ಬೆಂಗಳೂರು: ಪ್ರೊ ಕಬಡ್ಡಿ ಟೂರ್ನಿಯ 8ನೇ ಆವೃತ್ತಿಯ ಇಂದಿನ ಪಂದ್ಯದಲ್ಲಿ ಜೈಪುರ್ ಪಿಂಕ್ ಪ್ಯಾಂಥರ್ಸ್ ವಿರುದ್ಧ ಭರ್ಜರಿ ಗೆಲುವು ದಾಖಲು ಮಾಡುವ ಮೂಲಕ ಅಗ್ರಸ್ಥಾನಕ್ಕೆ ಲಗ್ಗೆ ಹಾಕಿದೆ. ಬುಲ್ಸ್ ತಂಡ ಆಡಿರುವ 7ಪಂದ್ಯಗಳಿಂದ 1 ಸೋಲು, 1 ಪಂದ್ಯದಲ್ಲಿ ಡ್ರಾ ಸಾಧಿಸಿದ್ದು, ಐದು ಪಂದ್ಯಗಳಲ್ಲಿ ಗೆಲುವು ದಾಖಲು ಮಾಡಿ 28 ಅಂಕ ಗಳಿಕೆ ಮಾಡಿದೆ.
ತಾನು ಆಡಿದ ಮೊದಲ ಪಂದ್ಯದಲ್ಲಿ ಯು ಮುಂಬಾ ವಿರುದ್ಧ ಸೋಲು ಕಂಡಿದ್ದ ಬುಲ್ಸ್ ತಂಡ ತಂದನಂತರ ಪುಟಿದೆದ್ದು, ಉಳಿದ ಪಂದ್ಯಗಳಲ್ಲಿ ಭರ್ಜರಿ ಪ್ರದರ್ಶನ ನೀಡಿತು. ಇಂದಿನ ಪಂದ್ಯದಲ್ಲಿ ಜೈಪುರ್ ವಿರುದ್ಧ 38-31 ಅಂಕಗಳ ಅಂತರದಿಂದ ಗೆಲುವಿನ ನಗೆ ಬೀರಿದೆ.
ಜೈಪುರ್ ವಿರುದ್ಧ ಭರ್ಜರಿ ಜಯ ಸಾಧಿಸಿದ ಬುಲ್ಸ್ ಬೆಂಗಳೂರು ತಂಡ ರೈಡಿಂಗ್ನಲ್ಲಿ 21 ಅಂಕ, ಟ್ಯಾಕಲ್ನಲ್ಲಿ 12 ಹಾಗೂ ಆಲ್ಔಟ್ನಲ್ಲಿ 4 ಪಾಯಿಂಟ್ ಪಡೆದುಕೊಂಡಿತು.
ಮಿಂಚಿನ ರೈಡಿಂಗ್ ಮಾಡಿದ ಪವನ್
ಬೆಂಗಳೂರು ಬುಲ್ಸ್ ತಂಡದ ಕ್ಯಾಪ್ಟನ್ ಪವನ್ ಕುಮಾರ್ ಭರ್ಜರಿ ರೈಡಿಂಗ್ ಮಾಡುವ ಮೂಲಕ ಎದುರಾಳಿ ತಂಡಕ್ಕೆ ಮಾರಕವಾದರು. 13 ರೈಡ್ ಮಾಡುವ ಮೂಲಕ 1 ಟ್ಯಾಕಲ್, 4 ಬೋನಸ್ ಪಾಯಿಂಟ್ ಸೇರಿ 18 ಅಂಕ ಗಳಿಕೆ ಮಾಡಿದರು. ಇವರಿಗೆ ಸಾಥ್ ನೀಡಿದ ದೀಪಕ್ ನರ್ವಾಲ್ 4 ಪಾಯಿಂಟ್, ಸೌರಭ್ ನಡಲ್ ಹಾಗೂ ಮೋರೆ ತಲಾ 3 ಪಾಯಿಂಟ್ ಗಳಿಕೆ ಮಾಡಿದರು.
26 ಅಂಕಗಳೊಂದಿಗೆ ಅಗ್ರ ಸ್ಥಾನದಲ್ಲಿದ್ದ ಡೆಲ್ಲಿ ತಂಡ ಇದೀಗ ಎರಡನೇ ಸ್ಥಾನಕ್ಕೆ ಕುಸಿದಿದೆ. ಪಾಟ್ನಾ ತಂಡ 24 ಅಂಕಗಳೊಂದಿಗೆ ಮೂರನೇ ಸ್ಥಾನದಲ್ಲಿ ಮುಂದುವರೆದಿದೆ.
ಇಂದಿನ ಮತ್ತೊಂದು ಪಂದ್ಯದಲ್ಲಿ ತಮಿಳ್ ತಲೈವಾಸ್ ಹಾಗೂ ಪಾಟ್ನಾ ಪೈರೆಟ್ಸ್ 30-30 ಅಂಕಗಳಿಂದ ಡ್ರಾ ಸಾಧಿಸಿದೆ.
