ಮುಂಬೈ: ತಮಿಳ್ ತಲೈವಾಸ್ ತಂಡ ಮತ್ತೊಂದು ರೋಚಕ ಹಣಾಹಣಿಯಲ್ಲಿ ಪಾಟ್ನಾ ಪೈರೇಟ್ಸ್ ವಿರುದ್ಧ ಒಂದು ಅಂಕದಿಂದ ಸೋಲನುಭವಿಸಿ ನಿರಾಸೆಯನುಭವಿಸಿದರೆ, ಪುಣೇರಿ ಪಲ್ಟನ್ ವಿರುದ್ಧ ಬೆಂಗಾಲ್ ವಾರಿಯರ್ಸ್ 43-23 ರ ಅಂತರದಿಂದ ಭರ್ಜರಿ ಜಯ ಸಾಧಿಸಿದೆ.
ಸೋಮವಾರ ನಡೆದ ಮೊದಲ ಪಂದ್ಯದಲ್ಲಿ ತಮಿಳ್ ತಲೈವಾಸ್ ಉತ್ತಮ ಪ್ರದರ್ಶನದ ಹೊರತಾಗಿಯೂ ಕೇವಲ ಒಂದೇ ಒಂದು ಅಂಕದ ಅಂತರದಿಂದ ಪೈರೇಟ್ಸ್ ವಿರುದ್ಧ 24-23ರಿಂದ ಸೋಲನುಭವಿಸಿದೆ.
ಪಾಟ್ನಾ ಪೈರೇಟ್ಸ್ ಪರ ಡಿಫೆಂಡರ್ ಜೈದೀಪ್ 7, ರೈಡರ್ ಮೋನು ಗೋಯಟ್ 5 ಪಾಯಿಂಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ತಲೈವಾಸ್ ಪರ ರಾಹುಲ್ ಚೌದರಿ 5 ರೈಡಿಂಗ್ ಪಾಯಿಂಟ್, ಅಜಯ್ ಠಾಕೂರ್ 3, ಮಂಜಿತ್ ಚಿಲ್ಲರ್ 4 ಟ್ಯಾಕಲ್ ಪಾಯಿಂಟ್ ಪಡೆದು ಉತ್ತಮ ಪೈಪೋಟಿ ನಡೆಸಿದರು.
ಸೋಮವಾರ ನಡೆದ ಮತ್ತೊಂದು ಪಂದ್ಯದಲ್ಲಿ ಬೆಂಗಾಲ್ ವಾರಿಯರ್ಸ್ ತಂಡ ಪುಣೇರಿ ಪಲ್ಟಾನ್ಸ್ ತಂಡವನ್ನು 43-23ರಿಂದ ಸೋಲಿಸಿತು. ವಾರಿಯರ್ಸ್ ತಂಡದ ರೈಡರ್ಗಳಾದ ಮಣಿಂದರ್ ಸಿಂಗ್ 14, ಇಸ್ಮಾಯಿಲ್ ನಬೀಬಕ್ಷ್ 8 ಅಂಕ ಗಳಿಸಿದರೆ, ಡಿಫೆಂಡರ್ಗಳಾದ ರಿಂಕು ನರ್ವಾಲ್ 5, ವಿರಾಜ್ ವಿಷ್ಣು 3, ಬಲ್ದೇವ್ ಸಿಂಗ್ 3 ಅಂಕ ಪಡೆದು ಮಿಂಚಿದರು.
ಪುಣೆ ಪರ ರೈಡರ್ ಪಂಕಜ್ 6, ಸುಶಾಂತ್ 3, ಮಂಜೀತ್ 3, ಅಮಿತ್ ಕುಮಾರ್ 3, ಗಿರೀಶ್ ಎರ್ನಕ್ 3 ಅಂಕ ಪಡೆದರೂ ಬೆಂಗಾಲ್ ವಾರಿಯರ್ಸ್ ಆರ್ಭಟದ ಎದುರು ನಿಲ್ಲಲಾರದೆ ಹೀನಾಯ ಸೋಲು ಕಂಡರು.