ಕ್ರೀಡಾ ಬದುಕಿಗೆ ನಿವೃತ್ತಿ ಘೋಷಿಸಿದ ಮಿಂಚಿನ ವೇಗದ ಓಟಗಾರ ಜಸ್ಟಿನ್ ಗ್ಯಾಟ್ಲಿನ್

ಡೋಪಿಂಗ್​ ವಿವಾದದಿಂದ ಬೇಸತ್ತ ವಿಶ್ವವಿಖ್ಯಾತ ಅಮೆರಿಕದ ಕ್ರೀಡಾಪಟು ಜಸ್ಟಿನ್ ಗ್ಯಾಟ್ಲಿನ್ ಇದೀಗ ಕ್ರೀಡಾ ಬದುಕಿಗೆ ನಿವೃತ್ತಿ ಘೋಷಿಸಿದ್ದಾರೆ.

ವಾಷಿಂಗ್ಟನ್​:ಡೋಪಿಂಗ್ ವಿವಾದಗಳಿಂದ ಬೇಸತ್ತಿದ್ದ ಶರವೇಗದ ಓಟಗಾರ ಜಸ್ಟಿನ್ ಗ್ಯಾಟ್ಲಿನ್ ತಮ್ಮ ಕ್ರೀಡಾ ಬದುಕಿಗೆ ವಿದಾಯ ಹೇಳಿದ್ದಾರೆ.

2004ರ ಅಥೆನ್ಸ್ ಒಲಿಂಪಿಕ್ಸ್‌ ಕ್ರೀಡಾಕೂಟದ 100 ಮೀಟರ್ ಓಟದ ಸ್ಪರ್ಧೆಯಲ್ಲಿ ಚಿನ್ನ ಗೆದ್ದಿದ್ದ 40 ವರ್ಷದ ಓಟಗಾರ ಇನ್ಸ್ಟಾಗ್ರಾಮ್​ನಲ್ಲಿ ‘ಡಿಯರ್ ಟ್ರ್ಯಾಕ್’ ಎಂದು ಪೋಸ್ಟ್​ ಮಾಡುವ ಮೂಲಕ ನಿವೃತ್ತಿ ವಿಚಾರ ತಿಳಿಸಿದ್ದಾರೆ.

'ಡಿಯರ್‌ ಟ್ರ್ಯಾಕ್​ ನಾನು ನಿನ್ನನ್ನು ತುಂಬಾ ಪ್ರೀತಿಸುತ್ತಿದ್ದೇನೆ. ನೀನು ನನಗೆ ದುಃಖ ಮತ್ತು ಸಂತೋಷದ ಕಣ್ಣೀರನ್ನು ನೀಡಿದ್ದಿಯಾ. ಇಲ್ಲಿ ಕಲಿತ ಪಾಠಗಳನ್ನು ಎಂದಿಗೂ ಮರೆಯಲಾರೆ' ಎಂದು ಅವರು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ:ದೇಶದಲ್ಲಿ ಕೋವಿಡ್‌ ಇಳಿಕೆ: 58 ಸಾವಿರ ಹೊಸ ಸೋಂಕಿತರು ಪತ್ತೆ, 657 ಮಂದಿ ಸಾವು

ಗ್ಯಾಟ್ಲಿನ್ ಅವರು ತಮ್ಮ ಕ್ರೀಡಾ ಬದುಕಿನಲ್ಲಿ ಸ್ಮರಣೀಯ ಸಾಧನೆಗಳನ್ನು ಮಾಡಿದ್ದಾರೆ. ಈ ಪೈಕಿ, ಜಮೈಕಾದ ಕ್ರೀಡಾ ದಂತಕಥೆ ಉಸೈನ್ ಬೋಲ್ಟ್ ವಿರುದ್ಧ ದಾಖಲಿಸಿದ ಅಪರೂಪದ ಜಯ ಅವರ ಬದುಕಿನ ಮೈಲುಗಲ್ಲಾಗಿತ್ತು.

2019ರಲ್ಲಿ ದೋಹಾ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಅಮೆರಿಕ ಪರವಾಗಿ ಕಣಕ್ಕಿಳಿದಿದ್ದ ಗ್ಯಾಟ್ಲಿನ್ 4x100ಮೀ ರಿಲೇಯಲ್ಲಿ ಚಿನ್ನದ ಪದಕ ಗೆದ್ದಿದ್ದರು.