ಹೈದರಾಬಾದ್:ಈ ವರ್ಷದ ಸೆಪ್ಟೆಂಬರ್ - ಅಕ್ಟೋಬರ್ ತಿಂಗಳಲ್ಲಿ ಚೀನಾದ ಹ್ಯಾಂಗ್ಝೌನಲ್ಲಿ ನಡೆದ ಏಷ್ಯನ್ ಗೇಮ್ಸ್ ಭಾರತದ ಪಾಲಿಗೆ ಅವಿಸ್ಮರಣೀಯ. 2023ರ ಏಷ್ಯನ್ ಗೇಮ್ಸ್ 19ನೇ ಆವೃತ್ತಿಗೆ ಭಾರತ ದೊಡ್ಡ ನಿರೀಕ್ಷೆಗಳೊಂದಿಗೆ ಪ್ರಯಾಣ ಬೆಳೆಸಿತ್ತು. ಅದರಂತೆ ನಿರೀಕ್ಷೆಗೂ ಮೀರಿ ಸಾಧನೆ ಮಾಡಿತ್ತು. ವಿದೇಶಿ ನೆಲದಲ್ಲಿ ಬರೋಬ್ಬರಿ 107 ಪದಕಗಳ ಬೇಟೆಯಾಡುವ ಮೂಲಕ ಹಳೆಯ ದಾಖಲೆಗಳೆಲ್ಲವನ್ನು ಭಾರತ ಅಳಿಸಿ ಹಾಕಿತ್ತು.
ನಮ್ಮ ಕ್ರೀಡಾಪಟುಗಳು ಅಸಾಧಾರಣ ಕೌಶಲ್ಯಗಳು ಮತ್ತು 4 ವರ್ಷಗಳ ಕಠಿಣ ಪರಿಶ್ರಮದ ಫಲವಾಗಿ ಈ ಕ್ರೀಡಾ ಕೂಟದಲ್ಲಿ ಭಾರತ 28 ಚಿನ್ನ, 38 ಬೆಳ್ಳಿ, 41 ಕಂಚಿನ ಪದಕವನ್ನು ಬಾಚಿಕೊಂಡು ದಾಖಲೆ ನಿರ್ಮಿಸಿತು. 2018ರಲ್ಲಿ ನಡೆದ 18ನೇ ಆವೃತ್ತಿಯಲ್ಲಿ 70 ಪದಕಗಳನ್ನು ಪಡೆದಿರುವುದು ಅತ್ಯಧಿಕ ಸಾಧನೆಯಾಗಿತ್ತು. ಈ ಬಾರಿ ಶತಕ ಪದಕಗಳನ್ನು ಬಾಚಿಕೊಳ್ಳುವ ಮೂಲಕ ಹೊಸ ಮೈಲಿಗಲ್ಲು ಸ್ಥಾಪಿಸಿತು. ಅಲ್ಲದೇ ಪದಕಪಟ್ಟಿಯಲ್ಲಿ ಚೀನಾ, ಜಪಾನ್ ಮತ್ತು ಕೊರಿಯಾ ನಂತರ ನಾಲ್ಕನೇ ಸ್ಥಾನವನ್ನು ಅಲಂಕರಿಸಿಕೊಂಡಿತು.
ಆರ್ಚರಿಯಲ್ಲಿ ಸಾಧನೆ: ಅದರಲ್ಲಿ ಆರ್ಚರಿಯಲ್ಲಿ ಭಾರತದ ಕ್ರೀಡಪಟುಗಳು ಅಮೋಘ ಸಾಧನೆ ಮಾಡಿದ್ದಾರೆ. ಈ ಬಾರಿಯ ಆರ್ಚರಿ ಕ್ರೀಡೆಯಲ್ಲಿ ಭಾರತ 9 ಚಿನ್ನ, 5 ಬೆಳ್ಳಿ ಮತ್ತು 2 ಬೆಳ್ಳಿ ಪದಕ ಬಾಚಿಕೊಂಡಿದೆ.
ಕಾಂಪೌಂಡ್ ಆರ್ಚರಿಯಲ್ಲಿ ಭಾರತವು ಪ್ರಾಬಲ್ಯ ಸಾಧಿಸಿತ್ತು. ಈ ಕ್ರೀಡಾಕೂಟದಲ್ಲಿ ಭಾರತ ಎಲ್ಲ ಐದು ಚಿನ್ನದ ಪದಕಗಳನ್ನು ಗೆದ್ದುಕೊಂಡಿತು. ಜ್ಯೋತಿ ಸುರೇಖಾ ವೆನ್ನಮ್ ಮತ್ತು ಪ್ರವೀಣ್ ಓಜಸ್ ಡಿಯೋಟಾಲೆ ಜೋಡಿಯು ಆರ್ಚರಿ ಮಿಶ್ರ ಪಂದ್ಯದಲ್ಲಿ ಮೊದಲ ಚಿನ್ನವನ್ನು ಗೆದ್ದುಕೊಂಡಿತು. ಜ್ಯೋತಿ ವೆನ್ನಮ್ ಅವರು ತಂಡ ಮತ್ತು ವೈಯಕ್ತಿಕ ಕಾಂಪೌಂಡ್ ಈವೆಂಟ್ ಸೇರಿದಂತೆ ಎರಡು ಚಿನ್ನದ ಪದಕಗಳನ್ನು ಸಹ ಬಾಚಿಕೊಂಡಿದ್ದರು. ಉಳಿದಂತೆ ಓಜಸ್ ಮತ್ತು ಅಭಿಷೇಕ್ ವರ್ಮಾ ಕ್ರಮವಾಗಿ ಚಿನ್ನ ಮತ್ತು ಬೆಳ್ಳಿ ಪದಕವನ್ನು ಗೆದ್ದಿದ್ದರು. ಈ ವಿಭಾಗದಲ್ಲಿ ಭಾರತ ಪರಾಕ್ರಮ ಪ್ರದರ್ಶಿಸಿತ್ತು.
ಬಾಕ್ಸಿಂಗ್ ಪಂದ್ಯ:ಮಹಿಳೆಯರ 75 ಕೆಜಿ ವಿಭಾಗದ ಬಾಕ್ಸಿಂಗ್ ಪಂದ್ಯದಲ್ಲಿ ಒಲಿಂಪಿಕ್ ಪದಕ ವಿಜೇತೆ ಲೊವಾಲಿನಾ ಬೆಳ್ಳಿ ಪದಕ ಸೇರಿದಂತೆ ಐದು ಪದಕಗಳನ್ನು ಗೆಲ್ಲುವ ಮೂಲಕ ಭಾರತೀಯ ಬಾಕ್ಸರ್‌ಗಳು ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದರು. ಬಾಕ್ಸಿಂಗ್ ವಿವಿಧ ವಿಭಾಗಗಳಲ್ಲಿ ನಿಖತ್ ಜರೀನ್, ಪ್ರೀತಿ, ನರೇಂದರ್ ಮತ್ತು ಪರ್ವೀನ್ ಹೂಡಾ ಅವರು ಕಂಚಿನ ಪದಕಗಳನ್ನು ಗೆದ್ದುಕೊಂಡಿದ್ದರು.