ಹ್ಯಾಂಗ್‌ಝೌ (ಚೀನಾ): ಇಲ್ಲಿ ನಡೆಯುತ್ತಿರುವ ಏಷ್ಯನ್ ಗೇಮ್ಸ್ ಟೇಬಲ್ ಟೆನ್ನಿಸ್ ಸ್ಪರ್ಧೆಗಳಲ್ಲಿ ಭಾರತದ ಪುರುಷ ಮತ್ತು ಮಹಿಳಾ ತಂಡಗಳು ತಮ್ಮ ಗುಂಪಿನಲ್ಲಿನ ಪ್ರಾಥಮಿಕ ಸುತ್ತಿನ ಪಂದ್ಯಗಳಲ್ಲಿ ಗೆಲುವಿನ ಓಟವನ್ನು ಅಜೇಯವಾಗಿ ಮುಂದುವರಿಸಿದ್ದು, ಸತತ ಗೆಲುವಿನಿಂದ ಪ್ರಿ ಕ್ವಾರ್ಟರ್ ಫೈನಲ್‌ಗೆ ಲಗ್ಗೆ ಇಟ್ಟಿವೆ. ಗೊಂಗ್ಶು ಕೆನಾಲ್ ಸ್ಪೋರ್ಟ್ಸ್ ಪಾರ್ಕ್ ಜಿಮ್ನಾಷಿಯಂನಲ್ಲಿ ಇಂದು (ಶನಿವಾರ) ನಡೆದ ಎಫ್ ಗುಂಪಿನ ಪ್ರಾಥಮಿಕ ಪಂದ್ಯದಲ್ಲಿ ಭಾರತದ ಪುರುಷರು ತಜಕಿಸ್ತಾನವನ್ನು 3-0 ಗೋಲುಗಳಿಂದ ಸೋಲಿಸಿದರೆ, ಮಹಿಳೆಯರು ನೆರೆಯ ನೇಪಾಳವನ್ನು 3-0 ಅಂತರದಿಂದ ಸೋಲಿಸಿದರು.
ಕಿರಿಯ ಆಟಗಾರರಿಗೆ ಅವಕಾಶ ನೀಡಿದರೂ, ಭಾರತೀಯರು ಎಲ್ಲಾ ಮೂರು ಪಂದ್ಯಗಳನ್ನು ನೇರ ಗೇಮ್‌ಗಳಲ್ಲಿ ಗೆದ್ದರು. ಮಾನವ್ ಠಕ್ಕರ್ 11-8, 11-5, 11-8 ರಿಂದ ಅಫ್ಜಲ್‌ಖೋನ್ ಮಹ್ಮುದೋವ್ ಅವರನ್ನು ಮಣಿಸಿದರೆ, ಮನುಷ್ ಶಾ 13-11, 11-7, 11-5 ರಿಂದ ಉಬೈದುಲ್ಲೊ ಸಿಜ್ಲ್ಟೋನೊವ್ ಅವರನ್ನು ಮಣಿಸಿದರು. ಮಾನವ್ ಠಕ್ಕರ್ ಸ್ವಲ್ಪ ಪ್ರಯಾಸದ ಗೆಲುವು ಪಡೆದರು ಆದರೆ, ಮನುಷ್ ಶಾ ಎದುರಾಳಿಗೆ ಹೆಚ್ಚು ಅವಕಾಶಗಳನ್ನು ಕೊಡದೇ ಗುರಿ ಮುಟ್ಟಿದರು.
ಹರ್ಮೀತ್ ದೇಸಾಯಿ 11-1, 11-3, 11-5 ಅಂತರದಿಂದ ಭಾರತಕ್ಕೆ ಜಯ ತಂದುಕೊಟ್ಟರು. ಟಾಪ್ ತಾರೆ ಮಣಿಕಾ ಬಾತ್ರಾ ವಿಶ್ರಾಂತಿ ಪಡೆದರೂ ಮಹಿಳಾ ತಂಡವೂ ಸುಲಭ ಜಯ ದಾಖಲಿಸಿತು. ದಿಯಾ ಚಿತಾಲೆ 11-1, 11-6, 11-8 ರಿಂದ ಸಿಕ್ಕ ಶ್ರೇಷ್ಠಾ ಅವರನ್ನು ಸೋಲಿಸಿದರೆ, ಅಹಿಕಾ ಮುಖರ್ಜಿ 11-3, 11-7, 11-2 ರಿಂದ ನಬಿತಾ ಶ್ರೇಷ್ಠಾ ಅವರನ್ನು ಮನಿಸಿದರು. ಮೂರನೇ ಪಂದ್ಯದಲ್ಲಿ ಸುತೀರ್ಥ ಮುಖರ್ಜಿ ಅವರು ಇವಾನಾ ಮಗರ್ ಥಾಪಾ ಅವರನ್ನು 11-1, 11-5, 11-2 ಸೆಟ್‌ಗಳಿಂದ ಸೋಲಿಸಿ ಭಾರತಕ್ಕೆ ಜಯ ತಂದುಕೊಟ್ಟರು.
ಭಾನುವಾರ ನಡೆಯಲಿರುವ ಪ್ರೀ ಕ್ವಾರ್ಟರ್‌ಫೈನಲ್‌ನಲ್ಲಿ ಭಾರತ ಪುರುಷರು ಕಝಾಕಿಸ್ತಾನ್ ವಿರುದ್ಧ ಆಡಲಿದ್ದು, ಭಾನುವಾರ ನಡೆಯಲಿರುವ ಮತ್ತೊಂದು ಸುತ್ತಿನ 16ರ ಪಂದ್ಯದಲ್ಲಿ ಮಹಿಳೆಯರು ಥಾಯ್ಲೆಂಡ್‌ನ್ನು ಎದುರಿಸಲಿದ್ದಾರೆ.