ಮೇರಿಕೋಮ್​ ಲೆಜೆಂಡ್, ನಿಖಾತ್​ ಝರೀನ್​ ಅದ್ಭುತ ಬಾಕ್ಸರ್​: ವಿವಾದವನ್ನು ತಣ್ಣಗಾಗಿಸಿದ ಕ್ರೀಡಾ ಸಚಿವ

ಯುವ ಬಾಕ್ಸರ್​ ನಿಖಾತ್​ ಝರೀನ್​ರನ್ನು ಮಣಿಸಿ ಒಲಿಂಪಿಕ್​ ಅರ್ಹತಾ ಟೂರ್ನಿಗೆ ಪ್ರವೇಶ ಪಡೆದ 6 ಬಾರಿಯ ವಿಶ್ವ ಚಾಂಪಿಯನ್​ ಮೇರಿಕೋಮ್​ ಹಾಗೂ ನಿಖಾತ್​ ಝರೀನ್​ ಇಬ್ಬರು ಭಾರತದ ಹೆಮ್ಮೆಯ ಬಾಕ್ಸರ್​ಗಳು ಎಂದು ಕ್ರೀಡಾ ಸಚಿವ ಕಿರಣ್​ ರಿಜಿಜು ತಿಳಿಸಿದ್ದಾರೆ.

ನವದೆಹಲಿ: ಯುವ ಬಾಕ್ಸರ್​ ನಿಖಾತ್​ ಝರೀನ್​ರನ್ನು ಮಣಿಸಿ ಒಲಿಂಪಿಕ್​ ಅರ್ಹತಾ ಟೂರ್ನಿಗೆ ಪ್ರವೇಶ ಪಡೆದ 6 ಬಾರಿಯ ವಿಶ್ವ ಚಾಂಪಿಯನ್​ ಮೇರಿಕೋಮ್​ ಹಾಗೂ ನಿಖಾತ್​ ಝರೀನ್​ ಇಬ್ಬರು ಭಾರತದ ಹೆಮ್ಮೆಯ ಬಾಕ್ಸರ್​ಗಳು ಎಂದು ಕ್ರೀಡಾ ಸಚಿವ ಕಿರಣ್​ ರಿಜಿಜು ಟ್ವೀಟ್​ ಮೂಲಕ ತಿಳಿಸಿದ್ದಾರೆ.

"ಮೇರಿಕೋಮ್​ ಲೆಜೆಂಡ್​ ​ಬಾಕ್ಸರ್​, ವಿಶ್ವ ಹವ್ಯಾಸಿ ಬಾಕ್ಸಿಂಗ್​ನಲ್ಲಿ ಯಾರು ಮಾಡದ ಸಾಧನೆ ಮಾಡಿದ್ದಾರೆ. ಅದೇ ರೀತಿ ಯುವ ಬಾಕ್ಸರ್​ ನಿಖಾತ್​ ಝರೀನ್​ ಕೂಡ ಮೇರಿಕೋಮ್​ರನ್ನು ಹಿಂಬಾಲಿಸುತ್ತಿದ್ದಾರೆ, ಭಾರತ ಇಬ್ಬರನ್ನು ಸಮಾನವಾಗಿ ಗೌರವಿಸುತ್ತದೆ" ಎಂದು ಟ್ವೀಟ್​ ಮಾಡಿ ಮೇರಿ ಕೋಮ್​ ಮತ್ತು ನಿಖಾತ್​ ನಡುವಿನ ಭಿನ್ನಾಭಿಪ್ರಾಯಕ್ಕೆ ತೆರೆ ಎಳೆಯಲು ಪ್ರಯತ್ನಿಸಿದ್ದಾರೆ.

ಒಲಿಂಪಿಕ್​ ಟ್ರಯಲ್ಸ್​ನಲ್ಲಿ ಮೇರಿಕೋಮ್​ ನಿಖಾತ್​ರನ್ನು ಮಣಿಸಿದ ನಂತರ ಹಸ್ತಲಾಘವ ಮಾಡದೇ ಹೋಗಿದ್ದರು. ಅಲ್ಲದೆ ಹಿರಯ ಬಾಕ್ಸರ್​ ಎನ್ನುವುದನ್ನು ಮರೆದು ತಮಗೆ ಅಗೌರವ ತೋರಿದ ನಿಖಾತ್​ ನಾನೇಕೆ ಗೌರವ ಕೊಡಲಿ ಎಂದು ಹೇಳಿಕೆ ನೀಡಿದ್ದರು.

ಈ ಹೇಳಿಕೆ ಪ್ರತಿಕ್ರಿಯೆ ನೀಡಿದ ನಿಖಾತ್​, ನಾನು ಮೇರಿ ಕೋಮ್​ ವಿರುದ್ಧ ಹೋರಾಟ ಮಾಡಲಿಲ್ಲ, ವ್ಯವಸ್ಥೆ ವಿರುದ್ಧ ನನ್ನ ಹೋರಾಟವಾಗಿತ್ತು. ಆದರೆ ಮೇರಿಕೋಮ್​ ಅದನ್ನು ವೈಯಕ್ತಿಕವಾಗಿ ತೆಗೆದುಕೊಂಡಿದ್ದಾರೆ. ನಾನು ಅದನ್ನು ಊಹೆ ಕೂಡ ಮಾಡಿರಲಿಲ್ಲ. ನನ್ನ ಅವಕಾಶಕ್ಕಾಗಿ ನಾನು ಹೋರಾಟ ಮಾಡಿದೆ ಹೊರೆತು, ಮೇರಿಕೋಮ್​ ಅಥವಾ ಫೆಡರೇಷನ್​ ವಿರುದ್ಧ ಆಗಿರಲಿಲ್ಲ ಎಂದು ತಿಳಿಸಿದ್ದಾರೆ.