ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ಪಾಲ್ಗೊಳ್ಳುವ ಕ್ರೀಡಾಪಟುಗಳಿಗೆ 14 ಕಾಂಡೋಮ್​ ಫ್ರೀ: ಆದರೆ ಬಳಸಂಗಿಲ್ವಂತೆ!

ಏಡ್ಸ್(AIDS)​ ಮಹಾಮಾರಿ ರೋಗ ತಡೆಗಟ್ಟುವ ನಿಟ್ಟಿನಲ್ಲಿ ಒಲಿಂಪಿಕ್ಸ್​ ಕ್ರೀಡಾಕೂಟದ ವೇಳೆ ಕ್ರೀಡಾಪಟುಗಳಿಗೆ ಕಾಂಡೋಮ್‌ಗಳನ್ನು ನೀಡಲಾಗುತ್ತದೆ. ಆದರೆ ಈ ಬಾರಿ ಜಪಾನ್‌ನ ಟೋಕಿಯಾ ಮಹಾನಗರಿಯಲ್ಲಿ ನಡೆಯುವ ಜಾಗತಿಕ ಕ್ರೀಡಾಕೂಟದ ವೇಳೆ ಕ್ರೀಡಾಪಟುಗಳು ನಮಗೆ ನೀಡಲಾಗುವ ಕಾಂಡೋಮ್‌ಗಳನ್ನು​ ಬಳಸುವಂತಿಲ್ಲ. ಸ್ಪರ್ಧಾಳುಗಳು ತಮ್ಮ ದೇಶಕ್ಕೆ ಹಿಂತಿರುಗಿದ ನಂತರ ಬಳಸುವಂತೆ ಸೂಚಿಸಲಾಗಿದೆ. ಇದೇಕೆ? ಪೂರ್ತಿ ಸ್ಟೋರಿ ಓದಿ..

ಟೋಕಿಯೋ(ಜಪಾನ್‌): ಕೋವಿಡ್‌-19 ಎರಡನೇ ಅಲೆಯ ನಡುವೆ ಜಪಾನ್​ನ ಟೋಕಿಯೊದಲ್ಲಿ ಈ ವರ್ಷದ ಒಲಂಪಿಕ್ಸ್ ಕ್ರೀಡಾಕೂಟಗಳು​ ನಡೆಯಲಿವೆ. ಮಹಾಮಾರಿಯ ಅವಾಂತರದ ನಡುವೆ ಕೆಲವು ಕಟ್ಟುನಿಟ್ಟಿನ ನೀತಿ ನಿಯಮಗಳ ಅನುಸಾರ ಜಾಗತಿಕ ಮಟ್ಟದ ಕ್ರೀಡಾ ಸಂಗ್ರಾಮ​ ನಿಗದಿಯಾಗಿದೆ.

ಮುಂದಿನ ತಿಂಗಳು (ಜುಲೈ) 23ರಿಂದ ಒಲಂಪಿಕ್ಸ್​ ಪ್ರಾರಂಭವಾಗುತ್ತಿದೆ. ವಿಶ್ವದ ವಿವಿಧ ಮೂಲೆಗಳಿಂದ 11 ಸಾವಿರಕ್ಕೂ ಹೆಚ್ಚು ಕ್ರೀಡಾಪಟುಗಳು ಈ ಸಂದರ್ಭದಲ್ಲಿ ಪದಕ ಬೇಟೆ ನಡೆಸಲಿದ್ದಾರೆ. ಈ ಮಹಾ ಕ್ರೀಡಾಕೂಟದದ ವೇಳೆ ಸ್ಪರ್ಧಾಳುಗಳಿಗೆ ಉಚಿತ ಕಾಂಡೋಮ್‌ಗಳವನ್ನು ​ನೀಡಲಾಗುತ್ತದೆ. ಅದೇ ರೀತಿ ಈ ವರ್ಷವೂ ಕೂಡ ಭಾಗವಹಿಸುವ ಸ್ಫರ್ಧಾಳುಗಳಿಗೆ ಲಕ್ಷಾಂತರ ಕಾಂಡೋಮ್​ ನೀಡಲು ಸಂಘಟಕರು ಮುಂದಾಗಿದ್ದಾರೆ. ನಿಯಮಗಳುನುಸಾರ ಪ್ರತಿ ಸ್ಪರ್ಧಿಗೆ ತಲಾ 14 ಕಾಂಡೋಮ್ ಸಿಗಲಿದೆ. ಸುಮಾರು 1.60 ಲಕ್ಷ ಕಾಂಡೋಮ್ ಅನ್ನು ಸ್ಪರ್ಧಿಗಳಿಗೆ ಉಚಿತವಾಗಿ ನೀಡಲು ತೀರ್ಮಾನಿಸಲಾಗಿದೆ.

ಉದ್ದೇಶವೇನು?

ಒಲಂಪಿಕ್ಸ್ ವೇಳೆ ಏಡ್ಸ್​ ರೋಗ ತಡೆಗಟ್ಟುವುದು ಕಾಂಡೋಮ್​ ವಿತರಣೆಯ ಹಿಂದಿನ ಸದುದ್ದೇಶವಾಗಿದೆ. ಆದರೆ ಈ ಬಾರಿ ಕ್ರೀಡಾಪಟುಗಳು ಕೈಕಟ್ಟಿ ಕುಳಿತುಕೊಳ್ಳುವಂತಾಗಿದೆ. ಹೌದು, ಯಾರೂ ಕೂಡಾ ಈ ಸಲ ಕಾಂಡೋಮ್​ ಅನ್ನು ಅಲ್ಲಿ ಬಳಸುವಂತಿಲ್ಲ. ಇವುಗಳನ್ನು ಸ್ಪರ್ಧಾಳುಗಳು ಸ್ಮರಣಿಕೆಯಂತೆ ತಮ್ಮ ದೇಶಗಳಿಗೆ ಕೊಂಡೊಯ್ದು ನಂತರವೇ ಬಳಸುವಂತೆ ತಿಳಿಸಲಾಗಿದೆ.

ಸಿಯೋಲ್‌ ಕ್ರೀಡಾಕೂಟದಲ್ಲಿ ಉಂಟಾದ ಭೀತಿ:

1988ರ ಸಿಯೋಲ್​ ಒಲಿಂಪಿಕ್ಸ್ ವೇಳೆ ಹರಡಿದ ಏಡ್ಸ್​ ರೋಗದ ಭೀತಿಯಿಂದಾಗಿ ಅಂತಾರಾಷ್ಟ್ರೀಯ ಒಲಿಂಪಿಕ್ಸ್​ ಸಮಿತಿ (ಐಒಸಿ) ಪ್ರತಿ ಒಲಿಂಪಿಕ್ಸ್​ ವೇಳೆ ಕ್ರೀಡಾಳುಗಳಿಗೆ ತಾನೇ ಕಾಂಡೋಮ್​ಗಳನ್ನು ಉಚಿತವಾಗಿ ವಿತರಿಸುತ್ತಾ ಬಂದಿದೆ.

2016ರಲ್ಲಿ ಬ್ರೆಜಿಲ್‌ನಲ್ಲಿ ನಡೆದಿದ್ದ ರಿಯೋ ಒಲಿಂಪಿಕ್ಸ್‌ ವೇಳೆ ಸುಮಾರು 4,50,000 ಕಾಂಡೋಮ್‌ಗಳನ್ನು ವಿತರಿಸಲಾಗಿತ್ತು. ಒಬ್ಬೊಬ್ಬ ಕ್ರೀಡಾಪಟುಗಳಿಗೆ ತಲಾ 42 ಕಾಂಡೋಮ್​ ವಿತರಿಸಲಾಗಿತ್ತು.

ಒಲಂಪಿಕ್ಸ್‌ ಗ್ರಾಮದಲ್ಲಿ ಕ್ರೀಡಾಪಟುಗಳ ಮಧ್ಯೆ ದೈಹಿಕ ಸ್ಪರ್ಶಕ್ಕೆ ಅವಕಾಶವಿಲ್ಲ

ಈ ವರ್ಷ ಐಒಸಿ(IOC) ಬಿಡುಗಡೆ ಮಾಡಿರುವ ಹೊಸ ಮಾರ್ಗಸೂಚಿಗಳ ಪ್ರಕಾರ, ಒಲಿಂಪಿಕ್ಸ್​ ವೇಳೆ ಕ್ರೀಡಾಪಟುಗಳು ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು ಕಡ್ಡಾಯ. ಪ್ರತಿಯೊಬ್ಬರ ನಡುವೆ 2 ಮೀಟರ್​ಗಳ ಅಂತರವಿರಬೇಕೆಂದು ಸೂಚಿಸಲಾಗಿದೆ. ಒಲಿಂಪಿಕ್​ ಗ್ರಾಮದಲ್ಲೂ ಕ್ರೀಡಾಪಟುಗಳ ನಡುವೆ ದೈಹಿಕ ಸ್ಪರ್ಶ ಇರಬಾರದು. ಕನಿಷ್ಠ ಹ್ಯಾಂಡ್​ ಶೇಕ್​ ಮತ್ತು ಅಪ್ಪುಗೆಯನ್ನೂ ಮಾಡಬಾರದು ಎಂದು ಹೇಳಿರುವ ಐಒಸಿ, ಈ ನಿಯಮಗಳನ್ನು ಉಲ್ಲಂಘಿಸುವವರಿಗೆ ಭಾರಿ ದಂಡ ವಿಧಿಸುವ ಎಚ್ಚರಿಕೆ ನೀಡಿದೆ.