ಕಬಡ್ಡಿ ಅಂಗಳದಲ್ಲಿ 'ಶೇರ್​' ಆದ ಪವನ್,​ ಸೋಲುತ್ತಿದ್ದ ಪಂದ್ಯ ಟೈ ಮಾಡಿಕೊಂಡ ಬುಲ್ಸ್​

ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿರುವ ದಬಾಂಗ್​ ಡೆಲ್ಲಿ ವಿರುದ್ಧ ಬೆಂಗಳೂರು ಬುಲ್ಸ್​ ಟೈ ಸಾಧಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಎಂದಿನಂತೆ ಅದ್ಭುತ ಆಟ ಪ್ರದರ್ಶಿಸಿದ ಪವನ್​ ಶೆರಾವತ್​ 17 ಅಂಕಗಳಿಸಿ ತಂಡವನ್ನು ಸೋಲಿನ ದವಡೆಯಿಂದ ಪಾರು ಮಾಡಿದ್ರು.

ಜೈಪುರ:ಪ್ರೋ ಕಬಡ್ಡಿ ಲೀಗ್​ನಲ್ಲಿ ಮುಂಚೂಣಿ ತಂಡ​ ದಬಾಂಗ್​ ಡೆಲ್ಲಿ ವಿರುದ್ಧ ಪವನ್​ ಶೆರಾವತ್​ ಭರ್ಜರಿ ರೈಡಿಂಗ್​ ನೆರವಿನಿಂದ ಬೆಂಗಳೂರು ಬುಲ್ಸ್​ ಪಂದ್ಯ ಟೈ ಮಾಡಿಕೊಂಡಿದೆ.

ಈ ಪಂದ್ಯವನ್ನು ಪವನ್​ ಶೆರಾವತ್​ ಹಾಗೂ ನವೀನ್​ ಕುಮಾರ್​ ನಡುವಿನ ಯುದ್ದ ಎಂದೇ ಪರಿಗಣಿಸಲಾಗಿದ್ದು ಮೊದಲಾರ್ಧದಲ್ಲಿ ಬುಲ್ಸ್​ 19-22 ಅಂಕಗಳ ಹಿನ್ನಡೆ ಅನುಭವಿಸಿತ್ತು. ಪಂದ್ಯದ ದ್ವಿತೀಯಾರ್ಧದಲ್ಲಿ ಮತ್ತೆ ಆರ್ಭಟಿಸಿದ ಡೆಲ್ಲಿ ಕೇವಲ 12 ನಿಮಿಷದಲ್ಲಿ ಬುಲ್ಸ್​ ತಂಡವನ್ನು ಆಲೌಟ್​ ಮಾಡಿ 34-23 ರಲ್ಲಿ ಮುನ್ನಡೆ ಕಾಯ್ದುಕೊಂಡಿತು.

ಕೊನೆಯ 8 ನಿಮಿಷದ ಆಟದಲ್ಲಿ ಕಮಾಲ್​ ಮಾಡಿದ ಪವನ್​ ​ 7 ರೈಡಿಂಗ್​ ಪಾಯಿಂಟ್​ ಸಂಪಾದಿಸಿದರು. ಇವರ ರೈಡಿಂಗ್, ಡಿಫೆಂಡರ್​ಗಳ​ ನೆರವಿನಿಂದ 23-34 ಇದ್ದ ಅಂಕಗಳ ಅಂತರ ಇನ್ನು 5 ನಿಮಿಷದ ಆಟ ಬಾಕಿ ಇರುವಾಗಲೇ 36-35 ರಲ್ಲಿ ಮುನ್ನಡೆ ಪಡೆಯಿತು. ಆದರೆ ಡೆಲ್ಲಿ ಮತ್ತೆ ತಿರುಗಿ ಬಿದ್ದು 39-36 ರಲ್ಲಿ ಮುನ್ನಡೆ ಸಾಧಿಸಿತು. ಕೊನೆಯಲ್ಲಿ ಒಂದು ನಿಮಿಷದ ಆಟ ಬಾಕಿಯಿದ್ದಾಗ ಬುಲ್ಸ್​ 3 ಅಂಕ ಸಂಪಾದಿಸಿ 39-39ರಲ್ಲಿ ಟೈ ಸಾಧಿಸಿತು.

ಎಂದಿನಂತೆ ಆರ್ಭಟಿಸಿದ ಪವನ್​ ಶೆರಾವತ್​ 17 ರೈಡಿಂಗ್​ ಅಂಕಗಳಿಸಿದರು. ಇವರಿಗೆೆ ಸಾಥ್ ನೀಡಿದ ಬಂಟಿ 4, ಡಿಫೆಂಡರ್​ ಅಮಿತ್​ ಶೆರಾನ್​ 6, ಅಜಯ್​ 2, ಸುಮಿತ್​ 2 ಪಾಯಿಂಟ್ ಕಲೆ ಅಂಕ ಸಂಪಾದಿಸಿದರು.

ದಬಾಂಗ್​ ಡೆಲ್ಲಿ ತಂಡ ಪರ ನವೀನ್​ ಕುಮಾರ್​ 14, ಚಂದ್ರನ್​ ರಂಜಿತ್​ 5, ಅನಿಲ್​ ಕುಮಾರ್​ 4, ರವೀಂದ್ರ ಪಹಲ್​ 4, ವಿಶಾಲ್​ ಮಾನೆ 2, ಜೋಗಿಂದರ್​ 2 ಅಂಕ ಪಡೆದು ಮಿಂಚಿದರು.

ಇದಕ್ಕೂ ಮುನ್ನ ನಡೆದಿದ್ದ ಮೊದಲ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್​ 39-34 ರಲ್ಲಿ ಪಟ್ನಾ ಪೈರೇಟ್ಸ್​ ತಂಡವನ್ನು ಮಣಿಸಿತು.