Interview: 'ಒಲಿಂಪಿಕ್​ ಚಾಂಪಿಯನ್​ ಆಗುವ ಒತ್ತಡ ಅನುಭವಿಸಿಲ್ಲ': ನೀರಜ್​ ಚೋಪ್ರಾ

24ರ ಹರೆಯದ ಭಾರತೀಯ ಕ್ರೀಡಾಪಟು ನೀರಜ್‌ ಚೋಪ್ರಾ, ಸ್ಟಾಕ್‌ಹೋಮ್‌ನಲ್ಲಿ ನಡೆಯುತ್ತಿರುವ ಡೈಮಂಡ್ ಲೀಗ್‌ನಲ್ಲಿ 89.94 ಮೀಟರ್‌ ದೂರ ಜಾವೆಲಿನ್‌ ಎಸೆಯುವ ಮೂಲಕ ಅದ್ಭುತ ಸಾಧನೆ ತೋರಿ ಎರಡನೇ ಸ್ಥಾನ ಪಡೆದರು.

ಸ್ವೀಡನ್‌: ಟೋಕಿಯೋ ಒಲಿಂಪಿಕ್ಸ್​ ಚಾಂಪಿಯನ್ ನೀರಜ್​ ಚೋಪ್ರಾ ಇಂದು ನಡೆದ ಡೈಮಂಡ್​ ಲೀಗ್​​ನಲ್ಲಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ತಮ್ಮದೇ ರಾಷ್ಟ್ರೀಯ ದಾಖಲೆ ಮುರಿದು ಮುನ್ನುಗ್ಗಿದರು. "ನಾನು ಒಲಿಂಪಿಕ್​​ ಚಾಂಪಿಯನ್​ ಆಗುವ ಒತ್ತಡ ಅನುಭವಿಸಿಲ್ಲ" ಎಂದು ಅವರು ಬಳಿಕ ಪ್ರತಿಕ್ರಿಯಿಸಿದರು.

"ಇಂದಿನ ಪ್ರದರ್ಶನದಿಂದ ತೃಪ್ತಿ ಹೊಂದಿದ್ದೇನೆ. ಇಂದು 90 ಮೀಟರ್‌ಗಿಂತ ಹೆಚ್ಚು ದೂರ ಎಸೆಯಬಹುದೆಂದು ಭಾವಿಸಿದ್ದೆ. ಆದರೆ ಸ್ವಲ್ಪ ಎಡವಿದೆ. ಈ ವರ್ಷ ಹೆಚ್ಚು ಸ್ಪರ್ಧೆಗಳಿವೆ. ಮತ್ತಷ್ಟು ಉತ್ತಮವಾಗಿ ಸಿದ್ಧನಾಗುತ್ತೇನೆ" ಎಂದು ಅವರು ತಿಳಿಸಿದರು.

ಡೈಮಂಡ್ ಲೀಗ್‌ನಲ್ಲಿ ನೀರಜ್‌ ಚೋಪ್ರಾ 7 ಬಾರಿ ಭಾಗವಹಿಸಿದ್ದಾರೆ. ಆದರೆ, ಇದೇ ಮೊದಲ ಸಲ ಪದಕ ಗೆಲ್ಲಲು ಸಾಧ್ಯವಾಗಿದೆ. ಅಮೆರಿಕದ ಯುಜೀನ್‌ನಲ್ಲಿ ನಡೆಯಲಿರುವ ವಿಶ್ವ ಚಾಂಪಿಯನ್‌ಶಿಪ್‌ಗಾಗಿ ಇದೀಗ ಅವರು ಕಾಯುತ್ತಿದ್ದು, ಸ್ಪರ್ಧೆ ಜುಲೈ 15-24ರವರೆಗೆ ನಡೆಯಲಿದೆ.