11 ತಿಂಗಳ ಬಳಿಕ ಅಖಾಡಕ್ಕಿಳಿದು ಯುರೋಪಿಯನ್​ ಚಾಂಪಿಯನ್​ಶಿಪ್​ ಗೆದ್ದ ಕೆರೊಲಿನಾ ಮರಿನ್

ಮೊಣಕಾಲಿಗೆ ಗಾಯವಾಗಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಸ್ಪೇನ್​ನ ಬ್ಯಾಡ್ಮಿಂಟನ್​ ಆಟಗಾರ್ತಿ ಕೆರೊಲಿನಾ ಮರಿನ್​ 11 ತಿಂಗಳ ಬಳಿಕ ಅಖಾಡಕ್ಕಿಳಿದು ಚಾಂಪಿಯನ್​ ಪಟ್ಟ ಅಲಂಕರಿಸಿದ್ದಾರೆ.

ಮ್ಯಾಡ್ರಿಡ್(ಸ್ಪೇನ್​):ಮೊಣಕಾಲ ಗಾಯದ ಸಮಸ್ಯೆಯಿಂದ 11 ತಿಂಗಳು ಬ್ಯಾಡ್ಮಿಂಟನ್​ನಿಂದ ದೂರ ಉಳಿದಿದ್ದ ಮಾಜಿ ನಂ.1 ಆಟಗಾರ್ತಿ ಸ್ಪೇನ್​ನ ಕರೋಲಿನಾ ಮರಿನ್ ಭಾನುವಾರ ಯುರೋಪಿಯನ್​ ಚಾಂಪಿಯನ್​ಶಿಪ್​ ಗೆಲ್ಲುವ ಮೂಲಕ ಗೆಲುವಿನ ಹಾದಿಗೆ ಮರಳಿದ್ದಾರೆ.

ಮೊಣಕಾಲಿನ ಗಾಯಕ್ಕೊಳಗಾಗಿ ಟೋಕಿಯೋ ಒಲಿಂಪಿಕ್ಸ್​ನಿಂದ ಹೊರಗುಳಿದಿದ್ದ ಸ್ಪೇನ್‌ ಆಟಗಾರ್ತಿ ಯುರೋಪಿಯನ್​ ಚಾಂಪಿಯನ್​ಶಿಪ್​ಗೆ ಸಂಪೂರ್ಣವಾಗಿ ತಯಾರಿ ನಡೆಸಿದ್ದರು. ಭಾನುವಾರ ನಡೆದ ಫೈನಲ್​ ಪಂದ್ಯದಲ್ಲಿ ಸ್ಕಾಟ್​ಲ್ಯಾಂಡ್​ನ ಕಿರ್ಸ್ಟಿ ಗಿಲ್ಮೊರ್ ವಿರುದ್ಧ 21-10, 21-12 ನೇರ ಸೆಟ್​ಗಳಿಂದ ಗೆಲುವು ಸಾಧಿಸಿ ಚಾಂಪಿಯನ್​ ಪಟ್ಟವನ್ನು ಅಲಂಕರಿಸಿದ್ದಾರೆ.

41 ನಿಮಿಷಗಳ ಕಾಲ ನಡೆದ ಆಟದಲ್ಲಿ ಸ್ಕಾಟ್​ಲ್ಯಾಂಡ್​ ಆಟಗಾರ್ತಿಯ ವಿರುದ್ಧ ಪಾರಮ್ಯ ಮೆರೆದ ಮರಿನ್ ತನ್ನ ಬಲವಾದ ಹೊಡೆತಗಳಿಂದ ಅಧಿಕಾರಯುತ ಗೆಲುವು ಸಾಧಿಸಿದರು. ಮೂರು ಬಾರಿಯ ವಿಶ್ವ ಚಾಂಪಿಯನ್‌ಶಿಪ್‌ ಮತ್ತು 2016 ರ ಒಲಿಂಪಿಕ್ ಚಿನ್ನದ ಪದಕ ವಿಜೇತೆ ಮರಿನ್​ಳನ್ನು ಎದುರಿಸುವಲ್ಲಿ ಕಿರ್ಸ್ಟಿ ಗಿಲ್ಮೊರ್ ವಿಫಲವಾದರು.

ಓದಿ:ಕೇರಳದಿಂದ ಆಗಮಿಸುವ ಪ್ರತಿಭಾನ್ವಿತ ಬಾಕ್ಸರ್‌ಗಳಿಗೆ ಉಚಿತ ತರಬೇತಿ: ಮೇರಿ ಕೋಮ್