ಚಾಂಗ್ವಾನ್ (ದಕ್ಷಿಣ ಕೊರಿಯಾ) : ಭಾರತದ ಯುವ ಶೂಟರ್ ಅರ್ಜುನ್ ಬಾಬುತಾ ಅವರು ಇಲ್ಲಿ ನಡೆಯುತ್ತಿರುವ ಐಎಸ್‌ಎಸ್‌ಎಫ್ ವಿಶ್ವಕಪ್‌ನಲ್ಲಿ ಪುರುಷರ 10 ಮೀಟರ್ ಏರ್ ರೈಫಲ್ ಸ್ಪರ್ಧೆಯಲ್ಲಿ ಟೋಕಿಯೊ ಒಲಿಂಪಿಕ್ಸ್ ಬೆಳ್ಳಿ ಪದಕ ವಿಜೇತ ಲುಕಾಸ್ ಕೊಜೆನಿಸ್ಕಿ ಅವರನ್ನು ಸೋಲಿಸಿ ತಮ್ಮ ಖಾತೆ ತೆರೆದಿದ್ದಾರೆ. ಚಿನ್ನದ ಪದಕದ ಹಣಾಹಣಿಯಲ್ಲಿ ಅರ್ಜುನ್ ಯುಎಸ್ಎಯ ಕೊಜೆನಿಸ್ಕಿಯನ್ನು 17-9 ರಿಂದ ಏಕಪಕ್ಷೀಯವಾಗಿ ಸೋಲಿಸಿದ್ದಾರೆ. ಇದು ಅರ್ಜುನ್‌ಗೆ ಚೊಚ್ಚಲ ಚಿನ್ನವಾಗಿದೆ. ಇವರು ಅಜೆರ್ಬೈಜಾನ್‌ನ ಗಬಾಲಾದಲ್ಲಿ ನಡೆದ 2016 ರ ಜೂನಿಯರ್ ವಿಶ್ವಕಪ್‌ನಲ್ಲಿ ಕಂಚಿನ ಪದಕ ಪಡೆದಿದ್ದರು.
2016 ರಿಂದ ಭಾರತವನ್ನು ಪ್ರತಿನಿಧಿಸುತ್ತಿರುವ ಪಂಜಾಬ್‌ನ 23 ವರ್ಷದ ಆಟಗಾರರಾದ ಇವರು, ಈ ಹಿಂದೆ 261.1 ಅಂಕಗಳೊಂದಿಗೆ ರ‍್ಯಾಂಕಿಂಗ್ ಸುತ್ತಿನಲ್ಲಿ ಅಗ್ರಸ್ಥಾನ ಪಡೆದು ಚಿನ್ನದ ಪದಕಕ್ಕೆ ಅರ್ಹತೆ ಪಡೆದಿದ್ದರು.