ಹಾಕಿ ವಿಶ್ವಕಪ್​: ವೇಲ್ಸ್​ ವಿರುದ್ಧ ಭಾರತಕ್ಕೆ ಜಯ, ಕ್ವಾರ್ಟರ್​ ಫೈನಲ್​ಗಾಗಿ ಕ್ರಾಸ್​ ಓವರ್​ ಪಂದ್ಯ

ಒಡಿಶಾದಲ್ಲಿ ಹಾಕಿ ವಿಶ್ವಕಪ್​- ಭಾರತಕ್ಕೆ ವೇಲ್ಸ್​ ವಿರುದ್ಧ ಜಯ - ಮಲೇಷ್ಯಾಗೆ ನ್ಯೂಜಿಲ್ಯಾಂಡ್​ ವಿರುದ್ಧ ವಿಕ್ರಮ- ನೆದರ್ಲೆಂಡ್ಸ್‌ಗೆ ಚಿಲಿ ವಿರುದ್ಧ ಏಕಪಕ್ಷೀಯ ಗೆಲುವು

ಭುವನೇಶ್ವರ(ಒಡಿಶಾ):ಕ್ವಾರ್ಟರ್​ಫೈನಲ್​ ತಲುಪಲು ಗೆಲ್ಲಲೇಬೇಕಿದ್ದ ಮಹತ್ವದ ಪಂದ್ಯದಲ್ಲಿ ಭಾರತ, ವೇಲ್ಸ್​ ವಿರುದ್ಧ 4-2 ರಲ್ಲಿ ಜಯ ಸಾಧಿಸಿದೆ. ಗುಂಪಿನಲ್ಲಿ ಎರಡನೇ ಸ್ಥಾನ ಪಡೆದ ಟೀಂ ಇಂಡಿಯಾ ಕ್ರಾಸ್​ ಓವರ್​ ಮೂಲಕ ಕ್ವಾರ್ಟರ್​ಗೆ ಲಗ್ಗೆ ಇಡಬೇಕಿದೆ. ಕಳೆದ ಪಂದ್ಯದಲ್ಲಿ ಅಂಕ ರಹಿತ ಡ್ರಾ ಸಾಧಿಸಿದ್ದ ಭಾರತ ಈ ಪಂದ್ಯದಲ್ಲಿ ದೊಡ್ಡ ಗೆಲುವಿನ ಅಗತ್ಯವಿತ್ತು. ಆದರೆ, 4-2 ರಲ್ಲಿ ವೇಲ್ಸ್ ಮಣಿಸಿತಾದರೂ ಕ್ವಾರ್ಟರ್​ ಫೈನಲ್​ಗೆ ಟಿಕೆಟ್​​ ಖಚಿತವಾಗಲಿಲ್ಲ.

ರೋಚಕತೆಯಿಂದ ಕೂಡಿದ್ದ ಪಂದ್ಯದಲ್ಲಿ ಉಭಯ ತಂಡಗಳು ಮೊದಲ ಕ್ವಾರ್ಟರ್​ನಲ್ಲಿ ಯಾವುದೇ ಗೋಲು ದಾಖಲಿಸಲಿಲ್ಲ. 22 ನೇ ನಿಮಿಷದಲ್ಲಿ ಸಂಶೇರ್​ ಸಿಂಗ್​ ರಿಬೌಂಡ್​ ಮೂಲಕ ಗೋಲು ಗಳಿಸಿ ಭಾರತಕ್ಕೆ 1-0 ಮುನ್ನಡೆ ತಂದು ಕೊಟ್ಟರು. 32 ನೇ ನಿಮಿಷದಲ್ಲಿ ಸಿಕ್ಕ ಅವಕಾಶವನ್ನು ಬಳಸಿಕೊಂಡ ಭಾರತದ ಅಕ್ಷದೀಪ್​ ಸಿಂಗ್​ ಅದ್ಭುತ ಗೋಲು ಗಳಿಸಿದರು. ಈ ಮೂಲಕ ಭಾರತ 2-0 ಮುನ್ನೆ ಪಡೆಯಿತು.

ದೊಡ್ಡ ಗೆಲುವಿನ ಅಂತರದ ನಿರೀಕ್ಷೆತಲ್ಲಿದ್ದ ಭಾರತಕ್ಕೆ ವೇಲ್ಸ್​ 43 ನೇ ನಿಮಿಷದಲ್ಲಿ ತಿರುಗೇಟು ನೀಡಿತು. ಪೆನಾಲ್ಟಿ ಕಾರ್ನರ್​ ಅವಕಾಶವನ್ನು ಗೋಲಾಗಿ ಮಾಡಿದ ವೇಲ್ಸ್​ 2-1 ಹಿನ್ನಡೆ ತಗ್ಗಿಸಿತು. 44 ನೇ ನಿಮಿಷದಲ್ಲಿ ಮತ್ತೊಂದು ಪೆನಾಲ್ಟಿಯನ್ನು ಗೋಲು ಬಾರಿಸಿ 2-2 ರಲ್ಲಿ ಸಮಬಲ ಸಾಧಿಸಿತು. ನಾಲ್ಕನೇ ಅವಧಿಯಲ್ಲಿ ಸಿಡಿದ ಭಾರತದ ಅಕ್ಷದೀಪ್​ ಮತ್ತೊಂದು ಗೋಲು ಬಾರಿ 3-2 ಮುನ್ನಡೆ ಸಿಗುವಂತೆ ಮಾಡಿದರು. ಬಳಿಕ ಕೊನೆಯಲ್ಲಿ ಸಿಕ್ಕ ಪೆನಾಲ್ಟಿ ಕಾರ್ನರ್​ ಅವಕಾಶವನ್ನು ಹರ್ಮನ್​ಪ್ರೀತ್​ ಗೋಲಾಗಿಸಿ 4-2 ರಲ್ಲಿ ಪಂದ್ಯ ಗೆಲ್ಲಿಸಿದರು.

ಈ ಗೆಲುವಿನೊಂದಿಗೆ ಟೀಂ ಇಂಡಿಯಾ ವಿಶ್ವಕಪ್​ನ ಡಿ ಗುಂಪಿನಲ್ಲಿ 7 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಕ್ವಾರ್ಟರ್ ಫೈನಲ್ ಟಿಕೆಟ್​ಗಾಗಿ ಮೆನ್ ಇನ್ ಬ್ಲೂ ಪಡೆ ನ್ಯೂಜಿಲ್ಯಾಂಡ್​​ ಎದುರು ಕ್ರಾಸ್ ಓವರ್ ಪಂದ್ಯವನ್ನು ಆಡಬೇಕಿದೆ. ಪಂದ್ಯ ಜನವರಿ 22 ರಂದು ನಡೆಯಲಿದೆ.

ಮಲೇಷ್ಯಾಗೆ ಜಯ:ಇನ್ನೊಂದು ಪಂದ್ಯದಲ್ಲಿ ಮಲೇಷ್ಯಾ, ಪ್ರಬಲ ನ್ಯೂಜಿಲೆಂಡ್ ತಂಡವನ್ನು ಸೋಲಿಸಿತು. ಮಲೇಷ್ಯಾ 3-2 ಗೋಲುಗಳಿಂದ ಗೆಲುವು ಸಾಧಿಸಿತು. ವಿಶ್ವಕಪ್​ನಲ್ಲಿ ಮಲೇಷ್ಯಾ ಎರಡನೇ ಗೆಲುವಿನೊಂದಿಗೆ ಸಿ ಗುಂಪಿನಲ್ಲಿ 6 ಅಂಕಗಳೊಂದಿಗೆ ಎರಡನೇ ಸ್ಥಾನ ಪಡೆಯಿತು.

ಮಲೇಷ್ಯಾ ಪರವಾಗಿ ಫೈಝಲ್ ಸಾರಿ 2 ಗೋಲು ಬಾರಿಸಿದರೆ, ಹಿಯಾಮ್ ಭೂಲ್ 1 ಗೋಲು ಬಾರಿಸಿದರು. ಪಂದ್ಯದ ಆರಂಭದಿಂದಲೂ ಉಭಯ ತಂಡಗಳ ನಡುವೆ ಜಿದ್ದಾಜಿದ್ದಿನ ಹೋರಾಟ ಏರ್ಪಟ್ಟಿತ್ತು. ಮೊದಲಾರ್ಧದಲ್ಲಿ ಮಲೇಷ್ಯಾ ಒಂದು ಗೋಲಿನೊಂದಿಗೆ ಖಾತೆ ಆರಂಭಿಸಿದರೆ, ನ್ಯೂಜಿಲ್ಯಾಂಡ್​​ ಯಾವುದೇ ಗೋಲು ದಾಖಲಾಗಲಿಲ್ಲ.

ಪಂದ್ಯ ದ್ವಿತೀಯಾರ್ಧದಲ್ಲಿ ರೋಚಕತೆ ಕಂಡುಬಂದು, ಗೋಲು ಗಳಿಸಲು ಉಭಯ ತಂಡಗಳು ಜಿದ್ದಾಜಿದ್ದಿನ ಹೋರಾಟ ನಡೆಸಿದವು. ಪಂದ್ಯದ 43ನೇ ನಿಮಿಷದಲ್ಲಿ ಮಲೇಷ್ಯಾದ ರಹೀಮ್ ರಾಜಿ ಗೋಲು ದಾಖಲಿಸಿದರು. ಮತ್ತೊಂದೆಡೆ, ನ್ಯೂಜಿಲ್ಯಾಂಡ್​​ ಹೇಡನ್ ಫಿಲಿಪ್ಸ್ ಪಂದ್ಯದ 52 ನೇ ನಿಮಿಷದಲ್ಲಿ ಗೋಲು ಗಳಿಸಿದರು. ಆ ಬಳಿಕ ನ್ಯೂಜಿಲ್ಯಾಂಡ್​ನ ಸ್ಯಾಮ್ ಲೇನ್ 53ನೇ ನಿಮಿಷದಲ್ಲಿ ಗೋಲು ಬಾರಿಸಿ 2-2ರಲ್ಲಿ ಗೋಲು ಗಳಿಸಿ ಸಮಬಲ ಸಾಧಿಸಿದರು.

ಮಲೇಷ್ಯಾದಲ್ಲಿ ಫೈಝೆಲ್ ಸಾರಿ ಮತ್ತೊಂದು ಗೋಲು ಹೊಡೆದು ಪಂದ್ಯವನ್ನು 3-2 ರಲ್ಲಿ ಮುನ್ನಡೆ ತಂದುಕೊಟ್ಟರು. ಅಂತಿಮವಾಗಿ ಮಲೇಷ್ಯಾ 3-2 ಗೋಲುಗಳಿಂದ ನ್ಯೂಜಿಲೆಂಡ್ ತಂಡವನ್ನು ಸೋಲಿಸುವಲ್ಲಿ ಯಶಸ್ವಿಯಾಯಿತು.

ನೆದರ್ಲೆಂಡ್ಸ್‌ಗೆ ಏಕಪಕ್ಷೀಯ ಜಯ:ಮತ್ತೊಂದು ಪಂದ್ಯದಲ್ಲಿ ಚಿಲಿಯನ್ನು 14-0 ಗೋಲುಗಳಿಂದ ನೆದರ್ಲೆಂಡ್ಸ್‌ ತಂಡ ಸೋಲಿಸಿತು. ಈ ಗೆಲುವಿನೊಂದಿಗೆ ನೆದರ್ಲೆಂಡ್ಸ್ ಪೂಲ್ ಸಿ ಪಟ್ಟಿಯಲ್ಲಿ 9 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ನೆದರ್ಲೆಂಡ್ ಇದುವರೆಗೆ 3 ಪಂದ್ಯಗಳನ್ನು ಆಡಿದ್ದು ಅಜೇಯವಾಗಿ ಉಳಿದಿದೆ. ಪಂದ್ಯದಲ್ಲಿ ಜೀಪ್ ಜಾನ್ಸೆನ್ 4 ಗೋಲು ಗಳಿಸಿ ಪಂದ್ಯಶ್ರೇಷ್ಠರಾದರು.

ಪಂದ್ಯದ ಆರಂಭದಿಂದಲೂ ನೆದರ್ಲೆಂಡ್ಸ್ ಎದುರಾಳಿ ತಂಡದ ಮೇಲೆ ಪ್ರಭುತ್ವ ಸಾಧಿಸಿತು. ಇದು 2023 ರ ಹಾಕಿ ವಿಶ್ವಕಪ್‌ನಲ್ಲಿ ಯಾವುದೇ ತಂಡದಿಂದ ದಾಖಲಾದ ಅತ್ಯಧಿಕ ಗೋಲುಗಳಾಗಿವೆ. ಜೀಪ್ ಜಾನ್ಸೆನ್ ತಂಡಕ್ಕಾಗಿ ಗರಿಷ್ಠ 4 ಗೋಲುಗಳನ್ನು ಗಳಿಸಿದರೆ, ಥಿಯೆರಿ ಬ್ರಿಂಕ್‌ಮನ್ ಮೂರು, ಕೊಯೆನ್ ಬಿಜೆನ್ 2, ಡೆರೆಕ್ ಡಿ ವೈಲ್ಡರ್, ಟೆರೆನ್ಸ್ ಪೀಟರ್ಸ್, ಜಸ್ಟಿನ್ ಬ್ಲಾಕ್, ಥೀಸಸ್ ವ್ಯಾನ್ ಡ್ಯಾಮ್ ಮತ್ತು ಟೆವಿನ್ ಬೈನ್ಸ್ ತಲಾ ಒಂದು ಗೋಲು ಗಳಿಸಿದರು.

ಓದಿ:ಹಾರ್ದಿಕ್​ ಪಾಂಡ್ಯ ವಿವಾದಾತ್ಮಕ ಔಟ್​.. ಮಾಜಿ ಕ್ರಿಕೆಟಿಗರ ಮಧ್ಯೆ 'ಭಿನ್ನ'ಮತ