PKL 2022: ದೀಪಕ್-ಶೌಲ್ ಮಿಂಚು: ದಬಾಂಗ್​ ಡೆಲ್ಲಿಗೆ ಟೂರ್ನಿಯಲ್ಲಿ ಮೊದಲ ಸೋಲುಣಿಸಿದ ಜೈಪುರ್​

ಸೋಮವಾರ ನಡೆದ 2ನೇ ಪಂದ್ಯದಲ್ಲಿ ಜೈಪುರ್​ ಪಿಂಕ್​ ಪ್ಯಾಂಥರ್ಸ್​ ಸತತ 2ನೇ ಜಯ ಸಾಧಿಸಿದ ಅಂಕಪಟ್ಟಿಯಲ್ಲಿ 6ನೇ ಸ್ಥಾನಕ್ಕೆ ಬಡ್ತಿ ಪಡೆದಿದೆ. ಈ ಪಂದ್ಯವನ್ನೂ ಸೋತರು ಡೆಲ್ಲಿ ತಂಡ ಅಗ್ರಸ್ಥಾನದಲ್ಲೇ ಮುಂದುವರಿದಿದೆ.

ಬೆಂಗಳೂರು: ದೀಪಕ್​ ನಿವಾಸ್ ಹೂಡ ರೈಡಿಂಗ್ ಮತ್ತು ಶೌಲ್ ಕುಮಾರ್ ಅವರ ಅದ್ಭುತ ಡಿಫೆಂಡಿಂಗ್​ ಮುಂದೆ ಮಂಕಾದ ದಬಾಂಗ್​ ಡೆಲ್ಲಿ ಟೂರ್ನಿಯಲ್ಲಿ ಮೊದಲ ಸೋಲು ಕಂಡಿದೆ.

ಸೋಮವಾರ ನಡೆದ 2ನೇ ಪಂದ್ಯದಲ್ಲಿ ಜೈಪುರ್​ ಪಿಂಕ್​ ಪ್ಯಾಂಥರ್ಸ್​ ಸತತ 2ನೇ ಜಯ ಸಾಧಿಸಿ ಅಂಕಪಟ್ಟಿಯಲ್ಲಿ 6ನೇ ಸ್ಥಾನಕ್ಕೆ ಬಡ್ತಿ ಪಡೆದಿದೆ. ಈ ಪಂದ್ಯವನ್ನೂ ಸೋತರೂ ಡೆಲ್ಲಿ ತಂಡ ಅಗ್ರಸ್ಥಾನದಲ್ಲೇ ಮುಂದುವರೆದಿದೆ.

ಈ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ ಶೌಲ್ ಕುಮಾರ್​ ರೈಡಿಂಗ್​ನಲ್ಲಿ ಶತಕ ಬಾರಿಸಿ ಮುನ್ನುಗ್ಗುತ್ತಿದ್ದ ಡೆಲ್ಲಿ ತಂಡದ ನವೀನ್​ ಕುಮಾರ್​ರನ್ನು ಮಂಕಾಗಿಸಿದರು. ಅವರು 7 ಟ್ಯಾಕಲ್ ಅಂಕಗಳ ಜೊತೆಗೆ ಒಟ್ಟು 8 ಅಂಕ ಪಡೆದು ಮಿಂಚಿದರೆ, ಹಿಂದಿನ ಮೂರು ಪಂದ್ಯಗಳಲ್ಲಿ ನಿರೀಕ್ಷಿತ ಪ್ರದರ್ಶನ ತೋರುವಲ್ಲಿ ವಿಫಲರಾಗಿದ್ದ ನಾಯಕ ದೀಪಕ್ ನಿವಾಸ್ ಹೂಡ 9 ಅಂಕ ಪಡೆದರು. ಆದರೆ ಸ್ಟಾರ್ ರೈಡರ್​ ಅರ್ಜುನ್ ದೇಶ್ವಾಲ್ ಇಂದು ಕೇವಲ 7 ಅಂಕಗಳಿಗೆ ಸೀಮಿತರಾದರು. ಅವರು ಈ ಹಿಂದಿನ ಎಲ್ಲಾ ಪಂದ್ಯಗಳಲ್ಲಿ ಸೂಪರ್ 10 ಸಾಧಿಸಿದ್ದರು.

ಇತ್ತ ಡೆಲ್ಲಿ ತಂಡದ ರೈಡಿಂಗ್ ಬಳಗದ ಪ್ರಮುಖ ಅಸ್ತ್ರವಾಗಿದ್ದ ನವೀನ್​ ಎಕ್ಸ್​ಪ್ರೆಸ್​ ಇಂದು ಕೇವಲ 7 ಅಂಕಗಳನ್ನು ಮಾತ್ರ ಪಡೆದರು. ಆಶು ಮಲಿಕ್​ 8, ಲೆಜೆಂಡರಿ ಡಿಫೆಂಡರ್ ಮಂಜಿತ್ ಚಿಲ್ಲರ್​ 4 ಮತ್ತು ಸಂದೀಪ್​ ನರ್ವಾಲ್​ 3 ಅಂಕ ಪಡೆದರಾದರೂ ರೈಡರ್​ಗಳು ವೈಫಲ್ಯ ಅನುಭವಿಸಿದ್ದರಿಂದ 2 ಅಂಕಗಳ ರೋಚಕ ಸೋಲು ಕಾಣಬೇಕಾಯಿತು.

ಮತ್ತೊಂದು ಪಂದ್ಯದಲ್ಲಿ ತಮಿಳ್ ತಲೈವಾಸ್​ ಆಲ್​ರೌಂಡರ್​ ಪ್ರದರ್ಶನ ತೋರಿ 45-26 ಅಂಕಗಳ ಅಂತರದಿಂದ ಹರಿಯಾಣ ಸ್ಟೀಲರ್ಸ್ ವಿರುದ್ಧ ಗೆಲುವು ಸಾಧಿಸಿತು. ರೈಡರ್​ ಮಂಜಿತ್ 10 ಅಂಕ ಪಡೆದರೆ, ಡಿಫೆಂಡರ್​ಗಳಾದ​ ಸುರ್ಜೀತ್​ ಸಿಂಗ್ 8 , ಸಾಗರ್​ 7 ಅಂಕ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ವಿಕಾಶ್ ಖಂಡೋಲ ಹರಿಯಾಣ ಪರ 9 ಅಂಕ ಪಡೆದರು.

ಇದನ್ನೂ ಓದಿ:ನಾಯಕತ್ವಕ್ಕಾಗಿ ಹರಾಜಿನಲ್ಲಿ ಶ್ರೇಯಸ್​ ಅಯ್ಯರ್ ಖರೀದಿಸಲು ಎರಡು ತಂಡಗಳಿಂದ ಪೈಪೋಟಿ