ಕಾಮನ್ವೆಲ್ತ್ ಗೇಮ್ಸ್​: ಭಾರತಕ್ಕೆ ಮತ್ತೆರಡು ಪದಕ; ಬೆಳ್ಳಿ ಗೆದ್ದ ಸುಶೀಲಾ, ಕಂಚಿಗೆ ಮುತ್ತಿಕ್ಕಿದ ವಿಜಯ್​

ಕಾಮನ್​ವೆಲ್ತ್ ಗೇಮ್ಸ್​ನ ಜೂಡೋದಲ್ಲಿ ಭಾರತದ ಸುಶೀಲಾ ಬೆಳ್ಳಿ ಪದಕಕ್ಕೆ ಮುತ್ತಿಕ್ಕಿದ್ದು, ಪುರುಷರ ವಿಭಾಗದಲ್ಲಿ ವಿಜಯ್ ಕುಮಾರ್ ಯಾದವ್ ಕಂಚಿನ ಸಾಧನೆ ತೋರಿದರು.

ಬರ್ಮಿಂಗ್​ಹ್ಯಾಮ್​(ಲಂಡನ್​):ಕಾಮನ್​ವೆಲ್ತ್ ಗೇಮ್ಸ್​​ನಲ್ಲಿ ಭಾರತದ ಪದಕ ಬೇಟೆ ಮುಂದುವರೆದಿದೆ. 4ನೇ ದಿನವಾದ ಇಂದು ಭಾರತದ ಅಥ್ಲೀಟ್ಸ್​ ಗಮನಾರ್ಹ ಪ್ರದರ್ಶನ ನೀಡುವಲ್ಲಿ ಯಶಸ್ವಿಯಾಗಿದ್ದಾರೆ. ಮಹಿಳೆಯರ 48 ಕೆಜಿ ಜೂಡೋ ಫೈನಲ್‌ನಲ್ಲಿ ದಕ್ಷಿಣ ಆಫ್ರಿಕಾದ ಮೈಕೆಲಾ ವೈಟ್‌ಬೂಯಿ ವಿರುದ್ಧ ಸೋತ ಸುಶೀಲಾ ದೇವಿ ಬೆಳ್ಳಿ ಪದಕ ಗೆದ್ದರು.

ಪುರುಷರ 60 ಕೆಜಿ ಜೂಡೋದಲ್ಲಿ ಭಾರತದ ವಿಜಯ್ ಕುಮಾರ್ ಯಾದವ್​​ ಕಂಚಿನ ಪದಕ ಸಾಧನೆ ತೋರಿದರು. ಕಾಮನ್‌ವೆಲ್ತ್ ಕ್ರೀಡಾಕೂಟದ ಇತಿಹಾಸದಲ್ಲಿ ಸುಶೀಲಾಗೆ ಇದು ಎರಡನೇ ಬೆಳ್ಳಿ ಪದಕವಾಗಿದೆ. 2014ರಲ್ಲಿ ಬೆಳ್ಳಿ ಪದಕ ಗೆದ್ದಿರುವ ಅವರು ಈ ಬಾರಿ ಚಿನ್ನವನ್ನಾಗಿ ಪರಿವರ್ತಿಸುವ ಪ್ರಯತ್ನ ಮಾಡಿದ್ದರು. ಆದರೆ, ಅದರಲ್ಲಿ ವಿಫಲರಾದರು.

ಇವರ ಗಮನಾರ್ಹ ಪ್ರದರ್ಶನಕ್ಕೆ ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಕ್ರೀಡಾ ಸಚಿವ ಅನುರಾಗ್ ಠಾಕೂರ್ ಸೇರಿದಂತೆ ಅನೇಕರು ಅಭಿನಂದನೆ ಸಲ್ಲಿಸಿದ್ದು, ದೇಶದ ಹಿರಿಮೆ ಹೆಚ್ಚಿಸಿದಕ್ಕಾಗಿ ಶುಭ ಹಾರೈಸಿದ್ದಾರೆ. ಕಾಮನ್​ವೆಲ್ತ್ ಗೇಮ್ಸ್​​ನಲ್ಲಿ ಭಾರತ ಇದುವರೆಗೆ 3 ಚಿನ್ನ, 3 ಬೆಳ್ಳಿ ಹಾಗೂ ಎರಡು ಕಂಚು ಸೇರಿ 8 ಪದಕ ಸಂಪಾದಿಸಿದ್ದು 6ನೇ ಸ್ಥಾನದಲ್ಲಿದೆ.