ಹ್ಯಾಂಗ್‌ಝೌ (ಚೀನಾ): ಇಲ್ಲಿ ನಡೆಯುತ್ತಿರುವ 4ನೇ ಪ್ಯಾರಾ ಏಷ್ಯನ್ ಗೇಮ್ಸ್ನಲ್ಲಿ ಭಾರತ ಹಳೆಯ ದಾಖಲೆಯನ್ನು ಮೀರಿ ಮುಂದುವರೆಯುತ್ತಿದೆ. ಕೂಟದ 5ನೇ ದಿನವಾದ ಇಂದು (ಶುಕ್ರವಾರ) ದೇಶದ ಸ್ಪರ್ಧಿಗಳಿಂದ ಪದಕ ಬೇಟೆ ಸಾಗುತ್ತಿದೆ. ಶಟ್ಲರ್ಗಳು ಅದ್ಭುತ ಪ್ರದರ್ಶನ ನೀಡುತ್ತಿದ್ದಾರೆ. ಪುರುಷರ ಡಬಲ್ಸ್ ನಿತೇಶ್ ಕುಮಾರ್, ತರುಣ್ ಮತ್ತು ಸಿಂಗಲ್ಸ್ನಲ್ಲಿ ಪ್ರಮೋದ್ ಭಗತ್, ಸುಹಾಸ್ ಯತಿರಾಜ್ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ.
ಪುರುಷರ ಡಬಲ್ಸ್ ಎಸ್‌ಎಲ್ 3-ಎಸ್‌ಎಲ್ 4 ಸ್ಪರ್ಧೆಯಲ್ಲಿ ನಿತೇಶ್ ಕುಮಾರ್ ಮತ್ತು ತರುಣ್ ಜೋಡಿ ಚಿನ್ನ ಜಯಿಸಿತು. ಮೊದಲ ಸೆಟ್ನಲ್ಲಿ ಇಂಡೋನೇಷ್ಯಾದ ಫ್ರೆಡಿ ಮತ್ತು ದ್ವಿಯೊಕೊ ಜೋಡಿಯ ವಿರುದ್ಧ ಪಾಯಿಂಟ್ಸ್ ಪಡೆಯಲು ಹೆಣಗಾಡಿದರು. ಪಂದ್ಯ ಆರಂಭವಾಗಿ ಕಣ್ಣು ಮಿಟುಕಿಸುವ ಸಮಯದಲ್ಲೇ ಮೊದಲ ಸೆಟ್ ಅನ್ನು 21-9ರಿಂದ ಸೋತರು. ಆದರೆ ನಂತರದ ಎರಡನೇ ಸೆಟ್‌ಗಳಲ್ಲಿ ಕಮ್ಬ್ಯಾಕ್ ಮಾಡಿ 21-19 ಮತ್ತು 22-20 ಅಂತರದಲ್ಲಿ ಪಂದ್ಯ ಗೆದ್ದು ಸ್ವರ್ಣ ತಮ್ಮದಾಗಿಸಿಕೊಂಡರು.
ಪ್ರಮೋದ್ ಭಗತ್ಗೆ ಚಿನ್ನ: ಪುರುಷರ ಸಿಂಗಲ್ಸ್ ಎಸ್‌ಎಲ್ 3 ಸ್ಪರ್ಧೆಯಲ್ಲಿ ಪ್ರಮೋದ್ ಭಗತ್ ಇನ್ನೋರ್ವ ಭಾರತೀಯ ನಿತೇಶ್ ಕುಮಾರ್ ಅವರನ್ನು 2-1 ರಿಂದ ಮಣಿಸಿ ಚಿನ್ನಕ್ಕೆ ಮುತ್ತಿಕ್ಕಿದರು. ಪ್ರಮೋದ್ ಮೊದಲ ಸೆಟ್ನಲ್ಲಿ 22-20ರ ಅಂತರದ ಪ್ರಯಾಸದ ಗೆಲುವು ಸಾಧಿಸಿದರು. ನಿತೇಶ್ ಎರಡನೇ ಸೆಟ್ನಲ್ಲಿ ಪುಟಿದೇಳುವ ಮೂಲಕ 21-18 ಸ್ಕೋರ್‌ಲೈನ್‌ನೊಂದಿಗೆ ಪಂದ್ಯವನ್ನು ಸಮಸ್ಥಿತಿಗೆ ತಂದರು. ಪ್ರಮೋದ್ ನಿರ್ಣಾಯಕ ಸೆಟ್ನಲ್ಲಿ 21-19 ಗೆಲುವಿನೊಂದಿಗೆ ಭಾರತಕ್ಕೆ ಮತ್ತೊಂದು ಚಿನ್ನದ ಪದಕ ಗೆಲ್ಲುವಲ್ಲಿ ಯಶಸ್ವಿಯಾದರು. ನಿತೇಶ್ ಕುಮಾರ್ ಬೆಳ್ಳಿ ಪದಕಕ್ಕೆ ಕೊರಳೊಡ್ಡಿದರು.