ಹ್ಯಾಂಗ್ಝೌ:ಪ್ಯಾರಾ ಏಷ್ಯನ್ ಗೇಮ್ಸ್ ನಾಲ್ಕನೇ ದಿನವೂ ಭಾರತ ಪದಕ ಬೇಟೆಯನ್ನು ಮುಂದುವರೆಸಿದೆ. ಮಿಶ್ರಿತ 50m ರೈಫಲ್ಸ್ ಪ್ರೋನ್ SH-1 ಶೂಟಿಂಗ್ನಲ್ಲಿ ಭಾರತದ ಪ್ಯಾರಾ ಅಥ್ಲೀಟಿ ಶೂಟರ್ ಸಿದ್ಧಾರ್ಥ ಬಾಬು 247.7 ಗಮನಾರ್ಹ ಸ್ಕೋರ್‌ನೊಂದಿಗೆ ಚಿನ್ನ ಗೆದ್ದು ಏಷ್ಯನ್ ಪ್ಯಾರಾ ಗೇಮ್ಸ್ ದಾಖಲೆ ಬರೆದಿದ್ದಾರೆ.
ಡಬಲ್ ಧಮಾಕ: ಶಾಟ್ ಪುಟ್ನಲ್ಲಿ ಭಾರತದ ಪ್ಯಾರಾ ಅಥ್ಲೀಟಿಗಳು ಚಿನ್ನ ಮತ್ತು ಕಂಚಿನ ಪದಕವನ್ನು ಜಯಿಸಿದ್ದಾರೆ. ಪುರುಷರ ಶಾಟ್ ಪುಟ್-ಎಫ್46ನಲ್ಲಿ ಸಚಿನ್ ಖಿಲಾರಿ 16.03 ಮೀ ಬೃಹತ್ ಎಸೆತದೊಂದಿಗೆ ಚಿನ್ನ ಗೆಲ್ಲುವ ಮೂಲಕ ದಾಖಲೆ ಬರೆದಿದ್ದಾರೆ. ಮತ್ತೊಂದೆಡೆ ಇದೇ ವಿಭಾಗದಲ್ಲಿ ರೋಹಿತ್ ಕುಮಾರ್ 14.56 ಮೀ ಎಸೆತದೊಂದಿಗೆ ಕಂಚಿನ ಪದಕಕ್ಕೆ ಕೊರಳೊಡ್ಡಿದರು.
ಮಹಿಳಾ ಶಾಟ್ಪುಟ್ನಲ್ಲಿ ಬೆಳ್ಳಿ:ಮಹಿಳಾ ಶಾಟ್ ಪುಟ್ ಎಫ್34 ವಿಭಾಗದಲ್ಲಿ ಭಾಗ್ಯಶ್ರೀ ಮಾಧವ್ರಾವ್ ಜಾಧವ್ 7.54 ಮೀ ಎಸೆತದೊಂದಿಗೆ ಬೆಳ್ಳಿ ಪದಕಕ್ಕೆ ಮುತ್ತಿಕ್ಕಿದ್ದಾರೆ.
ಆರ್ಚರಿಯಲ್ಲಿ ಕಂಚು:ಆರ್ಚರಿ ಪುರುಷರ ಡಬಲ್ಸ್ - ಡಬ್ಲೂ1 ಈವೆಂಟ್ನಲ್ಲಿ ಭಾರತದ ಆರ್ಚರಿಗಳಾದ ಆದಿಲ್ ಮೊಹ್ಮದ್ ಮತ್ತು ನವೀನ್ ದಲಾಲ್ ಜೋಡಿ ಕಂಚಿನ ಪದಕವನ್ನು ಗೆದ್ದುಕೊಂಡಿದೆ.
ಬ್ಯಾಟ್ಮಿಂಟನ್ನಲ್ಲಿ ಕಂಚು:ಪುರುಷರ ಬ್ಯಾಡ್ಮಿಂಟನ್ ಸಿಂಗಲ್ಸ್ SL - 4ನಲ್ಲಿ ಸುಕಾಂತ್ ಕದಮ್ ಅತ್ಯುತ್ತಮ ಪ್ರದರ್ಶನದೊಂದಿಗೆ ಕಂಚಿನ ಪದಕವನ್ನು ಪಡೆದರು. ಮತ್ತೊಂದೆಡೆ ಮಹಿಳೆಯರ ಸಿಂಗಲ್ಸ್ ಪ್ಯಾರಾ ಬ್ಯಾಡ್ಮಿಂಟನ್ - ಎಸ್ಹೆಚ್ - 6 ಈವೆಂಟ್ನಲ್ಲಿ ನಿತ್ಯಶ್ರೀ ಕಂಚಿನ ಪದಕ ಗೆದ್ದಿದ್ದಾರೆ.
100ಮೀ ಓಟದಲ್ಲಿ ಕಂಚು:ಪುರುಷರ 100ಮೀ ಟಿ-37 ಓಟದ ಸ್ಫರ್ಧೆಯಲ್ಲಿ ಶ್ರೇಯಾಂಶ್ ತ್ರಿವೇದಿ ಕಂಚು ಗೆದ್ದಿದ್ದು, 12.24 ಸೆಕೆಂಡ್ಗಳಲ್ಲಿ ಗುರಿ ತಲುಪಿದ್ದಾರೆ. ಮತ್ತೊಂದೆಡೆ ಪುರುಷರ ಟಿ-35 100 ಮೀ ಓಟದ ಸ್ಪರ್ಧೆಯಲ್ಲಿ ನಾರಾಯಣ ಠಾಕೂರ್ ಕಂಚಿನ ಪದಕ ಜಯಿಸಿದರು. 14.37 ಸೆಕೆಂಡ್ನಲ್ಲಿ 100 ಮೀ ತಲುಪುವ ಮೂಲಕ ಈ ಸಾಧನೆ ಮಾಡಿದರು
ಹಳೆ ದಾಖಲೆ ಉಡೀಸ್: ಪ್ಯಾರಾ ಏಷ್ಯನ್ ಗೇಮ್ಸ್ 2023ರ ನಾಲ್ಕನೇ ದಿನಕ್ಕೆ ಭಾರತ ಒಟ್ಟು 74 ಪದಕಗಳನ್ನು ಗೆಲ್ಲುವ ಮೂಲಕ ಹಳೆ ದಾಖಲೆಯನ್ನು ಪುಡಿಗಟ್ಟಿದೆ. ಇದರಲ್ಲಿ 17 ಚಿನ್ನ, 22 ಬೆಳ್ಳಿ ಮತ್ತು 33 ಕಂಚಿನ ಪದಕಗಳು ಸೇರಿವೆ. ಏಷ್ಯನ್ ಪ್ಯಾರಾ ಗೇಮ್ಸ್ 2023 ರ ಪಾಯಿಂಟ್ ಪಟ್ಟಿಯಲ್ಲಿ ಭಾರತ 5ನೇ ಸ್ಥಾನಕ್ಕೇರಿದೆ.
2018ರಲ್ಲಿ ನಡೆದ ಪ್ಯಾರಾ ಏಷ್ಯನ್ ಗೇಮ್ಸ್ನಲ್ಲಿ ಭಾರತ ಒಟ್ಟು 72 ಪದಕಗಳನ್ನು ಜಯಿಸಿತ್ತು. ಇದರಲ್ಲಿ 15 ಚಿನ್ನ, 24 ಬೆಳ್ಳಿ, 33 ಕಂಚು ಒಳಗೊಂಡಿದ್ದವು. ಅಂಕಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿತ್ತು.
ಇದನ್ನೂ ಓದಿ:ಪ್ಯಾರಾ ಏಷ್ಯನ್ ಗೇಮ್ಸ್, 3ನೇ ದಿನ: 30 ಪದಕ ಬೇಟೆಯಾಡಿದ ಭಾರತೀಯ ಅಥ್ಲೀಟ್ಗಳು
