ಅಮ್ಮನ ಹುಟ್ಟುಹಬ್ಬದಂದೇ ಬೆಳ್ಳಿ ಗೆದ್ದ ಪುತ್ರ; ಕಾಮನ್​ವೆಲ್ತ್ ಗೇಮ್ಸ್​ನಲ್ಲಿ ಹ್ಯಾಟ್ರಿಕ್ ಪದಕ ಸಾಧನೆ

ತನ್ನ ತಾಯಿಯ ಹುಟ್ಟುಹಬ್ಬದಂದೇ ಭಾರತೀಯ ಕ್ರೀಡಾಪಟು ವಿಕಾಸ್​​ ಠಾಕೂರ್ ಅವರು ಕಾಮನ್​ವೆಲ್ತ್ ಗೇಮ್ಸ್​ನಲ್ಲಿ ಬೆಳ್ಳಿ ಪದಕ ಗೆದ್ದರು.

ಬರ್ಮಿಂಗ್​ಹ್ಯಾಮ್​(ಇಂಗ್ಲೆಂಡ್​): ಕಾಮನ್​ವೆಲ್ತ್ ಗೇಮ್ಸ್​​ನಲ್ಲಿ ಭಾರತದ ಪದಕ ಬೇಟೆ ಮುಂದುವರೆದಿದ್ದು, ವೇಟ್ ಲಿಫ್ಟಿಂಗ್​​ನ 96 ಕೆಜಿ ವಿಭಾಗದಲ್ಲಿ ವಿಕಾಸ್​​ ಠಾಕೂರ್​ ಬೆಳ್ಳಿ ಪದಕಕ್ಕೆ ಮುತ್ತಿಕ್ಕಿದ್ದಾರೆ. ಈ ಮೂಲಕ ಭಾರ ಎತ್ತುವಿಕೆಯಲ್ಲಿ ದೇಶಕ್ಕೆ 8ನೇ ಪದಕ ಒದಗಿಬಂದಿದೆ.

ಅಮ್ಮನ ಹುಟ್ಟುಹಬ್ಬದಂದೇ ಸಾಧನೆ:ತಾಯಿಯ ಹುಟ್ಟುಹಬ್ಬದಂದೇ ವಿಕಾಸ್ ಠಾಕೂರ್​ ಈ ಮಹತ್ವದ ಸಾಧನೆ ಮಾಡಿದ್ದಾರೆ. ಫೈನಲ್ ಪಂದ್ಯದಲ್ಲಿ ಒಟ್ಟು 346 ಕೆಜಿ ಭಾರ (155+199ಕೆಜಿ) ಎತ್ತಿರುವ ವಿಕಾಸ್​ ಬೆಳ್ಳಿ ಗೆದ್ದರು. ಮಗನ ಸಾಧನೆಗೆ ತಂದೆ ಬಿ.ಎಲ್.ಠಾಕೂರ್ ಮೆಚ್ಚುಗೆ ವ್ಯಕ್ತಪಡಿಸುತ್ತಾ, "ಕಾಮನ್​ವೆಲ್ತ್ ಗೇಮ್ಸ್​​ನಲ್ಲಿ ಪುತ್ರ ಹ್ಯಾಟ್ರಿಕ್ ಪದಕ ಸಾಧನೆ ಮಾಡಿದ್ದಾನೆ. 4 ವರ್ಷಗಳ ಕಠಿಣ ಪರಿಶ್ರಮ ಫಲ ನೀಡಿದೆ" ಎಂದರು.

ವಿಕಾಸ್ ಠಾಕೂರ್ ತಾಯಿ ಆಶಾ ಪ್ರತಿಕ್ರಿಯಿಸಿ, "ಇದು ಬಹಳ ಸಂತೋಷದ ದಿನ. ನನ್ನ ಹುಟ್ಟುಹಬ್ಬದ ದಿನವಾದ ಇಂದು ಮಗ ಪದಕದ ಉಡುಗೊರೆ ನೀಡಲಿ ಎಂದು ದೇವರಲ್ಲಿ ಪ್ರಾರ್ಥಿಸುತ್ತಿದ್ದೆ. ನನ್ನ ಆಸೆ ಈಡೇರಿದೆ" ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.

ವಿಕಾಸ್ ಠಾಕೂರ್ ಈ ಹಿಂದೆ 2014ರ ಕಾಮನ್​ವೆಲ್ತ್ ಗೇಮ್ಸ್​​ನಲ್ಲಿ ಬೆಳ್ಳಿ ಹಾಗೂ 2018ರ ಕ್ರೀಡಾಕೂಟದಲ್ಲಿ ಕಂಚಿನ ಪದಕ ಗೆದ್ದಿದ್ದಾರೆ. ಕಾಮನ್​ವೆಲ್ತ್ ಗೇಮ್ಸ್​ನಲ್ಲಿ ಭಾರತ 5 ಚಿನ್ನ, 4 ಬೆಳ್ಳಿ, ಮೂರು ಕಂಚು ಗೆಲ್ಲುವ ಮೂಲಕ 12 ಪದಕ ತನ್ನದಾಗಿಸಿಕೊಂಡಿದೆ.