್ರೀಯ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ಜಂಪಾ, ಸ್ಟಾರ್ಕ್ ಬೌಲಿಂಗ್ ದಾಳಿಗೆ ತತ್ತರಿಸಿ 20 ಓವರ್ಗಳಲ್ಲಿ 6ವಿಕೆಟ್ನಷ್ಟಕ್ಕೆ 154ರನ್ಗಳಿಸಿತು. ತಂಡದ ಪರ ಆರಂಭಿಕರಾಗಿ ಕಣಕ್ಕಿಳಿದ ನಿಶಾಕ್ ಕೇವಲ 7ರನ್ಗಳಿಸಿ ವಿಕೆಟ್ ಒಪ್ಪಿಸಿದರು.
ಇದಾದ ಬಳಿಕ ಒಂದಾದ ಪೆರೆರಾ ಹಾಗೂ ಅಸಲಂಕ ಎದುರಾಳಿ ತಂಡದ ಬೌಲರ್ಗಳನ್ನ ಸ್ವಲ್ಪ ಹೊತ್ತು ಕಾಡಿದರು. ಈ ಜೋಡಿ ತಂಡಕ್ಕೆ 63ರನ್ಗಳ ಜೊತೆಯಾಟ ನೀಡಿತು. ವಿಕೆಟ್ ಕೀಪರ್ ಪೆರೆರಾ 35ರನ್ಗಳಿಕೆ ಮಾಡಿದ್ದ ವೇಳೆ ಸ್ಟಾರ್ಕ್ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದ್ರೆ, ಇದರ ಬೆನ್ನಲ್ಲೇ ಅಸಲಂಕಾ(35) ಕೂಡ ಜಂಪಾ ಓವರ್ನಲ್ಲಿ ಔಟಾದರು. ನಂತರ ಬಂದ ಫರ್ನಾಡೋ 4ರನ್ಗಳಿಕೆ ಮಾಡಿ ಜಂಪಾ ಓವರ್ನಲ್ಲೇ ಬಲಿಯಾದರು.
ಮಧ್ಯಮ ಕ್ರಮಾಂಕದಲ್ಲಿ ಮಿಂಚಿದ ರಾಜಪಕ್ಸೆ ಅಜೇಯ 33ರನ್ಗಳಿಕೆ ಮಾಡಿ ತಂಡಕ್ಕೆ ಆಸರೆಯಾದರು. ಇವರಿಗೆ ಸಾಥ್ ನೀಡಿದ ಹಸರಂಗ 4ರನ್, ಶನಕ 12 ಹಾಗೂ ಕರುಣರತ್ನೆ ಅಜೇಯ 9ರನ್ಗಳಿಸಿದರು. ಈ ಮೂಲಕ ತಂಡ ಕೊನೆಯದಾಗಿ 20 ಓವರ್ಗಳಲ್ಲಿ 6 ವಿಕೆಟ್ನಷ್ಟಕ್ಕೆ 154ರನ್ಗಳಿಕೆ ಮಾಡಿತು. ಆಸ್ಟ್ರೇಲಿಯಾ ಪರ ಉತ್ತಮ ಬೌಲಿಂಗ್ ಪ್ರದರ್ಶನ ನೀಡಿದ ಸ್ಟಾರ್ಕ್, ಕಮಿನ್ಸ್ ಹಾಗೂ ಜಂಪಾ ತಲಾ 2 ವಿಕೆಟ್ ಪಡೆದುಕೊಂಡರು.
155ರನ್ಗಳ ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ ಉತ್ತಮ ಆರಂಭ ಪಡೆದುಕೊಂಡಿತು. ಕಳಪೆ ಬ್ಯಾಟಿಂಗ್ ಪ್ರದರ್ಶನಕ್ಕೊಳಗಾಗಿದ್ದ ವಾರ್ನರ್ ಹಾಗೂ ಫಿಂಚ್ ಜೋಡಿ ಇಂದಿನ ಪಂದ್ಯದಲ್ಲಿ ಉತ್ತಮ ಜೊತೆಯಾಟವಾಡಿತು. ಮೊದಲ ವಿಕೆಟ್ನಷ್ಟಕ್ಕೆ 70ರನ್ಗಳ ಆಟವಾಡಿದ ಈ ಜೋಡಿ ಎದುರಾಳಿ ಬೌಲರ್ಗಳ ವಿರುದ್ಧ ಜವಾಬ್ದಾರಿಯುತ ಆಟವಾಡಿದರು. ಕೇವಲ 23 ಎಸೆತಗಳಲ್ಲಿ 2 ಸಿಕ್ಸರ್, 5ಬೌಂಡರಿ ಸೇರಿ 37ರನ್ಗಳಿಕೆ ಮಾಡಿದ್ದ ಫಿಂಚ್ ಹಸರಂಗ್ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ಬಂದ ಮ್ಯಾಕ್ಸ್ವೆಲ್ 5ರನ್ಗಳಿಸಿ ಔಟಾದರು.
ಆರ್ಭಟಿಸಿದ ವಾರ್ನರ್
ಸತತ ಬ್ಯಾಟಿಂಗ್ ವೈಫಲ್ಯದಿಂದ ನಿರಾಸೆಗೊಳಗಾಗಿದ್ದ ಡೇವಿಡ್ ವಾರ್ನರ್ ಇಂದು ಅಬ್ಬರಿಸಿದರು. ತಾವು ಎದುರಿಸಿದ 42 ಎಸೆತಗಳಲ್ಲಿ 10 ಬೌಂಡರಿ ಸೇರಿದಂತೆ 65ರನ್ಗಳಿಸಿ, ವಿಕೆಟ್ ಒಪ್ಪಿಸಿದ್ರು. ಇದಾದ ಬಳಿಕ ಒಂದಾದ ಸ್ಮಿತ್ ಅಜೇಯ 28 ಹಾಗೂ ಸ್ಟೋನಿಸ್ ಅಜೇಯ 16ರನ್ಗಳಿಸಿ ತಂಡಕ್ಕೆ ಗೆಲುವು ತಂದಿಟ್ಟರು. ಕೊನೆಯದಾಗಿ ತಂಡ 17 ಓವರ್ಗಳಲ್ಲಿ 3 ವಿಕೆಟ್ನಷ್ಟಕ್ಕೆ 155ರನ್ಗಳಿಸಿ, ಗೆಲುವು ದಾಖಲು ಮಾಡಿತು. ಈಗಾಗಲೇ ವೆಸ್ಟ್ ಇಂಡೀಸ್ ವಿರುದ್ಧ ಜಯ ಸಾಧಿಸಿರುವ ಕಾಂಗರೂ ಪಡೆ, ಇಂದಿನ ಪಂದ್ಯದಲ್ಲಿ ಜಯ ಸಾಧಿಸಿ,ಗ್ರೂಪ್ 1ರಲ್ಲಿ 2ನೇ ಸ್ಥಾನದಲ್ಲಿದೆ.
ಬೌಲಿಂಗ್ನಲ್ಲಿ ಮಿಂಚಿದ ಜಂಪಾ ಆಸ್ಟ್ರೇಲಿಯಾ ಪರ ಉತ್ತಮ ಬೌಲಿಂಗ್ ಪ್ರದರ್ಶನ(4 ಓವರ್, 12ರನ್ ನೀಡಿ 2 ವಿಕೆಟ್) ನೀಡಿದ ಆ್ಯಂಡಂ ಜಂಪಾ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಪಾತ್ರರಾದರು.
