ಹಾಕಿ ವಿಶ್ವಕಪ್​: ಹೆಚ್ಚು ಗೋಲ್​ ಗಳಿಸಿದ ದೇಶ ಯಾವುದು?, ಭಾರತದ ಹಾದಿ ಏನು..

ಕ್ರಾಸ್​ ಓವರ್​ನಲ್ಲಿ ಕ್ವಾರ್ಟರ್​ ಫೈನಲ್​ ಪ್ರವೇಶ ಪಡೆಯ ಬೇಕಿರುವ ಭಾರತದ ಹಾದಿ ಈ ರೀತಿ ಇದೆ.

ಭುವನೇಶ್ವರ(ಒಡಿಶಾ): ಹಾಕಿ ವಿಶ್ವಕಪ್‌ನಲ್ಲಿ ಇಂದು ಪೂಲ್ ಎ ಮತ್ತು ಪೂಲ್ ಬಿ ತಂಡಗಳ ನಡುವೆ ಪಂದ್ಯಗಳು ನಡೆಯುತ್ತಿವೆ. ಎ ಗುಂಪಿನ ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾ ಮತ್ತು ಫ್ರಾನ್ಸ್ ಮತ್ತು ಅರ್ಜೆಂಟೀನಾ ಸೆಣಸಿದೆ. ಇದರಲ್ಲಿ ಆಸ್ಟ್ರೇಲಿಯಾ 9-2 ಗೋಲ್​ನಿಂದ ದಕ್ಷಿಣ ಆಫ್ರಿಕಾವನ್ನು ಸೋಲಿಸಿದೆ. ಫ್ರಾನ್ಸ್ ಮತ್ತು ಅರ್ಜೆಂಟೀನಾ ಪಂದ್ಯ 5-5ರಿಂದ ಡ್ರಾದಲ್ಲಿ ಅಂತ್ಯವಾಗಿದೆ. ಏ ಗುಂಪಿನ ಎಲ್ಲ ಪಂದ್ಯಗಳು ಮುಗಿದಿದ್ದು, ಆಸ್ಟ್ರೇಲಿಯಾ ಮೂರರಲ್ಲಿ ಎರಡು ಪಂದ್ಯಗೆದ್ದು ಅಂಕ ಪಟ್ಟಿಯ ಮೊದಲ ಸ್ಥಾನದಲ್ಲಿದೆ.

ಬಿ ಗುಂಪಿನ ಬೆಲ್ಜಿಯಂ ಮತ್ತು ಜಪಾನ್​ ನಡುವಣ ಪಂದ್ಯ 5: 30ಕ್ಕೆ ಆರಂಭವಾಗಿದ್ದು ಮೊದಲ ಕ್ವಾರ್ಟರ್​ ಪಂದ್ಯ ನಡೆಯುತ್ತಿದೆ. ಸಂಜೆ 7ಕ್ಕೆ ಕೊರಿಯಾ ಮತ್ತು ಜರ್ಮನಿ ನಡುವೆ ಪಂದ್ಯಗಳು ನಡೆಯಲಿದೆ. ಬಿ ಗುಂಪಿನ ಅಂಕ ಪಟ್ಟಿಯಲ್ಲಿ ಬೆಲ್ಜಿಯಂ, ಜರ್ಮನಿ ಮತ್ತು ಕೊರಿಯಾ ತಲಾ ಒಂದು ಪಂದ್ಯಗಳನ್ನು ಗೆದ್ದಿದೆ. ಇಂದಿನ ಪಂದ್ಯ ಸೆಮಿಸ್​ಗೆ ಯಾರು ನೇರ ಪ್ರವೇಶ ಪಡೆಯುತ್ತಾರೆ ಎಂಬುದು ನಿರ್ಣಯ ಆಗಲಿದೆ.

ಅತೀ ಹೆಚ್ಚು ಗೋಲ್​ ಗಳಸಿದ ದೇಶ ಯಾವುದು?:ಇಲ್ಲಿಯವರೆಗೆ ವಿಶ್ವಕಪ್‌ನಲ್ಲಿ ನೆದರ್ಲೆಂಡ್ಸ್ ತಂಡವು 92 ಗೋಲುಗಳನ್ನು ಹೊಡೆದಿದೆ. 2023ರ ಹಾಕಿ ವಿಶ್ವಕಪ್ ಆವೃತ್ತಿಯಲ್ಲಿ 22 ಗೋಲುಗಳನ್ನು ಗಳಿಸಿದೆ. ಈ ಮೂಲಕ ಅತೀ ಹೆಚ್ಚು ಗೋಲ್​ಗಳಿಸಿದ ದೇಶ ಎಂಬ ದಾಖಲೆ ನಿರ್ಮಿಸಿದೆ. ನೆದರ್ಲೆಂಡ್ಸ್ ಗರಿಷ್ಠ ಏಳು ಪೆನಾಲ್ಟಿ ಕಾರ್ನರ್‌ಗಳನ್ನು ಗೋಲುಗಳಾಗಿ ಪರಿವರ್ತಿಸಿದೆ. ವಿಶ್ವಕಪ್‌ನಲ್ಲಿ ಇದುವರೆಗೆ 57 ಫೀಲ್ಡ್ ಗೋಲುಗಳು ದಾಖಲಾಗಿದ್ದರೆ 32 ಪೆನಾಲ್ಟಿ ಕಾರ್ನರ್ ಗೋಲುಗಳು ದಾಖಲಾಗಿವೆ. ಮೂರು ಪೆನಾಲ್ಟಿ ಸ್ಟ್ರೋಕ್‌ಗಳನ್ನು ಸ್ಕೋರ್ ಮಾಡಲಾಗಿದೆ. ಆಟಗಾರರಿಗೆ 37 ಗ್ರೀನ್ ಕಾರ್ಡ್ ಮತ್ತು 14 ಹಳದಿ ಕಾರ್ಡ್​ಗಳನ್ನು ತೋರಿಸಲಾಗಿದೆ.

ಹೆಚ್ಚು ಗೋಲ್​ ಗಳಿಸಿದ ಆಟಗಾರ:ನೆದರ್ಲೆಂಡ್ಸ್‌ನ ಆಟಗಾರರಾದ ಬ್ರಿಂಕ್‌ಮನ್ ಥಿಯೆರಿ ಮತ್ತು ಜಾನ್ಸೀನ್ ಜಿಪ್ ತಲಾ 5-5 ಗೋಲುಗಳೊಂದಿಗೆ ಮೊದಲ ಮತ್ತು ಎರಡನೇ ಸ್ಥಾನದಲ್ಲಿದ್ದಾರೆ. 27 ವರ್ಷದ ಬ್ರಿಂಕ್‌ಮನ್ 2023ರ ವಿಶ್ವಕಪ್‌ನಲ್ಲಿ ಮೂರು ಪಂದ್ಯಗಳನ್ನು ಆಡಿದ್ದಾರೆ. ಬ್ರಿಂಕ್‌ಮನ್ ಇಲ್ಲಿಯವರೆಗೆ 143 ಪಂದ್ಯಗಳನ್ನು ಆಡಿದ್ದು, ಅದರಲ್ಲಿ ಅವರು 62 ಗೋಲುಗಳನ್ನು ಗಳಿಸಿದ್ದಾರೆ.

ಕಪ್​ ಗೆಲ್ಲುವ ನೆಚ್ಚಿನ ತಂಡ ಯಾವುದು?:2023ರ ಹಾಕಿ ವಿಶ್ವಕಪ್​ನ ಮೂರು ಗುಂಪು ಪಂದ್ಯಗಳಲ್ಲಿ ನೆದರ್ಲೆಂಡ್ಸ್ 3 ಪಂದ್ಯಗಳನ್ನೂ ಗೆದ್ದುಕೊಂಡಿದೆ. ವಿಶ್ವ ರ‍್ಯಾಂಕಿಂಗ್‌ನಲ್ಲಿ ಮೂರನೇ ಸ್ಥಾನದಲ್ಲಿರುವ ನೆದರ್ಲೆಂಡ್ಸ್ ತಂಡ ಒಂಬತ್ತು ಅಂಕಗಳೊಂದಿಗೆ ಸಿ ಪೂಲ್‌ನಲ್ಲಿ ಅಗ್ರಸ್ಥಾನದಲ್ಲಿದೆ. ನೆದರ್ಲೆಂಡ್ಸ್ ತನ್ನ ಮೊದಲ ಪಂದ್ಯದಲ್ಲಿ ಮಲೇಷ್ಯಾವನ್ನು 4-0 ಗೋಲುಗಳಿಂದ ಸೋಲಿಸಿತು. ಎರಡನೇ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್​ನ್ನು 4-0 ಅಂತರದಲ್ಲಿ ಸೋಲಿಸಿತ್ತು. ಮೂರನೇ ಪಂದ್ಯದಲ್ಲಿ ಚಿಲಿಯನ್ನು 14-0 ಅಂತರದಲ್ಲಿ ಸೋಲಿಸಿ ವಿಶ್ವಕಪ್​ನ ದಾಖಲೆಯ ಅಂತರದ ಗೆಲುವನ್ನು ಗಳಿಸಿತ್ತು.

ಗೆದ್ದರೂ ಕ್ವಾರ್ಟರ್​ ಫೈನಲ್​ ಸಂಕಷ್ಟದಲ್ಲಿ ಭಾರತ:ಭಾರತ ವೇಲ್ಸ್​ ವಿರುದ್ಧ ಆಡಿದ ಮೂರನೇ ಪಂದ್ಯದಲ್ಲಿ 8-0ಯಿಂದ ಗೆದ್ದು ಕೊಂಡಿದ್ದರೆ ನೇರ ಕ್ವಾರ್ಟರ್​ ಫೈನಲ್ ಪ್ರವೇಶ ಪಡೆಯುತ್ತಿತ್ತು. ಆದರೆ 5 ಪೆನಾಲ್ಟಿ ಕಾರ್ನರ್​ ಅವಕಾಶವನ್ನು ಗೋಲ್​ ಮಾಡದೇ, ಎರಡು ಗೋಲ್​ ಬಿಟ್ಟುಕೊಟ್ಟು 4-2ರಿಂದ ಗೆಲುವು ದಾಖಲಿಸಿತು. ಈಗ ಕ್ವಾರ್ಟರ್​ ಫೈನಲ್​ ಪ್ರವೇಶಿಸಲು ಕ್ರಾಸ್​ ಓವರ್​ ಪಂದ್ಯ ಆಡಬೇಕಿದೆ. ಜನವರಿ 22 ರಂದು ಸಿ ಗುಂಪಿನ ನ್ಯೂಜಿಲ್ಯಾಂಡ್​ ​ ಜೊತೆಗೆ ಸ್ಪರ್ಧೆ ನಡೆಯಲಿದ್ದು ಗೆದ್ದವರಿಗೆ ಕ್ವಾರ್ಟರ್​ ಫೈನಲ್​ ಬಾಗಿಲು ತೆರೆಯಲಿದೆ.

ಜನವರಿ 22 ರಂದು ನಡೆಯಲಿರುವ ಕ್ರಾಸ್​ ಓವರ್​ ಪಂದ್ಯ ಡಿ ಗುಂಪಿನಲ್ಲಿ 2ನೇ ಸ್ಥಾನದಲ್ಲಿರುವ ಭಾರತ ಮತ್ತು ಸಿ ಗುಂಪಿನಲ್ಲಿ 3ನೇ ಸ್ಥಾನದಲ್ಲಿರುವ ನ್ಯೂಜಿಲ್ಯಾಂಡ್​​ ನಡುವೆ ನಡೆಯಲಿದೆ. ಈ ಪಂದ್ಯದಲ್ಲಿ ಭಾರತ ಗೆಲುವು ಸಾಧಿಸಿದರೆ ಕ್ವಾರ್ಟರ್​ ಫೈನಲ್​ ಪ್ರವೇಶ ಗಳಿಸಿಲಿದೆ. ಅಲ್ಲಿ ಏ ಗುಂಪಿನ ಟಾಪರ್​ ಆಸ್ಟ್ರೇಲಿಯಾದೊಂದಿಗೆ ಸೆಣಸಬೇಕಾಗುತ್ತದೆ. ನ್ಯೂಜಿಲ್ಯಾಂಡ್​ ​ ವಿರುದ್ಧ ಭಾರತದ ಇತಿಹಾಸ ಉತ್ತಮವಾಗಿದ್ದು, ಒಟ್ಟು 104 ಆಡಿದ್ದು ಅದರಲ್ಲಿ 58 ಗೆದ್ದು, 29 ಸೋತು, 17 ಪಂದ್ಯಗಳನ್ನು ಡ್ರಾ ಮಾಡಿಕೊಂಡಿದೆ.

ಇದನ್ನೂ ಓದಿ:ಹಾಕಿ ವಿಶ್ವಕಪ್​: ವೇಲ್ಸ್​ ವಿರುದ್ಧ ಭಾರತಕ್ಕೆ ಜಯ, ಕ್ವಾರ್ಟರ್​ ಫೈನಲ್​ಗಾಗಿ ಕ್ರಾಸ್​ ಓವರ್​ ಪಂದ್ಯ