ಮೆಲ್ಬೋರ್ನ್‌ : ಆಸ್ಟ್ರೇಲಿಯನ್ ಓಪನ್ 2022 ಫೈನಲ್ ಪಂದ್ಯದಲ್ಲಿ ಟೆನ್ನಿಸ್ ದಿಗ್ಗಜ ಸ್ಪೇನ್‌ನ ರಾಫೆಲ್ ನಡಾಲ್, ರಷ್ಯಾದ ಯುವ ತಾರೆ ಡೇನಿಲ್‌ ಮೆಡ್ವೆಡೆವ್‌ ವಿರುದ್ಧ ರೋಚಕ ಗೆಲುವು ಸಾಧಿಸುವ ಮೂಲಕ ಈ ಬಾರಿಯ ಆಸ್ಟ್ರೇಲಿಯನ್ ಓಪನ್ ಟ್ರೋಫಿ ಎತ್ತಿಹಿಡಿದಿದ್ದಾರೆ. ಈ ಗೆಲುವಿನ ಮೂಲಕ ವಿಶ್ವ ದಾಖಲೆಯ 21ನೇ ಗ್ರ್ಯಾಂಡ್ ಸ್ಲ್ಯಾಮ್ ಮುಡಿಗೇರಿಸಿಕೊಂಡಿದ್ದಾರೆ.
ಮೆಲ್ಬೋರ್ನ್‌ ಪಾರ್ಕ್‌ನ ರಾಡ್‌ ಲೇವರ್‌ ಕ್ರೀಡಾಂಗಣದಲ್ಲಿ ಇಂದು ನಡೆದ ಪುರುಷರ ಸಿಂಗಲ್ಸ್‌ ಫೈನಲ್‌ನಲ್ಲಿ 5 ಸೆಟ್‌ಗಳ ಮ್ಯಾರಥಾನ್‌ ಹೋರಾಟ ನಡೆಸಿದ ರಾಫೆಲ್ ನಡಾಲ್, ರಷ್ಯಾದ ಯುವ ತಾರೆ ಡೇನಿಲ್‌ ಮೆಡ್ವೆಡೆವ್‌ ಅವರನ್ನು 2-6, 6-7 (5/7), 6-4, 6-4, 7-5 ಅಂತರದ ಸೆಟ್‌ಗಳಿಂದ ಮಣಿಸಿ 2009ರ ಬಳಿಕ ಆಸೀಸ್‌ ನೆಲದಲ್ಲಿ ಮೊದಲ ಬಾರಿ ಚಾಂಪಿಯನ್‌ ಪಟ್ಟ ಅಲಂಕರಿಸಿದರು.
ಈ ಜಯ ಸಾಧಿಸುವ ಮೂಲಕ 21 ನೇ ಗ್ರ್ಯಾಂಡ್ ಸ್ಲಾಮ್ ಗೆದ್ದು ವಿಶ್ವದಾಖಲೆ ಮಾಡಿದ್ದಾರೆ. ಈ ಮೂಲಕ ನಡಾಲ್ ಪುರುಷರ ಸಿಂಗಲ್ಸ್‌ನಲ್ಲಿ ಅತಿ ಹೆಚ್ಚು ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿಗಳನ್ನು ಗೆದ್ದ ಆಟಗಾರ ಎನಿಸಿಕೊಂಡಿದ್ದಾರೆ. ರೋಜರ್ ಫೆಡರರ್ ಮತ್ತು ನೊವಾಕ್ ಜೊಕೊವಿಕ್ ಅವರನ್ನು ಹಿಂದಿಕ್ಕಿ ನಡಾಲ್ ಈ ದಾಖಲೆ ಮಾಡಿದ್ದಾರೆ.