ಸಿಂಗಾಪುರ ಓಪನ್​: 2 ವರ್ಷ ಬಳಿಕ ಸೈನಾ ನೆಹ್ವಾಲ್ ಕ್ವಾರ್ಟರ್​ ಫೈನಲ್​ಗೆ.. ಸಿಂಧು, ಪ್ರಣಯ್​ ಕೂಡ ಲಗ್ಗೆ

ಸಿಂಗಾಪುರ ಓಪನ್​ನಲ್ಲಿ ಭಾರತೀಯರ ಗೆಲುವಿನ ಮುನ್ನಡೆ - ಪಿವಿ ಸಿಂಧು, ಸೈನಾ ನೆಹ್ವಾಲ್​ , ಎಚ್​ಎಸ್​ ಪ್ರಣಯ್​ ಕ್ವಾರ್ಟರ್​ ಫೈನಲ್​ಗೆ ಎಂಟ್ರಿ.

ಸಿಂಗಾಪುರ:ಗಾಯ ಮತ್ತು ಸತತ ವೈಫಲ್ಯದಿಂದ ಕಂಗೆಟ್ಟಿದ್ದ ಒಲಂಪಿಕ್ಸ್​ ಕಂಚಿನ ಪದಕ ವಿಜೇತೆ ಸೈನಾ ನೆಹ್ವಾಲ್​ ಇಲ್ಲಿ ನಡೆಯುತ್ತಿರುವ ಸಿಂಗಾಪುರ ಓಪನ್​ ಪಂದ್ಯಾವಳಿಯಲ್ಲಿ ಚೀನಾದ ಆಟಗಾರ್ತಿಯನ್ನು ಸೋಲಿಸಿ ಕ್ವಾರ್ಟರ್​ ಫೈನಲ್​ ತಲುಪಿದರು. ಇದಲ್ಲದೇ, ಒಲಂಪಿಕ್​ ಬೆಳ್ಳಿ ಪದಕ ವಿಜೇತೆ ಪಿ.ವಿ. ಸಿಂಧು, ಎಚ್.ಎಸ್​ ಪ್ರಣಯ್​ ಕೂಡ ಕ್ವಾರ್ಟರ್​ ಫೈನಲ್​ಗೆ ಲಗ್ಗೆ ಇಟ್ಟರು.

ವಿಶ್ವದ 9ನೇ ಶ್ರೇಯಾಂಕದ ಆಟಗಾರ್ತಿ ಚೀನಾದ ಹಿ ಬಿಂಗ್ ಜಿಯಾವೊ ವಿರುದ್ಧ ಸೈನಾ ನೆಹ್ವಾಲ್​ 21-19 11-21 21-17 ರ ಅಂತರದಲ್ಲಿ ಮಣಿಸಿದರು. ಮೊದಲ ಸೆಟ್​ ಗೆದ್ದ ಸೈನಾ 2ನೇ ಸೆಟ್​​ನಲ್ಲಿ ಚೀನಾದ ಆಟಗಾರ್ತಿ ತಿರುಗೇಟು ನೀಡಿದರು. 3ನೇ ಸೆಟ್​ನಲ್ಲಿ ಮೈಕೊಡವಿ ಎದ್ದ ಸೈನಾ 21-17 ಅಂತರದಲ್ಲಿ ಜಯಸಿ ವರ್ಷಗಳ ಬಳಿಕ ಕ್ವಾರ್ಟರ್​ ಫೈನಲ್​ ತಲುಪಿದರು.

ಈ ಹಿಂದೆ ಸೈನಾ ನೆಹ್ವಾಲ್​ 2020 ರಲ್ಲಿ ಮಲೇಷ್ಯಾ ಮಾಸ್ಟರ್ಸ್ ಮತ್ತು ಬಾರ್ಸಿಲೋನಾ ಸ್ಪೇನ್ ಮಾಸ್ಟರ್ಸ್‌ನಲ್ಲಿ ಕ್ವಾರ್ಟರ್‌ಫೈನಲ್ ಹಂತವನ್ನು ತಲುಪಿದ್ದರು. ಅದಾದ ಬಳಿಕ ಗಾಯ ಮತ್ತು ಫಾರ್ಮ್​ ಕೊರತೆಯಿಂದ ಅವರ ಆಟ ಮಂಕಾಗಿತ್ತು.

ಸಿಂಧು, ಪ್ರಣಯ್​ ಕ್ವಾರ್ಟರ್​ಗೆ:ಇನ್ನೊಂದೆಡೆ ವಿಶ್ವದ 3ನೇ ಶ್ರೇಯಾಂಕಿತೆ ಒಲಿಂಪಿಕ್​ ಬೆಳ್ಳಿ ಪದಕ ವಿಜೇತೆ ಪಿವಿ ಸಿಂಧು ವಿಯೆಟ್ನಾಂನ ಆಟಗಾರ್ತಿ ಥುಯ್​ ಲಿನ್​ ನುಯೆನ್​ ವಿರುದ್ಧ 19-21 21-19 21-18 ಗೆಲುವು ಸಾಧಿಸಿ ಮುಂದಿನ ಹಂತಕ್ಕೆ ತೆರಳಿದರು. ಸಿಂಧು ಕ್ವಾರ್ಟರ್​ ಫೈನಲ್​ನಲ್ಲಿ ಚೀನಾದ ಹಾನ್ ಯುಯೆ ಅವರೊಂದಿಗೆ ಮುಖಾಮುಖಿಯಾಗಲಿದ್ದಾರೆ.

ಪುರುಷರ ವಿಭಾಗದಲ್ಲಿ ವಿಶ್ವದ 19ನೇ ಶ್ರೇಯಾಂಕದ ಪ್ರಣಯ್ ಮೂರನೇ ಶ್ರೇಯಾಂಕದ ಚೈನೀಸ್ ತೈಪೆಯ ಚೌ ಟಿಯೆನ್ ಚೆನ್ ವಿರುದ್ಧ ಒಂದು ಗಂಟೆ ಒಂಬತ್ತು ನಿಮಿಷಗಳ ಕಾಲ ನಡೆದ ಕಾದಾಟದಲ್ಲಿ ಗೆಲುವು ಸಾಧಿಸಿ ಕ್ವಾರ್ಟರ್​ ತಲುಪಿದರು. ಪ್ರಣಯ್​ 14-21 22-20 21-18 ಅಂತರದಿಂದ ಗೆದ್ದರು. ಇದು ತೈಪೆ ಆಟಗಾರನ ವಿರುದ್ಧ ಮೂರು ವಾರದಲ್ಲಿ ಇದು ಎರಡನೇ ಗೆಲುವಾಗಿದೆ.

ಓದಿ:ಹೆಣ್ಣು ಮಗುವಿನ ತಂದೆಯಾದ ರಾಬಿನ್ ಉತ್ತಪ್ಪ.. ಸಂತಸ ಹಂಚಿಕೊಂಡ ಸಿಎಸ್​ಕೆ ಬ್ಯಾಟರ್​!