ನವದೆಹಲಿ: ಗುಜರಾತ್ನ ಭವಿನಾ ಪಟೇಲ್ ಮತ್ತು ಸೋನಲ್ಬೆನ್ ಪಟೇಲ್ ಆಗಸ್ಟ್ 25ರಿಂದ ಆರಂಭವಾಗಲಿರುವ ಟೋಕಿಯೊ ಒಲಿಂಪಿಕ್ಸ್ನಲ್ಲಿ ಟೇಬಲ್ ಟೆನಿಸ್ ಮೂಲಕ ಭಾರತದ ಪರ ಮೊದಲ ಅಭಿಯಾನ ಆರಂಭಿಸಲಿದ್ದಾರೆ.
ಮಹಿಳೆಯರ ಸಿಂಗಲ್ಸ್ನಲ್ಲಿ ಭವಿನಾ ವ್ಹೀಲ್ಚೇರ್ ಕ್ಲಾಸ್ 4ನೇ ಕೆಟಗರಿಯಲ್ಲಿ ಆಡಿದರೆ, ಸೋನಲ್ಬೆನ್ ವ್ಹೀಲ್ಚೇರ್ ಕ್ಲಾಸ್ 3 ಕೆಟಗರಿಯಲ್ಲಿ ಸ್ಪರ್ಧಿಸಲಿದ್ದಾರೆ. ಇನ್ನು, ಡಬಲ್ಸ್ನಲ್ಲಿ ಇವರಿಬ್ಬರು ಒಟ್ಟಾಗಿ ಸ್ಪರ್ಧೆಗಿಳಿಯಲಿದ್ದಾರೆ.
ಆಗಸ್ಟ್ 25, 26 ಮತ್ತು 27ರಂದು ಈ ಇಬ್ಬರು ಪ್ಯಾರಾ ಪೆಡ್ಲರ್ಗಳು ತಮ್ಮ ಆರಂಭದ ದಿನವೇ ಅರ್ಹತಾ ಸುತ್ತುಗಳನ್ನಾಡಲಿದ್ದಾರೆ. ಆಗಸ್ಟ್ 28 ಮತ್ತು 29ರಂದು ಸೆಮಿಫೈನಲ್ ಮತ್ತು ಫೈನಲ್ ನಡೆಯಲಿದೆ.
ಭವಿನಾ ಪ್ರಸ್ತುತ ವಿಶ್ವ ರ್ಯಾಂಕಿಂಗ್ಸ್ನಲ್ಲಿ 8ನೇ ಸ್ಥಾನದಲ್ಲಿದ್ದರೆ, ಸೋನಲ್ಬೆನ್ 19ನೇ ಸ್ಥಾನದಲ್ಲಿದ್ದಾರೆ. ಇವರಿಬ್ಬರು ಈ ಹಿಂದೆ ಏಷ್ಯನ್ ಗೇಮ್ಸ್ನಲ್ಲಿ ಪದಕ ಗೆದ್ದಿದ್ದಾರೆ.
ಟೇಕ್ವಾಂಡೋ
21 ವರ್ಷದ ಅರುಣಾ ತನ್ವರ್ ಟೇಕ್ವಾಂಡೋದಲ್ಲಿ ಸ್ಪರ್ಧಿಸುತ್ತಿರುವ ಏಕೈಕ ಭಾರತೀಯ ಸ್ಪರ್ಧಿಯಾಗಿದ್ದಾರೆ. ಹರಿಯಾಣ ಮೂಲದ ಈ ಅಥ್ಲೀಟ್, ಮಹಿಳೆಯರ 49ಕೆಜಿ ಕೆ44 ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಇವರು ಸೆಪ್ಟೆಂಬರ್ 2 ರಂದು 16ರ ಸುತ್ತಿನಲ್ಲಿ ಕಣಕ್ಕಿಳಿಯಲಿದ್ದಾರೆ.
ಅರುಣಾ ಪ್ರಸ್ತುತ ವಿಶ್ವದ 30ನೇ ಶ್ರೇಯಾಂಕದಲ್ಲಿದ್ದು, ಇವರು 2018ರಲ್ಲಿ ವಿಯೆಟ್ನಾಂನಲ್ಲಿ ನಡೆದಿದ್ದ ಏಷ್ಯನ್ ಪ್ಯಾರಾ ಟೇಕ್ವಾಂಡೊ ಚಾಂಪಿಯನ್ಶಿಪ್ನಲ್ಲಿ ಬೆಳ್ಳಿ ಪದಕ ಪಡೆದಿದ್ದರು. ಟರ್ಕಿಯಲ್ಲಿ 2019ರಲ್ಲಿ ನಡೆದ ವಿಶ್ವ ಪ್ಯಾರಾ ಟ್ವೇಕ್ವಾಂಡೋ ಚಾಂಪಿಯನ್ಶಿಪ್ನಲ್ಲೂ ಕೂಡ ಕಂಚಿನ ಪದಕ ಪಡೆದಿದ್ದರು.
ಪ್ಯಾರಾ ಪವರ್ಲಿಫ್ಟಿಂಗ್
ಸಕಿನಾ ಖತುನ್ ಮತ್ತು ಜೈದೀಪ್ ಈ ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಕರ್ನಾಟಕದ ಸಕಿನಾ ಸಾಯ್ ಬೆಂಗಳೂರಿನ ರಾಷ್ಟ್ರೀಯ ಕೇಂದ್ರದಲ್ಲಿ ತರಬೇತಿ ಪಡೆದಿದ್ದರೆ, ಹರಿಯಾಣದ ಜೈದೀಪ್ ರೋಹ್ಟಕ್ನ ರಾಜೀವ್ ಗಾಂಧಿ ಸ್ಟೇಡಿಯಂನಲ್ಲಿ ತರಬೇತಿ ಪಡೆದಿದ್ದಾರೆ.
ಸಕಿನಾ ಮಹಿಳೆಯರ 50 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಸಕಿನಾ 2014ರ ಗ್ಲಾಸ್ಗೋ ಕಾಮನ್ ವೆಲ್ತ್ ಗೇಮ್ಸ್ನಲ್ಲಿ ಕಂಚು ಮತ್ತು 2018ರ ಪ್ಯಾರಾ ಏಷ್ಯನ್ ಗೇಮ್ಸ್ನಲ್ಲಿ ಬೆಳ್ಳಿ ಪದಕ ಪಡೆದಿದ್ದಾರೆ. ಇದೀಗ ಪ್ಯಾರಾಲಿಂಪಿಕ್ಸ್ನಲ್ಲೂ ಪದಕದ ನಿರೀಕ್ಷೆಯಲ್ಲಿದ್ದಾರೆ. ಇನ್ನು, ಜೈದೀಪ್ ಪುರುಷರ 65ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಲಿದ್ದು, ಆಗಸ್ಟ್ 27ರಂದು ಕಣಕ್ಕಿಳಿಯಲಿದ್ದಾರೆ.
ಈ ಎಲ್ಲಾ ಅಥ್ಲೀಟ್ಗಳು ಕೇಂದ್ರ ಸರ್ಕಾರದ ಟಾಪ್ಸ್ ಗ್ರೂಪ್ನಲ್ಲಿ ಸೇರಿದ್ದು, ಇವರ ತರಬೇತಿಗೆ ಅಗತ್ಯವಾದ ಎಲ್ಲಾ ನೆರವನ್ನು ಸರ್ಕಾರ ಕಲ್ಪಿಸಿಕೊಟ್ಟಿದೆ. ಹಾಗಾಗಿ, ಈ ಮೂರು ಕ್ರೀಡೆಗಳಲ್ಲಿ ಭಾರತ ಪದಕದ ಖಾತೆ ತೆರೆಯುವ ಸಾಧ್ಯತೆ ಹೆಚ್ಚಿದೆ.
