Thailand Open 2022: ಸೋತ ಸೈನಾ ಟೂರ್ನಿಯಿಂದ ಔಟ್​, ಗೆದ್ದು ಖಾತೆ ತೆರೆದ ಕಿಡಂಬಿ ಶ್ರೀಕಾಂತ್

ಇಂದಿನಿಂದ ಆರಂಭವಾಗಿರುವ ಥಾಯ್ಲೆಂಡ್​ ಓಪನ್​ ಟೂರ್ನಿಯಲ್ಲಿ ಭಾರತಕ್ಕೆ ಮಿಶ್ರ ಫಲಿತಾಂಶ ಬಂದಿದೆ. ಮೊದಲ ಪಂದ್ಯದಲ್ಲಿಯೇ ಹಿರಿಯ ಷಟ್ಲರ್​ ಸೈನಾ ನೆಹ್ವಾಲ್​ ಸೋತರೆ, ಕಿಡಂಬಿ ಶ್ರೀಕಾಂತ್​, ಆಕರ್ಷಿ ಕಶ್ಯಪ್​ ಗೆಲುವು ಸಾಧಿಸಿದ್ದಾರೆ.

ಬ್ಯಾಂಕಾಕ್(ಥಾಯ್ಲೆಂಡ್):ಹಲವು ದಿನಗಳ ಬಳಿಕ ಮತ್ತೆ ಬ್ಯಾಡ್ಮಿಂಟನ್​ ಅಂಗಳಕ್ಕೆ ಇಳಿದ ಹಿರಿಯ ಷಟ್ಲರ್​, ಸೈನಾ ನೆಹ್ವಾಲ್​ ಬ್ಯಾಂಕಾಕ್​ನಲ್ಲಿ ನಡೆಯುತ್ತಿರುವ ಮಹಿಳೆಯರ ಸಿಂಗಲ್ಸ್ ವಿಭಾಗದ ಮೊದಲ ಪಂದ್ಯದಲ್ಲಿ ದಕ್ಷಿಣ ಕೊರಿಯಾದ ಕಿಮ್ ಗಾ ಯುನ್ ವಿರುದ್ಧ ಸೋತು ಟೂರ್ನಿಯಿಂದ ಹೊರಬಿದ್ದರು.

ಭಾರತಕ್ಕೆ 2 ಬಾರಿ ಒಲಂಪಿಕ್ಸ್​ ಪದಕ ತಂದು ಕೊಟ್ಟಿರುವ ಸೈನಾ ನೆಹ್ವಾಲ್​ ದಕ್ಷಿಣ ಕೊರಿಯಾದ ಆಟಗಾರ್ತಿ ವಿರುದ್ಧ ಮೊದಲ ಸೆಟ್​ನಲ್ಲಿ 21-11 ರಲ್ಲಿ ಭರ್ಜರಿ ಆರಂಭ ಪಡೆದರು. ಆದರೆ, ಬಳಕ ನಡೆದ 2ನೇ ಸೆಟ್​ನಲ್ಲಿ 15-21, ಮೂರನೇ ಸೆಟ್​ನಲ್ಲಿ 17-21ರಿಂದ ಹಿನ್ನಡೆ ಹೊಂದುವ ಮೂಲಕ ಪಂದ್ಯವನ್ನು ಕೈಚೆಲ್ಲಿ, ಟೂರ್ನಿಯಿಂದಲೇ ಹೊರನಡೆಯಬೇಕಾಯಿತು.

ಡಬಲ್ಸ್​ನಲ್ಲೂ ನಿರಾಸೆ:ಇನ್ನೊಂದೆಡೆ ನಡೆದ ಮಿಶ್ರ ಡಬಲ್ಸ್​ನಲ್ಲಿ ರೆಡ್ಡಿ ಬಿ.ಸುಮೀತ್ ಮತ್ತು ಅಶ್ವಿನಿ ಪೊನ್ನಪ್ಪ ಅವರು ಜಪಾನ್‌ನ ಯುಕಿ ಕನೆಕೊ ಮತ್ತು ಮಿಸಾಕಿ ಮತ್ಸುಟೊಮೊ ವಿರುದ್ಧ ಸೋಲು ಕಂಡಿದ್ದಾರೆ. ಸುಮೀತ್ ಮತ್ತು ಪೊನ್ನಪ್ಪ ಮೊದಲ ಎರಡೂ ಗೇಮ್‌ಗಳನ್ನು ತಲಾ 21-17, 21-17 ರಿಂದ ಸೋಲುವ ಮೂಲಕ ಟೂರ್ನಿಯಿಂದ ಹೊರನಡೆದರು.

ಥಾಯ್ಲೆಂಡ್​ ಓಪನ್​ ಟೂರ್ನಿಯಲ್ಲಿ ಪದಕ ಭರವಸೆ ಮೂಡಿಸಿರುವ ಒಲಂಪಿಕ್ಸ್​ ಕಂಚು ಪದಕ ವಿಜೇತೆ ಪಿ.ವಿ. ಸಿಂಧು ಇಂದು ಅಮೆರಿಕದ ಲಾರೆನ್ ಲ್ಯಾಮ್ ವಿರುದ್ಧ ಕಣಕ್ಕಿಳಿಯಲಿದ್ದಾರೆ.

ಇನ್ನೊಂದು ಪಂದ್ಯದಲ್ಲಿ ಮಹಿಳೆಯರ ಸಿಂಗಲ್ಸ್‌ನ ಮೊದಲ ಸುತ್ತಿನ ಪಂದ್ಯದಲ್ಲಿ ಕೆನಡಾದ ಮಿಚೆಲ್ ಲಿ ವಿರುದ್ಧ ಭಾರತದ ಆಕರ್ಷಿ ಕಶ್ಯಪ್ ಕೂಡ ಸೋಲು ಕಂಡರು. 21-13, 21-18 ರಲ್ಲಿ ಆಕರ್ಷಿ ಕಶ್ಯಪ್​ ಲಿ ವಿರುದ್ಧ ಪರಾಭವ ಹೊಂದಿದರು. ಈ ಆಟ 33 ನಿಮಿಷಗಳಲ್ಲೇ ಕೊನೆಗೊಂಡಿತು.

ಕಿಡಂಬಿ ಶ್ರೀಕಾಂತ್​ಗೆ ಗೆಲುವು:ಥಾಮಸ್​ ಕಪ್​ ಗೆಲುವಿನ ಸಂಭ್ರಮದಲ್ಲಿರುವ ಭಾರತದ ತಾರಾ ಷಟ್ಲರ್ ಕಿಡಂಬಿ ಶ್ರೀಕಾಂತ್ ಪುರುಷರ ವಿಭಾಗದಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಫ್ರಾನ್ಸ್‌ನ ಬ್ರೈಸ್ ಲೆವರ್ಡೆಜ್ ವಿರುದ್ಧ ಜಯ ಗಳಿಸುವ ಮೂಲಕ ಥೈಲ್ಯಾಂಡ್ ಓಪನ್​ನಲ್ಲಿ ಗೆಲುವಿನ ಖಾತೆ ತೆರೆದಿದ್ದಾರೆ. 49 ನಿಮಿಷಗಳ ಕಾಲ ನಡೆದ ಪಂದ್ಯದಲ್ಲಿ ಶ್ರೀಕಾಂತ್ 18-21, 21-10, 21-16 ರಲ್ಲಿ ಲೆವರ್ಡೆಜ್​ರನ್ನು ಸೋಲಿಸಿದರು.

ಓದಿ:ಪ್ಲೇ-ಆಫ್​ಗೋಸ್ಕರ ಮುಂದುವರೆದ ಜಿದ್ದಾಜಿದ್ದಿ ಫೈಟ್​... 3 ಸ್ಥಾನಕ್ಕಾಗಿ 7 ತಂಡಗಳ ಹೋರಾಟ!