ಭಾರತದ ಬಾಕ್ಸಿಂಗ್​​ ಫೆಡರೇಶನ್ ವಿರುದ್ಧ ಒಲಿಂಪಿಕ್​ ಪದಕ ವಿಜೇತೆ ಲವ್ಲಿನಾ ಗಂಭೀರ ಆರೋಪ

ಕಾಮನ್​​ವೆಲ್ತ್​ ಗೇಮ್ಸ್​ನಲ್ಲಿ ಭಾಗಿಯಾಗಲಿರುವ ಒಲಿಂಪಿಕ್​ ಪದಕ ವಿಜೇತೆ ಲವ್ಲಿನಾ ಭಾರತದ ಬಾಕ್ಸಿಂಗ್ ಫೆಡರೇಶನ್ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ. ತಾವು ಅನುಭವಿಸುತ್ತಿರುವ ಚಿತ್ರಹಿಂಸೆ ಕುರಿತು ಟ್ವೀಟ್ ಮಾಡಿದ್ದಾರೆ.

ಹೈದರಾಬಾದ್​: 2022ರ ಕಾಮನ್​ವೆಲ್ತ್​ ಕ್ರೀಡಾಕೂಟಕ್ಕಾಗಿ ಭರ್ಜರಿ ತಯಾರಿ ನಡೆಸಿರುವ ಒಲಿಂಪಿಕ್​​ ಪದಕ ವಿಜೇತೆ ಲವ್ಲಿನಾ ಬೊರ್ಗೊಹೈನಾ ಗಂಭೀರ ಆರೋಪವೊಂದನ್ನ ಮಾಡಿದ್ದಾರೆ. ಭಾರತದ ಬಾಕ್ಸಿಂಗ್​ ಫೆಡರೇಶನ್​​​ನಿಂದ ತಾವು ಮಾನಸಿಕ ಕಿರುಕುಳ ಅನುಭವಿಸಿರುವುದಾಗಿ ಹೇಳಿಕೊಂಡಿದ್ದಾರೆ. ಭಾರತದ ಬಾಕ್ಸಿಂಗ್ ಫೆಡರೇಶನ್​​(ಬಿಎಫ್​ಐ) ತನಗೆ ಮಾನಸಿಕ ಕಿರುಕುಳ ನೀಡುತ್ತಿದೆ ಎಂದು ಟ್ವೀಟ್ ಮಾಡಿದ್ದಾರೆ.

ಲವ್ಲಿನಾ ಬೊರ್ಗೊಹೈನ್​ ಟ್ವೀಟರ್​ನಲ್ಲಿ ಬರೆದುಕೊಂಡಿದ್ದೇನು?:ಭಾರತ ಬಾಕ್ಸಿಂಗ್​ ಫೆಡರೇಶನ್​ ತನ್ನೊಂದಿಗೆ ಕೊಳಕು ರಾಜಕೀಯ ಮಾಡುತ್ತಿದೆ ಎಂದಿರುವ ಬಾಕ್ಸರ್​, ನನ್ನ ಮೇಲೆ ಕಿರುಕುಳ ನಡೆಯುತ್ತಿದೆ ಎಂದು ಬಹಿರಂಗಪಡಿಸಲು ಬಯಸುತ್ತೇನೆ. ಇದು ಅತ್ಯಂತ ದುಃಖದ ಸಂಗತಿ. ಒಲಿಂಪಿಕ್​​​ನಲ್ಲಿ ಪದಕ ಗೆಲ್ಲಲು ಸಹಾಯ ಮಾಡಿದ ತರಬೇತುದಾರರನ್ನ ತೆಗೆದುಹಾಕಲಾಗಿದೆ. ಇದರಿಂದ ನನ್ನ ತರಬೇತಿಗೆ ಅಡ್ಡಿಯಾಗಿದೆ ಎಂದು ಆರೋಪಿಸಿದ್ದಾರೆ.

ದ್ರೋಣಾಚಾರ್ಯ ಪ್ರಶಸ್ತಿ ವಿಜೇತ ತರಬೇತುದಾರ ಸಂಧ್ಯಾ ಗುರುಂಗ್ಜಿ ಅವರನ್ನ ತರಬೇತಿ ಶಿಬಿರದಲ್ಲಿ ಸೇರಿಸಿಕೊಳ್ಳಲು ಮನವಿ ಮಾಡಿದ್ದೆ. ಆದರೆ, ತಡವಾಗಿ ಸೇರಿಸಲಾಗಿದೆ. ತರಬೇತಿ ಶಿಬಿರಗಳಲ್ಲಿ ಸಾಕಷ್ಟು ಸಮಸ್ಯೆ ಎದುರಿಸುತ್ತಿದ್ದೇನೆ. ಇದರಿಂದ ನನ್ನ ತರಬೇತಿಗೆ ತೊಂದರೆಯಾಗ್ತಿದೆ. ನನ್ನ ತರಬೇತುದಾರರನ್ನ ಕಾಮನ್​ವೆಲ್ತ್​ ಗ್ರಾಮದಿಂದ ಹೊರಗಿಡಲಾಗಿದೆ.

ಕ್ರೀಡಾಕೂಟಕ್ಕೆ ಎಂಟು ದಿನ ಮುಂಚಿತವಾಗಿ ನನ್ನ ತರಬೇತಿ ಪ್ರಕ್ರಿಯೆ ನಿಲ್ಲಿಸಲಾಗಿದೆ. ಜೊತೆಗೆ ಓರ್ವ ತರಬೇತುದಾರನನ್ನ ಭಾರತಕ್ಕೆ ವಾಪಸ್​ ಕಳುಹಿಸಲಾಗಿದೆ. ಇದರಿಂದ ಕಾಮನ್​ವೆಲ್ತ್​ ಗೇಮ್ಸ್​ ಮೇಲೆ ಹೇಗೆ ಗಮನಹರಿಸಬೇಕು ಎಂಬುದು ಗೊತ್ತಾಗುತ್ತಿಲ್ಲ ಎಂದು ಅವರು ಹೇಳಿಕೊಂಡಿದ್ದಾರೆ.

ಒಲಿಂಪಿಕ್ಸ್​​ನಲ್ಲಿ ಪದಕ ಗೆದ್ದಿರುವ ಲವ್ಲಿನಾ

ಈ ಎಲ್ಲ ರಾಜಕೀಯದಿಂದ ನನ್ನ ಆಟ ಹಾಳಾಗಲು ಬಿಡುವುದಿಲ್ಲ. ನನ್ನ ದೇಶಕ್ಕಾಗಿ ರಾಜಕೀಯದ ಕಿರುಕುಳದ ಮಧ್ಯೆ ಪದಕ ಗೆದ್ದು ತರುತ್ತೇನೆ ಎಂದು ಹೇಳಿಕೊಂಡಿದ್ದಾರೆ. ಲವ್ಲಿನಾ ಟೋಕಿಯೋದಲ್ಲಿ ನಡೆದ ಒಲಿಂಪಿಕ್ಸ್​​ನಲ್ಲಿ ಭಾರತಕ್ಕಾಗಿ ಕಂಚಿನ ಪದಕ ಗೆದ್ದಿದ್ದರು.