ಮುಂಬೈ: ಭಾರತದ ಟಾಪ್ ರೇಸರ್ ಜೇಹನ್ ದಾರುವಾಲಾ ಅವರು ಫಾರ್ಮುಲಾ 1ಗೆ ಕಾಲಿಡುವ ಕನಸು ನನಸಾಗುವ ದಿನಗಳು ಹತ್ತಿರವಾದಂತಿವೆ. ಎಫ್2 ಚಾಂಪಿಯನ್ ತಂಡವಾದ ಇಟಲಿಯ ಪ್ರೆಮಾ ರೇಸಿಂಗ್ ಪರ ಈ ವರ್ಷ ಕಣಕ್ಕಿಳಿಯಲು ಜೇಹನ್ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ.
ಮುಂಬೈ ಮೂಲದ 23 ವರ್ಷದ ಚಾಲಕ ಸತತ 3ನೇ ವರ್ಷವೂ ರೆಡ್‌ಬುಲ್ ಕಿರಿಯರ ತಂಡದೊಂದಿಗೂ ಮುಂದುವರಿಯಲಿದ್ದಾರೆ. ರೆಡ್‌ಬುಲ್ ತಂಡವು 4 ಬಾರಿ ಎಫ್1 ಚಾಂಪಿಯನ್ ಸೆಬಾಸ್ಟಿಯನ್ ವೆಟ್ಟಲ್, ಹಾಲಿ ಎಫ್1 ಚಾಂಪಿಯನ್ ಮ್ಯಾಕ್ಸ್ ವರ್ಸ್ಟಾಪ್ಪೆನ್, ರೇಸ್ ವಿಜೇತರಾದ ಡೇನಿಯಲ್ ರಿಕಾರ್ಡೊ, ಪೀಯರ್ ಗ್ಯಾಸ್ಲಿ ಸೇರಿ ಅನೇಕ ಚಾಲಕರನ್ನು ಬೆಳೆಸಿದೆ.
ಜೇಹನ್ ಈಗಾಗಲೇ ಎಫ್ 2 ಚಾಂಪಿಯನ್‌ಶಿಪ್‌ನಲ್ಲಿ ಹಲವು ಜಯ, ಪೋಡಿಯಂ ಫಿನಿಶ್‌ಗಳನ್ನು ಸಾಧಿಸಿದ್ದಾರೆ. ಇನ್ನು ಈ ವರ್ಷ ತಮ್ಮ ಅತ್ಯದ್ಭುತ ಲಯ, ಅಸಾಧಾರಣ ವೇಗದಿಂದ ಪ್ರೆಮಾ ರೇಸಿಂಗ್ ತಂಡವು ಸತತ 3ನೇ ವರ್ಷವೂ ಚಾಲಕರ ಚಾಂಪಿಯನ್‌ಶಿಪ್ ಪಟ್ಟ ಗಳಿಸುವಂತೆ ಮಾಡುವುದು ಜೇಹನ್‌ರ ಗುರಿಯಾಗಿದೆ.
ಈ ವರ್ಷ ಎಫ್2 ಸೀರೀಸ್ ಒಟ್ಟು 14 ಸುತ್ತುಗಳನ್ನು ಒಳಗೊಂಡಿದ್ದು, 28 ರೇಸ್‌ಗಳು ನಡೆಯಲಿವೆ. ಮಾರ್ಚ್ 18, 2022ರಂದು ಬಹರೈನ್‌ನಲ್ಲಿ ಆರಂಭಗೊಳ್ಳಲಿರುವ ರೇಸ್, 2022ರ ನವೆಂಬರ್ 20ರಂದು ಅಬುಧಾಬಿಯಲ್ಲಿ ಕೊನೆಗೊಳ್ಳಲಿದೆ. ಎಲ್ಲ ರೇಸ್‌ಗಳು ಎಫ್1 ಸ್ಪರ್ಧೆಗೆ ಪೂರಕವಾಗಿ ನಡೆಯಲಿವೆ. 2020ರಲ್ಲಿ ಮಿಕ್ ಶೂಮಾಕರ್ ಹಾಗೂ ಕಳೆದ ವರ್ಷ ಆಸ್ಟ್ರೇಲಿಯಾದ ಆಸ್ಕರ್ ಪಿಯಾಸ್ಟಿ ಅವರು ಪ್ರೆಮಾ ರೇಸಿಂಗ್ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದರು. ಈ ವರ್ಷ ಜೇಹನ್ ಅವರು ತಂಡಕ್ಕೆ ಹ್ಯಾಟ್ರಿಕ್ ಪ್ರಶಸ್ತಿ ತಂದುಕೊಡಲು ಕಾತುರರಾಗಿದ್ದಾರೆ.