Pro Kabaddi League:ಯು ಮುಂಬಾ ವಿರುದ್ಧ ಮತ್ತೆ ಮುಖಭಂಗ ಅನುಭವಿಸಿದ ಬೆಂಗಳೂರು ಬುಲ್ಸ್​

ಮೊದಲಾರ್ಧದಲ್ಲಿ ಎರಡು ತಂಡಗಳು ತಲಾ 13 ರೈಡಿಂಗ್ ಅಂಕ ಪಡೆದರೆ, ಮುಂಬೈ 7 ಟ್ಯಾಕಲ್​ ಅಂಕ ಪಡೆದು ಪ್ರಾಬಲ್ಯ ಸಾಧಿಸಿತ್ತು. ಬುಲ್ಸ್ ಡಿಫೆಂಡರ್​ಗಳು ಕೇವಲ 3 ಅಂಕ ಮಾತ್ರ ಪಡೆದರು. ದ್ವಿತೀಯಾರ್ಧದಲ್ಲಿ ಮುಂಬೈ ಸಂಪೂರ್ಣ ಪ್ರಾಬಲ್ಯ ಸಾಧಿಸಿ 23 ಅಂಕಪಡೆದರೆ, ಬುಲ್ಸ್ ಕೇವಲ 14 ಅಂಕ ಪಡೆಯಿತು. ಈ ಅವಧಿಯಲ್ಲೂ ಮುಂಬೈ 10 ಟ್ಯಾಕಲ್ ಅಂಕ ಪಡೆದರೆ, ಬುಲ್ಸ್ ಕೇವಲ​ 4 ಅಂಕ ಮಾತ್ರ ಪಡೆಯಿತು.

ಬೆಂಗಳೂರು:ಯು ಮುಂಬಾದ ಬಲಿಷ್ಠ ಡಿಫೆಂಡಿಂಗ್ ಬಲೆಗೆ ಬಿದ್ದ ಬೆಂಗಳೂರು ಬುಲ್ಸ್​ 45-34 ಅಂತರದಲ್ಲಿ ಸೋಲು ಕಂಡು ನಿರಾಶೆಯನುಭವಿಸಿದೆ.

ಬುಧವಾರ ನಡೆದ ಪಂದ್ಯದಲ್ಲಿ ಮೊದಲಾರ್ಧದ ಆರಂಭದಲ್ಲಿ ಪವನ್​ ಶೆರಾವತ್​ ಅವರ ಭರ್ಜರಿ ರೈಡಿಂಗ್ ನೆರವಿನಿಂದ 12-11ರಲ್ಲಿ ಮುನ್ನಡೆ ಸಾಧಿಸಿಕೊಂಡಿತ್ತು. ಆದರೆ ರಾಹುಲ್ ಸೆತ್ಪಾಲ್​ ಬುಲ್ಸ್​ ರೈಡರ್​ಗಳನ್ನು ಬೇಟಿಯಾಡಿ ಮುಂಬೈಗೆ ಅಲ್ಪ ಮುನ್ನಡೆ ತಂದುಕೊಟ್ಟರು.

ಆದರೂ ಒಂದು ಹಂತದಲ್ಲಿ 13-17ರ ಹಿನ್ನಡೆಯಲ್ಲಿದ್ದ ಬುಲ್ಸ್​ ಮೊದಲಾರ್ಧ ಅಂತ್ಯದ ವೇಳೆಗೆ ಅದ್ಭುತವಾಗಿ ಕಮ್​ಬ್ಯಾಕ್ ಮಾಡಿ ಹಿನ್ನಡೆಯ ಅಂತರವನ್ನು 20-22 ಕ್ಕೆ ನಿಯಂತ್ರಿಸಿಕೊಂಡಿತ್ತು. ಆದರೆ ದ್ವಿತೀಯಾರ್ಧದಲ್ಲಿ ಪವನ್​​ ಶೆರಾವತ್​ರನ್ನು ಹೆಚ್ಚು ಸಮಯ ಹೊರಹಾಕುವಲ್ಲಿ ಮುಂಬೈ ಡಿಫೆಂಡರ್​ಗಳು ಯಶಸ್ವಿಯಾದರು. ಇದರ ಜೊತೆಗೆ ಬೆಂಗಳೂರು ಡಿಫೆಂಡರ್​ಗಳು ಎದುರಾಳಿ ರೈಡರ್​ಗಳನ್ನ ಹಿಡಿಯುವ ಯತ್ನದಲ್ಲಿ ಸುಖಾ ಸುಮ್ಮನೆ ಅಂಕಗಳನ್ನು ಬಿಟ್ಟು ತಾವಾಗಿಯೇ ಒತ್ತಡವನ್ನು ಮೈಮೇಲೇಳೆದುಕೊಂಡರು. ಇತ್ತ ಪವನ್​ ವೈಫಲ್ಯ, ಡಿಫೆಂಡರ್​ಗಳ ಕಳಪೆ ಆಟದಿಂದ ದ್ವಿತೀಯಾರ್ಧದಲ್ಲಿ ಬುಲ್ಸ್​ 2 ಬಾರಿ ಆಲೌಟ್ ಆಗಿ ಹೀನಾಯ ಸೋಲು ಕಂಡಿತು.

ಅಂಕಗಳ ವಿವರ:

ಮೊದಲಾರ್ಧದಲ್ಲಿ ಎರಡು ತಂಡಗಳು ತಲಾ 13 ರೈಡಿಂಗ್ ಅಂಕ ಪಡೆದರೆ, ಮುಂಬೈ 7 ಟ್ಯಾಕಲ್​ ಅಂಕ ಪಡೆದು ಪ್ರಾಬಲ್ಯ ಸಾಧಿಸಿತ್ತು. ಬುಲ್ಸ್ ಡಿಫೆಂಡರ್​ಗಳು ಕೇವಲ 3 ಅಂಕ ಮಾತ್ರ ಪಡೆದರು. ದ್ವಿತೀಯಾರ್ಧದಲ್ಲಿ ಮುಂಬೈ ಸಂಪೂರ್ಣ ಪ್ರಾಬಲ್ಯ ಸಾಧಿಸಿ 23 ಅಂಕಪಡೆದರೆ, ಬುಲ್ಸ್ ಕೇವಲ 14 ಅಂಕ ಪಡೆಯಿತು. ಈ ಅವಧಿಯಲ್ಲೂ ಮುಂಬೈ 10 ಟ್ಯಾಕಲ್ ಅಂಕ ಪಡೆದರೆ, ಬುಲ್ಸ್ ಕೇವಲ​ 4 ಅಂಕ ಮಾತ್ರ ಪಡೆಯಿತು.

ಬೆಂಗಳೂರು ಪರ ಪವನ್ 14, ಭರತ್​ 7, ಸೌರಭ್ ನಂಡಲ್ 4 ಅಂಕ ಪಡೆದರು. ಮುಂಬೈ ಪರ ಅಭಿಷೇಕ್ ಸಿಂಗ್ 11, ವಿ. ಅಜಿತ್​ ಕುಮಾರ್​ 8, ರಾಹುಲ್ ಸತ್ಪಾಲ್​ 8, ರಿಂಕು ನರ್ವಾಲ್​ 4, ಹರೇಂದರ್​ ಕುಮಾರ್​ 3, ಫಜಲ್ ಅಟ್ರಾಚಲಿ 3 ಅಂಕ ಪಡೆದು ಗೆಲುವಿನ ರೂವಾರಿಗಳಾದರು.

ಇದನ್ನೂ ಓದಿ:Australian open 2022: ಮೊದಲ 2 ಸೆಟ್​ ಸೋತರೂ, ಪಂದ್ಯ ಗೆದ್ದು ಸೆಮಿಫೈನಲ್ ಪ್ರವೇಶಿಸಿದ ಮೆಡ್ವೆಡೆವ್