ಫಿಫಾ ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾ ಬಗ್ಗುಬಡಿದ ಹಾಲಿ ಚಾಂಪಿಯನ್‌ ಫ್ರಾನ್ಸ್‌

ಫಿಫಾ ವಿಶ್ವಕಪ್‌: ಹಾಲಿ ಚಾಂಪಿಯನ್ ಫ್ರಾನ್ಸ್ ತಂಡವು ಆಸ್ಟ್ರೇಲಿಯಾ ವಿರುದ್ಧ 4-1 ಗೋಲುಗಳಿಂದ ಜಯಗಳಿಸಿತು. ಉಳಿದಂತೆ ಎರಡು ಪಂದ್ಯಗಳು ಡ್ರಾನಲ್ಲಿ ಕೊನೆಗೊಂಡವು.

ಅಲ್ ಜನೌಬ್ (ಕತಾರ್‌):ಹಾಲಿ ಚಾಂಪಿಯನ್, ಬಲಾಢ್ಯ ಫ್ರಾನ್ಸ್ ತಂಡವು ಫಿಫಾ ವಿಶ್ವಕಪ್ 2022ರ ಮೊದಲ ಪಂದ್ಯವನ್ನು ಆಸ್ಟ್ರೇಲಿಯಾ ವಿರುದ್ಧ 4-1 ಗೋಲುಗಳಿಂದ ಗೆದ್ದು ಪ್ರತಿಷ್ಟಿತ ಟೂರ್ನಿಯಲ್ಲಿ ಶುಭಾರಂಭ ಮಾಡಿತು. ಪಂದ್ಯದ ಮೊದಲ 9ನೇ ನಿಮಿಷದಲ್ಲಿ ಆಸ್ಟ್ರೇಲಿಯಾ ಪರ ಕ್ರೇಗ್ ಗುಡ್ವಿನ್ ಮೊದಲ ಗೋಲು ಗಳಿಸಿ ಆರಂಭಿಕ ಮುನ್ನಡೆ ತಂದುಕೊಟ್ಟರು. ಇದಾದ ಬಳಿಕ ಆಕ್ರಮಣಕಾರಿ ಆಟಕ್ಕಿಳಿದ ಫ್ರಾನ್ಸ್​​ 27ನೇ ನಿಮಿಷದಲ್ಲಿ ಆಡ್ರಿಯನ್ ರಾಬಿಯೊಟ್ ಗೋಲು ಹೊಡೆದು ಎದುರಾಳಿ ತಂಡಕ್ಕೆ ಶಾಕ್ ಕೊಟ್ಟರು. 32ನೇ ನಿಮಿಷದಲ್ಲಿ ಮತ್ತೊಂದು ಗೋಲು ಗಳಿಸುವ ಮೂಲಕ ಆಲಿವರ್ ಗಿರೌಡ್ ಫ್ರಾನ್ಸ್​ಗೆ ಮತ್ತಷ್ಟು ಮುನ್ನಡೆ ಕೊಟ್ಟರು.

ಈ ಮುನ್ನಡೆ ಆಸ್ಟ್ರೇಲಿಯಾ ಮೇಲೆ ಫ್ರಾನ್ಸ್​ ಹಿಡಿತ ಸಾಧಿಸಲು ನೆರವಾಯಿತು. ಕೈಲಿಯನ್ ಎಂಬಪ್ಪೆ 68 ನೇ ನಿಮಿಷದಲ್ಲಿ ಹೊಡೆದ ಗೋಲು ಹಾಲಿ ಚಾಂಪಿಯನ್ನರಿಗೆ 3-1 ಮೇಲುಗೈ ನೀಡಿತು. ಗಿರೌಡ್ ಅವರು 71ನೇ ನಿಮಿಷದಲ್ಲಿ ತಮ್ಮ ಎರಡನೇ ಗೋಲು ದಾಖಲಿಸಿದಾಗ ಪಂದ್ಯ ಸಂಪೂರ್ಣ ಫ್ರಾನ್ಸ್ ಬಿಗಿಹಿಡಿತಕ್ಕೆ ಬಂದಿತ್ತು. ಈ ಮೂಲಕ ಫಿಫಾ ವಿಶ್ವಕಪ್‌ನಲ್ಲಿ ಹೊಸ ದಾಖಲೆ ಬರೆದ ಗಿರೌಡ್‌ 51 ಗೋಲುಗಳೊಂದಿಗೆ ದೇರ್ರಿ ಹೆನ್ರಿ ದಾಖಲೆ ಸರಿಗಟ್ಟಿದರು. ಆಸ್ಟ್ರೇಲಿಯಾ ಪರ ಕ್ರೇಗ್ ಗುಡ್ವಿನ್ ಏಕೈಕ ಗೋಲು ದಾಖಲಿಸಿದರು.

ಡೆನ್ಮಾರ್ಕ್ vs ಟ್ಯುನಿಷಿಯಾ ಪಂದ್ಯ ಡ್ರಾ:ಆಲ್ ರಯ್ಯಾನ್​ ಕ್ರೀಡಾಂಗಣದಲ್ಲಿ ನಡೆದ ಗ್ರೂಪ್​ ಡಿ ನ ಎರಡು ತಂಡಗಳು ರೋಮಾಂಚನಕಾರಿಯಾಗಿ ಸೆಣಸಾಡಿ ಪಂದ್ಯವನ್ನು ಡ್ರಾ ಮಾಡಿಕೊಂಡವು. 2018 ರಲ್ಲಿ ವಿಶ್ವಕಪ್ ಕ್ವಾರ್ಟರ್‌ಫೈನಲ್ ತಲುಪಿದ ಡೆನ್ಮಾರ್ಕ್ ಈ ಬಾರಿಯೂ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡಗಳ ಸಾಲಿನಲ್ಲಿದೆ. ಟ್ಯುನಿಷಿಯಾ ನೀಡಿದ ಸಾಂಘಿಕ ಪ್ರದರ್ಶನ ಪಂದ್ಯ ಡ್ರಾ ಮಾಡಿಕೊಳ್ಳಲು ನೆರವಾಯಿತು. ಇತ್ತಂಡಕ್ಕೂ ಗೋಲು ಗಳಿಸುವ ಅವಕಾಶ ಸಿಕ್ಕರೂ ಆಟಗಾರರು ಯಶಸ್ವಿಯಾಗಲಿಲ್ಲ.

ಮೆಕ್ಸಿಕೋ vs ಪೋಲೆಂಡ್‌ ಡ್ರಾ:ಇನ್ನುಗ್ರೂಪ್ ಸಿ ಯಲ್ಲಿರುವ ಮೆಕ್ಸಿಕೋ ಮತ್ತು ಪೋಲೆಂಡ್ ಪಂದ್ಯವೂ ಯಾವುದೇ ಗೋಲು ದಾಖಲಾಗದೆ 0-0 ಯಿಂದ ಕೊನೆಗೊಂಡಿತು. ಪೋಲೆಂಡ್​​ ಪರ ನಾಯಕ ರಾಬರ್ಟ್ ಲೆವಾಂಡೋಸ್ಕಿಗೆ ಪೆನಾಲ್ಟಿ ಅವಕಾಶ ಪಡೆದರು. ಆದರೆ ಅವರು ಗೋಲು ಗಳಿಸುವಲ್ಲಿ ವಿಫಲರಾದರು. ಈ ಪ್ರಯತ್ನವನ್ನು ಮೆಕ್ಸಿಕೋ ಗೋಲ್‌ ಕೀಪರ್‌ ಗಿಲ್ಲೆರ್ಮೊ ಓಚೋವಾ ಅತ್ಯುತ್ತಮವಾಗಿ ತಡೆದರು. ಆದ್ರೆ ಪಂದ್ಯದುದ್ದಕ್ಕೂ ಎರಡು ದೇಶದ ತಂಡಗಳು ಗೋಲು ಗಳಿಸಲು ಸಮನಾದ ಹೋರಾಟ ನಡೆಸಿದವು.

ಇದನ್ನೂ ಓದಿ :ಫಿಫಾ ವಿಶ್ವಕಪ್​: ಮೆಸ್ಸಿ ತಂಡಕ್ಕೆ ಸೌದಿ ಅರೇಬಿಯಾ ಶಾಕ್​