ಮೋದಿ ಕೊರಳಿಗೆ ಸಾಂಪ್ರದಾಯಿಕ ಅಸ್ಸಾಂ ಗಮ್ಚಾ ತೊಡಿಸಿದ ಓಟಗಾರ್ತಿ ಹಿಮಾ ದಾಸ್​

ಕಾಮನ್​ವೆಲ್ತ್​ ಗೇಮ್ಸ್​ ಭಾರತೀಯ ಕ್ರೀಡಾಪಟುಗಳೊಂದಿಗೆ ನಿನ್ನೆ ಪ್ರಧಾನಿ ನರೇಂದ್ರ ಮೋದಿ ಸಂವಾದ ನಡೆಸಿದ್ದರು. ಈ ಸಂದರ್ಭದಲ್ಲಿ ಓಟಗಾರ್ತಿ ಹಿಮಾ ದಾಸ್​ ಅವರು ಅಸ್ಸಾಂನ ಸಾಂಪ್ರದಾಯಿಕ ಗಮ್ಚಾವನ್ನು ಪ್ರಧಾನಿಗೆ ಉಡುಗೊರೆಯಾಗಿ ನೀಡಿದರು.

ನವ ದೆಹಲಿ: ಭಾರತದ ಓಟದ ಸ್ಪರ್ಧಿ ಹಿಮಾ ದಾಸ್​ ಅವರು ಅಸ್ಸಾಂನ ಸಾಂಪ್ರದಾಯಿಕ ಗಮ್ಚಾ ಶಾಲನ್ನು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಉಡುಗೊರೆ ನೀಡಿ ಗಮನ ಸೆಳೆದಿದ್ದಾರೆ. ಕಾಮನ್​ವೆಲ್ತ್​ ಗೇಮ್ಸ್​ನಲ್ಲಿ ಭಾಗಿಯಾದ ತಂಡದೊಂದಿಗೆ ಮೋದಿ ಅವರು ನಿನ್ನೆ ಸಂವಾದ ನಡೆಸಿದ್ದರು. ಈ ವೇಳೆ ಪ್ರಧಾನಿ ಭೇಟಿ ಮಾಡಿದ ಹಿಮಾ ಅವರು ಗಮ್ಚಾ ತೊಡಿಸಿದ್ದಾರೆ.

ಇದನ್ನು ಟ್ವಿಟರ್‌​ನಲ್ಲಿ ಹಂಚಿಕೊಂಡಿರುವ ಹಿಮಾ ದಾಸ್​, ಗೌರವಾನ್ವಿತ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಆಶೀರ್ವಾದ ಸ್ವೀಕರಿಸಿದ್ದೇನೆ. ಕಾಮನ್ವೆಲ್ತ್ ಗೇಮ್ಸ್ ತಂಡದೊಂದಿಗೆ ನಡೆದ ಸಂವಾದದ ಬಳಿಕ ಅವರಿಗೆ ಸಾಂಪ್ರದಾಯಿಕ ಗಮ್ಚಾವನ್ನು ಉಡುಗೊರೆಯಾಗಿ ನೀಡಿದೆ. ಇದನ್ನು ಸ್ವೀಕರಿಸಿದ್ದಕ್ಕಾಗಿ ಅಸ್ಸಾಂ ಜನರ ಪರವಾಗಿ ನನ್ನ ಕೃತಜ್ಞತೆಗಳು ಎಂದು ತಿಳಿಸಿದ್ದಾರೆ.

2018 ರ ಕಿರಿಯರ ಓಟದ ವಿಶ್ವ ಚಾಂಪಿಯನ್​ ಹಿಮಾ ದಾಸ್​, ಕಾಮನ್​ವೆಲ್ತ್​ ಗೇಮ್ಸ್‌ನಲ್ಲಿ ಪದಕ ಸಾಧನೆ ಮಾಡದಿದ್ದರೂ ಗಮನಾರ್ಹ ಪ್ರದರ್ಶನ ನೀಡಿದ್ದಾರೆ. 200 ಮೀಟರ್​ ಓಟದ ಸ್ಪರ್ಧೆಯ ಸೆಮಿಫೈನಲ್‌ನಲ್ಲಿ 10 ನೇ ಸ್ಥಾನದಲ್ಲಿ ಗುರಿ ಮುಟ್ಟಿ ಫೈನಲ್​ನಿಂದ ತಪ್ಪಿಸಿಕೊಂಡರು. ಅದೂ ಕೇವಲ 0.01 ಸೆಕೆಂಡ್​ ಅಂತರದಲ್ಲಿ. ಬಳಿಕ 100 ಮೀಟರ್​ ಸ್ಪರ್ಧೆಯಲ್ಲಿ ಮೂರನೆಯವರಾಗಿ ಓಡಿ ಫೈನಲ್​ನಿಂದ ವಂಚಿತರಾಗಿದ್ದರು.

ಯುಕೆಯ ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆದ ಕೂಟದಲ್ಲಿ ಭಾರತೀಯ ಅಥ್ಲೀಟ್‌ಗಳು ಒಟ್ಟು 22 ಚಿನ್ನ, 16 ಬೆಳ್ಳಿ ಮತ್ತು 23 ಕಂಚು ಸಮೇತ 61 ಪದಕಗಳನ್ನು ಜಯಿಸಿದರು. ಭಾರತ ಪದಕ ಪಟ್ಟಿಯಲ್ಲಿ 4ನೇ ಸ್ಥಾನ ಗಳಿಸಿದೆ.

ಇದನ್ನೂ ಓದಿ:ಸ್ವಾತಂತ್ರ್ಯ ಅಮೃತ ಮಹೋತ್ಸವ ವರ್ಷದಲ್ಲಿ ಭಾರತಕ್ಕೆ ಸಿಗುತ್ತಾ ಟಿ20 ವಿಶ್ವಕಪ್​ ಕಿರೀಟ?