Asian Games: ಪುರುಷರ ಕಬಡ್ಡಿಯಲ್ಲಿ ಭಾರತಕ್ಕೆ 7ನೇ ಬಾರಿ ಚಿನ್ನ.. ಮಹಿಳಾ ಹಾಕಿ ತಂಡಕ್ಕೆ ಕಂಚು

ಏಷ್ಯನ್​ ಗೇಮ್ಸ್​ನಲ್ಲಿ ಪುರುಷರ ಕಬಡ್ಡಿಯಲ್ಲಿ ಭಾರತ ಚಿನ್ನ ಗೆದ್ದರೆ, ಮಹಿಳಾ ಹಾಕಿ ತಂಡ ಕಂಚಿಗೆ ಮುತ್ತಿಕ್ಕಿದೆ.

ಹ್ಯಾಂಗ್‌ಝೌ:ಏಷ್ಯನ್​ ಗೇಮ್ಸ್​ನಲ್ಲಿ ಭಾರತ ಚಿನ್ನದ ಬೇಟೆ ಮುಂದುವರಿದಿದೆ. ಪುರುಷರ ಕಬಡ್ಡಿಯಲ್ಲಿ ಭಾರತ ತಂಡ ಇರಾನ್‌ ವಿರುದ್ಧ ತೀವ್ರ ಹೋರಾಟ ನಡೆಸಿ ಚಿನ್ನದ ಪದಕ ಗೆದ್ದುಕೊಂಡಿದೆ. ಇತ್ತ ಮಹಿಳೆಯರ ಹಾಕಿ ಪಂದ್ಯದಲ್ಲಿ ಜಪಾನ್​ ತಂಡವನ್ನು ಸೋಲಿಸಿ ಕಂಚಿಗೆ ಕೊರಳೊಡ್ಡಿದೆ.

ಕಬಡ್ಡಿಯ ಪವರ್‌ಹೌಸ್‌ಗಳಾದ ಭಾರತ ಮತ್ತು ಇರಾನ್ ನಡುವಿನ ಪಂದ್ಯ ರೋಚಕವಾಗಿ ಕೂಡಿರಲಿದೆ ಎಂದೇ ಭಾವಿಸಲಾಗಿತ್ತು. ಆದರೆ, ಪಂದ್ಯದ ಕೊನೆಯಲ್ಲಿ ವಿವಾದಿತ ತೀರ್ಪುಗಳಿಂದ ನಾಟಕೀಯವಾಗಿ ಪಂದ್ಯ ಮುಕ್ತಾಯವಾಯಿತು.

ವಿವಾದವೇನು?:ಪಂದ್ಯ ಮುಗಿಯಲು ಒಂದು ನಿಮಿಷ ಬಾಕಿ ಇದ್ದಾಗ ಭಾರತಕ್ಕೆ ಅಂಪೈರ್​ಗಳು ನೀಡಿದ 3 ಅಂಕಗಳು ಇರಾನ್​ ತಂಡವನ್ನು ಕೆರಳಿಸಿತು. ತೀರ್ಪುಗಾರರ ನಿರ್ಧಾರವನ್ನು ಇರಾನ್ ಪ್ರತಿಭಟಿಸಿತು. ಭಾರತ ತಂಡದ ಪವನ್ ಸೆಹ್ರಾವತ್ ರೇಡ್​ ವೇಳೆ ಗೊಂದಲ ಉಂಟಾಯಿತು. ಪವನ್​ ಟಚ್​ ಲೈನ್​ ಮುಟ್ಟಿಲ್ಲ ಎಂದು ಇರಾನ್​ ವಾದಿಸಿತು. ನಿಯಮಗಳ ಪ್ರಕಾರ, ಎರಡೂ ತಂಡಗಳಿಗೆ ಮೊದಲು ತಲಾ 1 ಅಂಕ ನೀಡಲಾಯಿತು.

ಆದರೆ, ಭಾರತ ಇದನ್ನು ಮರುಪ್ರಶ್ನಿಸಿತು. ಪವನ್​ ಕೋರ್ಟ್​ನಿಂದ ಹೊರಬೀಳುವ ಮುನ್ನ ಲೈನ್​ ಮುಟ್ಟಿದ್ದಾರೆ ಎಂದು ವಾದಿಸಿ 4 ಅಂಕಕ್ಕೆ ಬೇಡಿಕೆ ಇಟ್ಟಿತು. ಇದು ಮತ್ತಷ್ಟು ಗೊಂದಲು ಉಂಟು ಮಾಡಿತು. ಅಂತಾರಾಷ್ಟ್ರೀಯ ಕಬಡ್ಡಿ ಫೆಡರೇಷನ್ ನಿಯಮ 21ರ ಪ್ರಕಾರ ಪವನ್ ದಾಳಿಗೆ ಭಾರತ 3 ಅಂಕಗಳನ್ನು ಪಡೆಯಿತು. ಇದನ್ನೂ ವಿರೋಧಿಸಿದ ಇರಾನ್ ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಬಳಸಲಾದ ಹೊಸ ನಿಯಮದಂತೆ ಎರಡು ತಂಡಗಳಿಗೆ ತಲಾ ಒಂದು ಅಂಕ ನೀಡಬೇಕು ಎಂದು ವಾದಿಸಿತು.

ಕೊನೆಯಲ್ಲಿ ವಿಡಿಯೋ ಪರಿಶೀಲನೆಯ ನಂತರ ಭಾರತಕ್ಕೆ 3 ಅಂಕಗಳನ್ನು ನೀಡಲಾಯಿತು. ತೀವ್ರ ಗೊಂದಲದ ನಂತರ ಭಾರತ ಕೊನೆಯಲ್ಲಿ 33-29 ಅಂಕಗಳಲ್ಲಿ ಗೆಲುವು ಸಾಧಿಸಿತು.

ಕಬಡ್ಡಿಯಲ್ಲಿ ಡಬಲ್​ ಚಿನ್ನ:ಪುರುಷರ ತಂಡ ಚಿನ್ನದ ಸಾಧನೆಗೂ ಮೊದಲು ಮಹಿಳಾ ಕಬಡ್ಡಿ ತಂಡ ಫೈನಲ್‌ನಲ್ಲಿ ಚೈನೀಸ್ ತೈಪೆ ವಿರುದ್ಧ ಗೆದ್ದು ಚಿನ್ನದ ಪದಕಕ್ಕೆ ಮುತ್ತಿಟ್ಟಿದೆ. ಭಾರತ ಮಹಿಳೆಯರು 26-25 ಅಂಕಗಳಿಂದ ಚೀನೀ ಮಹಿಳೆಯರನ್ನು ಸೋಲಿಸಿದ್ದರು.

8 ರಲ್ಲಿ 7 ಚಿನ್ನ:ಏಷ್ಯನ್ ಗೇಮ್ಸ್‌ನಲ್ಲಿ ಕಬಡ್ಡಿ ಆಟವನ್ನು ಸೇರ್ಪಡೆ ಮಾಡಿದ 8 ಆವೃತ್ತಿಗಳಲ್ಲಿ ಭಾರತ 7 ಬಾರಿ ಚಿನ್ನದ ಪದಕವನ್ನು ಗೆದ್ದುಕೊಂಡಿದೆ. 2019 ರಲ್ಲಿ ಜಕಾರ್ತದಲ್ಲಿ ಇರಾನ್​ ತಂಡದ ವಿರುದ್ಧ ಮಾತ್ರ ಸೋಲು ಕಂಡು, ಬೆಳ್ಳಿ ಪಡೆದುಕೊಂಡಿತ್ತು.

ಹಾಕಿಯಲ್ಲಿ ಕಂಚು:ಮತ್ತೊಂದೆಡೆ ಹಾಕಿಯಲ್ಲಿ ಭಾರತ ಮಹಿಳಾ ಹಾಕಿ ತಂಡ, ಜಪಾನ್‌ ತಂಡವನ್ನು ಸೋಲಿಸಿ ಕಂಚು ಗೆದ್ದುಕೊಂಡಿತು. ಮೊದಲ ಕ್ವಾರ್ಟರ್‌ನಲ್ಲಿ ದೀಪಿಕಾ ಗೋಲು ಬಾರಿಸಿ ತಂಡಕ್ಕೆ 1-0 ಅಂತರದ ಮುನ್ನಡೆ ತಂದುಕೊಟ್ಟರು. ಹಲವು ಪ್ರಯತ್ನಗಳ ಬಳಿಕ ಜಪಾನ್​ನ ಯೂರಿ ನಾಗೈ ಅದ್ಭುತ ಹಿಟ್‌ನಿಂದ ಪೆನಾಲ್ಟಿ ಕಾರ್ನರ್ ಅವಕಾಶ ಸಿಕ್ಕಿತು. ಅದನ್ನು ಬಳಸಿಕೊಂಡ ತಂಡ ಗೋಲು ಬಾರಿಸಿ 1-1 ರಲ್ಲಿ ಸಮಬಲ ಸಾಧಿಸಿತು.

ದ್ವಿತೀಯಾರ್ಧದಲ್ಲೂ ಪಂದ್ಯ ರೋಚಕವಾಗಿ ಸಾಗಿತು. ಸಮ ಅಂಕ ಗಳಿಸಿದ್ದ ಇತ್ತಂಡಗಳು ಗೋಲು ಬಾರಿಸಲು ಹಲವು ಪ್ರಯತ್ನ ಮಾಡಿದರು. ಪಂದ್ಯ ಮುಗಿಯಲು 10 ನಿಮಿಷಗಳಿರುವಾಗ ಸುಶೀಲಾ ಚಾನು ಗೋಲು ಬಾರಿಸಿ 2-1 ರಲ್ಲಿ ಭಾರತಕ್ಕೆ ಗೆಲುವು ತಂದರು. ಅಂತಿಮವಾಗಿ ಭಾರತ ಮಹಿಳಾ ಹಾಕಿ ತಂಡವು ಕಂಚಿನ ಪದಕದೊಂದಿಗೆ ಏಷ್ಯನ್ ಗೇಮ್ಸ್‌ ಪಯಣವನ್ನು ಮುಗಿಸಿತು.

ಇದನ್ನೂ ಓದಿ:ಏಷ್ಯನ್ ಗೇಮ್ಸ್​ನಲ್ಲಿ ಭಾರತದ ಪದಕಗಳ ಶತಕದ ಸಾಧನೆ... ಕಬಡ್ಡಿಯಲ್ಲಿ ಭಾರತ ಮಹಿಳಾ ತಂಡಕ್ಕೆ ಚಿನ್ನದ ಗರಿ..