ಪಾಟ್ನಾ: 7ನೇ ಆವೃತ್ತಿಯಲ್ಲಿ ಅಜೇಯವಾಗಿದ್ದ ಜೈಪುರ ಪಿಂಕ್ ಫ್ಯಾಂಥರ್ಸ್ ವಿರುದ್ಧ ದಬಾಂಗ್ ಡೆಲ್ಲಿ ಹಾಗೂ ಗುಜರಾತ್ ಫಾರ್ಚುನ್ ಜೈಂಟ್ಸ್ ವಿರುದ್ಧ ಪುಣೇರಿ ಪಲ್ಟನ್ಸ್ ಗೆಲುವು ಸಾಧಿಸಿವೆ.
ಮೊದಲ ಪಂದ್ಯದಲ್ಲಿ ಜೈಪುರ ವಿರುದ್ಧ ಡೆಲ್ಲಿ 35-24 ರಿಂದ ಗಲುವು ಸಾಧಿಸಿತು. ಡೆಲ್ಲಿ ರೈಡರ್ಗಳಾದ ನವೀನ್ ಕುಮಾರ್ 12, ಚಂದ್ರನ್ ರಂಜಿತ್ 10 ಅಂಕಗಳಿಸಿದರೆ ಡಿಫೆಂಡರ್ ರವೀಂದ್ರ ಪಹಲ್ 3 ಅಂಕ ಪಡೆದು ಗೆಲುವಿನ ರೂವಾರಿಗಳಾದರು. ಪಿಂಕ್ ಫ್ಯಾಂಥರ್ಸ್ ಪರ ದೀಪಕ್ ನಿವಾಸ್ ಹೂಡ 11, ದೀಪಕ್ ನರ್ವಾಲ್ 5 ಅಂಕ ಪಡೆದರು ಉತ್ತಮ ಪೈಪೋಟಿ ನೀಡಿದರು.
ಮತ್ತೊಂದು ಪಂದ್ಯದಲ್ಲಿ ಪುಣೇರಿ ಪಲ್ಟನ್ಸ್ ಆಲ್ರೌಂಡ್ ಪ್ರದರ್ಶನ ತೋರುವ ಮೂಲಕ 33-31 ಅಂಕಗಳ ಅಂತರದಿಂದ ಗೆಲವು ಸಾಧಿಸಿದ್ದಾರೆ. ರೈಡರ್ ಪವನ್ 6 ಅಂಕ, ಅಮಿತ್ ಕುಮಾರ್ 6, ಗಿರೀಶ್ 6 ಹಾಗೂ ಮಂಜಿತ್ 5 ಅಂಕಪಡೆದು ಗೆಲುವಿನ ರೂವಾರಿಯಾದರು.
ಗುಜರಾತ್ ಮೊದಲಾರ್ಧದ ಅಂತ್ಯದಲ್ಲಿ 17-14 ಅಂಕಗಳ ಮುನ್ನಡೆ ಸಾಧಿಸಿತು. ಆದರೆ ದ್ವಿತಿಯಾರ್ಧದಲ್ಲಿ ಗುಜರಾತ್ ತಂಡವನ್ನು ಆಲೌಟ್ ಮಾಡಿದ ಪುಣೇರಿ 20-18 ಅಂಕಗಳ ಮುನ್ನಡೆ ಪಡೆದುಕೊಂಡಿದ್ದಲ್ಲದೆ ಅಂದೇ ಮುನ್ನಡೆಯನ್ನು ಕೊನೆಯವರೆಗೂ ಸಾಧಿಸಿ 2 ಅಂಕಗಳಿಂದ ರೋಚಕ ಗೆಲುವು ಸಾಧಿಸಿತು.
ಗುಜರಾತ್ ಪರ ಸಚಿನ್ 9, ರೋಹಿತ್ ಗುಳಿಯಾ 6, ಮೋರೆ ಜಿಬಿ 5 ಅಂಕಗಳಿಸಿ ಉತ್ತಮ ಪ್ರದರ್ಶನ ನೀಡಿದರು.
