ಬೆಂಗಳೂರಿಗೆ ಶೂಟೌಟ್​​ನಲ್ಲಿ ಕೈ ತಪ್ಪಿದ ಪ್ರಶಸ್ತಿ: ಎಟಿಕೆ ಮೊಹನ್​ ಬಗಾನ್​ಗೆ ಐಎಸ್​​ಎಲ್​ ಗರಿ

ಇಂಡಿಯನ್ ಸೂಪರ್ ಲೀಗ್ ಫುಟ್ಬಾಲ್‌​ ಫೈನಲ್​ನಲ್ಲಿ ಬೆಂಗಳೂರು ಎಫ್​ಸಿಯನ್ನು ಪೆನಾಲ್ಟಿ ಶೂಟೌಟ್​ನಲ್ಲಿ 4-3 ರಿಂದ ಮಣಿಸಿ ಎಟಿಕೆ ಮೋಹನ್​ ಬಗಾನ್​ ತಂಡ ಪ್ರಶಸ್ತಿ ಗೆದ್ದುಕೊಂಡಿತು.

ಗೋವಾ : ಲೀಗ್​ನಲ್ಲಿ ಸತತ ಸೋಲುಗಳನ್ನು ಕಂಡು ನಂತರ ಪುಟಿದೆದ್ದು ಫೈನಲ್​ ಪ್ರವೇಶಿಸಿದ್ದ ಬೆಂಗಳೂರು ಎಫ್​ಸಿ ಇಂಡಿಯನ್ ಸೂಪರ್ ಲೀಗ್​ನ ಪ್ರಶಸ್ತಿ ಸನಿಹದಲ್ಲಿ ಎಡವಿ ಬಿತ್ತು. ಬೆಂಗಳೂರು ತಂಡವನ್ನು ಪೆನಾಲ್ಟಿ ಶೂಟೌಟ್​ನಲ್ಲಿ 4-3 ಗೋಲುಗಳಿಂದ ಮಣಿಸಿದ ಎಟಿಕೆ ಮೋಹನ್ ಬಗಾನ್ ಟೀಂ​​ ಈ ಸಲದ ಪ್ರತಿಷ್ಟಿತ ಐಎಸ್​ಎಲ್​ ಕಪ್‌ ಎತ್ತಿ ಹಿಡಿದು ಸಂಭ್ರಮಿಸಿತು.

ಗೋವಾದ ಜವಾಹರ್‌ಲಾಲ್‌ ನೆಹರೂ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ 2022-23ರ ಇಂಡಿಯನ್ ಸೂಪರ್ ಲೀಗ್​ ಫುಟ್ಬಾಲ್​ ಟೂರ್ನಿಯಲ್ಲಿ ಎಟಿಕೆ ಮೋಹನ್ ಬಗಾನ್ 4ನೇ ಬಾರಿಗೆ ಪ್ರಶಸ್ತಿ ಗೆದ್ದುಕೊಂಡಿತು. ಎರಡನೇ ಬಾರಿಗೆ ಕಪ್​ ಗೆಲ್ಲುವ ಆಸೆಯಲ್ಲಿದ್ದ ಸುನಿಲ್ ಛೆಟ್ರಿ ತಂಡಕ್ಕೆ ನಿರಾಸೆಯಾಗಿದೆ. ನಿಗದಿತ ಸಮಯದಲ್ಲಿ 2-2 ಗೋಲುಗಳಿಂದ ಸಮಬಲಗೊಂಡ ನಂತರ ಪೆನಾಲ್ಟಿ ಶೂಟೌಟ್​ನಲ್ಲಿ ಮುನ್ನಡೆ ಸಾಧಿಸಿದ ಎಟಿಕೆ ಗೆಲುವಿನ ಕೇೆಕೆ ಹಾಕಿತು.

ಮುಂಬೈ ಸಿಟಿ ಎಫ್‌ಸಿಯನ್ನು ಮಣಿಸಿ ಫೈನಲ್ ಪ್ರವೇಶಿಸಿದ್ದ ಬೆಂಗಳೂರು ಎಫ್‌ಸಿ ಮೇಲೆ ಹೆಚ್ಚು ನಿರೀಕ್ಷೆ ಇತ್ತು. ಅದರಂತೆ ಸುನಿಲ್​ ಛೆಟ್ರಿ ಪಡೆ ನಿಗದಿತ ಸಮಯದಲ್ಲಿ ಪೈಪೋಟಿಯನ್ನೂ ನೀಡಿತು. ಬೆಂಗಳೂರಿನ ರಾಯ್​ ಕೃಷ್ಣ ಅವರ ಕೈಗೆ ಬಾಲ್​ ತಗುಲಿದ ಪರಿಣಾಮ 14ನೇ ನಿಮಿಷದಲ್ಲಿ ಎಟಿಕೆ ಪೆನಾಲ್ಟಿ ಕಿಕ್​ನ ಅವಕಾಶ ಪಡೆಯಿತು. ಇದನ್ನು ಎಟಿಕೆಯ ಡಿಮಿಟ್ರಿ ಪೆಟ್ರಾಟೋಸ್ ಸದುಪಯೋಗಪಡಿಸಿಕೊಂಡು ಗೋಲ್​ ದಾಖಲಿಸಿದರು. ಈ ಮೂಲಕ ಎಟಿಕೆ 1-0 ಯ ಮುನ್ನಡೆ ಪಡೆದುಕೊಂಡಿತು.

45+5ನೇ ನಿಮಿಷದಲ್ಲಿ ಬೆಂಗಳೂರಿಗೆ ಪೆನಾಲ್ಟಿ ಕಿಕ್​ ಅವಕಾಶ ಸಿಕ್ಕಿತು. ಇದನ್ನು ಸುನಿಲ್​ ಛೆಟ್ರಿ ಉತ್ತಮವಾಗಿ ಬಳಸಿಕೊಂಡರು. ಇದರಿಂದ ಸ್ಕೋರ್​ ಸಮಬಲವಾಯಿತು. ಮೊದಲ ಫೆನಾಲ್ಟಿಗೆ ಕಾರಣವಾಗಿದ್ದ ರಾಯ್​ ಕೃಷ್ಣ 78ನೇ ನಿಮಿಷದಲ್ಲಿ ಹೆಡರ್​ ಮೂಲಕ ಬಿಎಫ್​ಸಿಗೆ ಎರಡನೇ ಗೋಲ್​ ಕೊಡುಗೆ ನೀಡಿದರು. ಇದರಿಂದ ಬೆಂಗಳೂರು ಕೊನೆಯ 12 ನಿಮಿಷ ಇರುವಂತೆ 2-1 ರಿಂದ ಮುನ್ನಡೆ ಪಡೆದುಕೊಂಡಿತು. ಆದರೆ 85ನೇ ನಿಮಿಷದಲ್ಲಿ ಎಟಿಕೆ ಬಿರುಸಿನ ಆಟಕ್ಕೆ ಮುಂದಾಗಿ ವಿವಾದಾತ್ಮಕ ಪೆನಾಲ್ಟಿ ಅವಕಾಶವನ್ನು ಮಾಡಿಕೊಂಡು ಗೋಲ್​ ದಾಖಲಿಸಿ ಸಮಬಲ ಸಾಧಿಸಿತು. ಕೊನೆಯ ಐದು ನಿಮಿಷ ಬಿರುಸಿನ ಆಟ ನಡೆದರೂ ಎರಡೂ ತಂಡದಿಂದ ಮುನ್ನಡೆ ಪಡೆಯಲಾಗಲಿಲ್ಲ.

ನಿಗದಿತ ಸಮಯದಲ್ಲಿ ಸಮಬಲದಲ್ಲಿ ಪಂದ್ಯ ಅಂತ್ಯವಾದ ಕಾರಣ ಪೆನಾಲ್ಟಿ ಶೂಟೌಟ್​​ನ ಮೊರೆ ಹೋಗಬೇಕಾಯಿತು. 5 ಅವಕಾಶಗಳಲ್ಲಿ ಬೆಂಗಳೂರು ಮೂರಲ್ಲಿ ಮಾತ್ರ ಯಶ ಸಾಧಿಸಿತು. ಬ್ರುನೊ ರೆಮಿರೆಸ್​ ಮತ್ತು ಪಾಬ್ಲೊ ಗೋಲ್​ ಗಳಿಸುವಲ್ಲಿ ವಿಫಲರಾದರು. ನಾಲ್ಕು ಅವಕಾಶಗಳಲ್ಲಿ ಗೋಲ್​ಗಳಿಸಿದ ಎಟಿಕೆ ಮೋಹನ್​ ಬಗಾನ್​ ನಾಲ್ಕನೇ ಬಾರಿಗೆ ಪ್ರಶಸ್ತಿಗೆ ಮುತ್ತಿಕ್ಕಿತು. ವಿಜೇತ ಎಟಿಕೆ ಮೋಹನ್​ ಬಗಾನ್​ 6 ಕೋಟಿ ರೂಪಾಯಿ ಬಹುಮಾನ ಪಡೆದುಕೊಂಡರೆ, ರನ್ನರ್ ಅಪ್ ಬೆಂಗಳೂರು ಎಫ್‌ಸಿ 2.5 ಕೋಟಿ ರೂಪಾಯಿ ಗೆದ್ದುಕೊಂಡಿತು.

ಇದನ್ನೂ ಓದಿ:ಸೋಫಿ ಡಿವೈನ್​ ಹೊಡೆತಕ್ಕೆ 94 ಮೀಟರ್​ ದೂರ ಹೋಗಿ ಬಿದ್ದ ಚೆಂಡು! ಮಹಿಳಾ ಕ್ರಿಕೆಟ್​ನಲ್ಲಿ ಸಂಚಲನ