ನಾಗ್ಪುರ (ಮಹಾರಾಷ್ಟ್ರ) :ಸ್ಪಿನ್‌ದ್ವಯರಾದ ರವೀಂದ್ರ ಜಡೇಜಾ ಮತ್ತು ಆರ್.ಅಶ್ವಿನ್ರ ಅದ್ಭುತ ಪ್ರದರ್ಶನದಿಂದ 4 ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಭಾರತ ಮೊದಲ ಟೆಸ್ಟ್ನಲ್ಲಿ ಆಸ್ಟ್ರೇಲಿಯಾವನ್ನು ಇನಿಂಗ್ಸ್ ಹಾಗೂ 132 ರನ್ಗಳಿಂದ ಬಗ್ಗುಬಡಿದಿದೆ. ಬಾರ್ಡರ್-ಗವಾಸ್ಕರ್ ಟ್ರೋಫಿಯಲ್ಲಿ 1-0 ಮುನ್ನಡೆ ಪಡೆದಿದೆ. ಇದು ಟೆಸ್ಟ್ ವಿಶ್ವ ಚಾಂಪಿಯನ್ಶಿಪ್ ಫೈನಲ್ ಮಾರ್ಗವನ್ನು ಸುಲಭಗೊಳಿಸಿದೆ.
ವಿಶ್ವ ಚಾಂಪಿಯನ್ಶಿಪ್ ಫೈನಲ್ ಪಟ್ಟಿಯಲ್ಲಿ ಭಾರತ ತಂಡ ಪ್ರಸ್ತುತ 2ನೇ ಸ್ಥಾನದಲ್ಲಿದ್ದು ಆಸ್ಟ್ರೇಲಿಯಾ ಅಗ್ರಸ್ಥಾನಿಯಾಗಿದೆ. ಈವರೆಗೂ ಯಾವ ತಂಡಕ್ಕೂ ಫೈನಲ್ ಟಿಕೆಟ್ ಖಚಿತವಾಗಿಲ್ಲವಾದರೂ ಆಸೀಸ್ ಮತ್ತು ಭಾರತ ಫೈನಲ್ ಸೇರುವ ಸಾಧ್ಯತೆಗಳಿವೆ. ಬಾರ್ಡರ್-ಗವಾಸ್ಕರ್ ಟೆಸ್ಟ್ ಸರಣಿಯಲ್ಲಿ ಆಸ್ಟ್ರೇಲಿಯಾ ಒಂದು ಪಂದ್ಯ ಗೆದ್ದಲ್ಲಿ ನೇರವಾಗಿ ಅಂತಿಮ ಹಣಾಹಣಿಗೆ ತಲುಪಲಿದೆ.
ಸರಣಿ ಆರಂಭಕ್ಕೂ ಮೊದಲು ಭಾರತ ಡಬ್ಲ್ಯೂಟಿಸಿ ಪಟ್ಟಿಯಲ್ಲಿ ಶೇ.58.93 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಆಸೀಸ್ ಟೆಸ್ಟ್ ಗೆಲುವಿನ ಬಳಿಕ ಸ್ಥಾನದಲ್ಲಿ ಯಾವುದೇ ಬದಲಾವಣೆ ಆಗಿಲ್ಲವಾದರೂ, ಶೇ.61.67 ಪಾಯಿಂಟ್ಸ್ ಏರಿಕೆ ಕಂಡಿತು. ಅದೇ ರೀತಿ ನಾಗ್ಪುರದಲ್ಲಿ ಸೋಲಿನ ನಂತರ ಆಸ್ಟ್ರೇಲಿಯಾ ಅಂಕ ಕಳೆದುಕೊಂಡಿತು. ಶೇ.75.56 ರಿಂದ ಶೇ.70.83 ಕ್ಕೆ ಇಳಿಕೆ ಕಂಡಿದೆ. ಪಾಯಿಂಟ್ಸ್ ಕಳೆದುಕೊಂಡರೂ ಅಗ್ರಸ್ಥಾನ ಅಬಾಧಿತವಾಗಿದೆ.
ಭಾರತಕ್ಕೆ ಬೇಕಿದೆ ಮತ್ತೆರಡು ಗೆಲುವು:ಭಾರತ ಟೆಸ್ಟ್ ಚಾಂಪಿಯನ್ ಫೈನಲ್ ತಲುಪಲು ಉಳಿದಿರುವ ಮೂರು ಪಂದ್ಯಗಳಲ್ಲಿ ಕನಿಷ್ಠ ಎರಡನ್ನು ಗೆಲ್ಲಬೇಕಿದೆ. ಆಸ್ಟ್ರೇಲಿಯಾ ಒಂದು ಪಂದ್ಯದಲ್ಲಿ ಗೆಲುವು ಅಥವಾ ಡ್ರಾ ಸಾಧಿಸಿದರೂ ನೇರವಾಗಿ ಫೈನಲ್ ಪ್ರವೇಶಿಸಲಿದೆ. ಕಳೆದ ಬಾರಿ ನ್ಯೂಜಿಲೆಂಡ್‌ ಮತ್ತು ಭಾರತ ಫೈನಲ್ ಪಂದ್ಯವಾಡಿದ್ದವು. ಅದರಲ್ಲಿ ನ್ಯೂಜಿಲ್ಯಾಂಡ್ ಗೆಲುವು ಸಾಧಿಸಿ ಪ್ರಶಸ್ತಿ ಎತ್ತಿ ಹಿಡಿದಿತ್ತು. ಸತತ ಎರಡನೇ ಬಾರಿಗೆ ಫೈನಲ್ ಪ್ರವೇಶಿಸುವ ಗುರಿಯಲ್ಲಿರುವ ಭಾರತ ಗೆಲ್ಲಬೇಕಿದೆ.
ಇದಲ್ಲದೇ, ಪಟ್ಟಿಯಲ್ಲಿ ಶ್ರೀಲಂಕಾ ಶೇ.53.33 ಅಂಕ, ದಕ್ಷಿಣ ಆಫ್ರಿಕಾ ಶೇ.48.72 ರೊಂದಿಗೆ ಕ್ರಮವಾಗಿ 3, 4 ನೇ ಸ್ಥಾನದಲ್ಲಿವೆ. ಭಾರತ- ಆಸ್ಟ್ರೇಲಿಯಾ ಹೊರತಾಗಿ ಉಳಿದ ತಂಡಗಳಿಗೆ ಹೆಚ್ಚಿನ ಅವಕಾಶ ಇಲ್ಲವಾದರೂ, ಗೆಲುವಿನ ಪ್ರಮಾಣ ಏರುಪೇರಾದಲ್ಲಿ ಶ್ರೀಲಂಕಾ ಫೈನಲ್ಗೆ ಬರುವ ಸಾಧ್ಯತೆ ಇದೆ. ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್ ಪಂದ್ಯ ಜೂನ್ 7 ರಿಂದ ಓವಲ್‌ನಲ್ಲಿ ನಡೆಯಲಿದೆ.
ನಾಗ್ಪುರದಲ್ಲಿ ಭಾರತ ಏಕಚಕ್ರಾಧಿಪತ್ಯ:ಇನ್ನೊಂದೆಡೆ, ಭಾರತ ತಂಡ ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಸಂಪೂರ್ಣ ಹಿಡಿತ ಸಾಧಿಸಿ ಮೂರೇ ದಿನದಲ್ಲಿ ಪಂದ್ಯವನ್ನು ವಶಪಡಿಸಿಕೊಂಡಿತು. ಸ್ಟಾರ್ ಆಲ್ರೌಂಡರ್ಗಳಾದ ರವೀಂದ್ರ ಜಡೇಜಾ, ಆರ್. ಅಶ್ವಿನ್ ಮತ್ತು ನಾಯಕ ರೋಹಿತ್ ಶರ್ಮಾರ ಅದ್ಭುತ ಪ್ರದರ್ಶನದಿಂದಾಗಿ ಇನಿಂಗ್ಸ್ ಜೊತೆಗೆ 132 ರನ್ಗಳ ದೊಡ್ಡ ಜಯ ಪಡೆಯಿತು.
ಮೊದಲ ಇನಿಂಗ್ಸ್ನಲ್ಲಿ ರವೀಂದ್ರ ಜಡೇಜಾ 5 ವಿಕೆಟ್ ಗೊಂಚಲು ಮತ್ತು ಬ್ಯಾಟಿಂಗ್ನಲ್ಲಿ ಮಿಂಚಿ 70 ರನ್ ಮಾಡಿದ್ದರು. ಭಾರತದ ಇನಿಂಗ್ಸ್ನಲ್ಲಿ ನಾಯಕ ರೋಹಿತ್ ಶರ್ಮಾ ಭರ್ಜರಿ ಶತಕ(120) ಬಾರಿಸಿದರು. 223 ರನ್ಗಳ ಹಿನ್ನಡೆಯೊಂದಿಗೆ 2ನೇ ಇನಿಂಗ್ಸ್ ಆರಂಭಿಸಿದ ಆಸೀಸ್ ಮೂರನೇ ದಿನದ 2ನೇ ಅವಧಿಯ 2 ಗಂಟೆಗಳಲ್ಲಿ ಸರ್ವಪತನ ಕಂಡಿತು. ಸ್ಪಿನ್ ಜಾಲ ಬೀಸಿದ ಅಶ್ವಿನ್ 5 ಪ್ರಮುಖ ವಿಕೆಟ್ ಪಡೆದರು. ರವೀಂದ್ರ ಜಡೇಜಾ ಮೂರು ವಿಕೆಟ್ ಕಬಳಿಸಿ ಪಂದ್ಯಕ್ಕೆ ಅಂತ್ಯ ಹಾಡಿದರು.
ಸ್ಪಿನ್ ಸ್ನೇಹಿ ಪಿಚ್:ನಾಗ್ಪುರದ ವಿದರ್ಭ ಕ್ರಿಕೆಟ್ ಮೈದಾನ ಸಂಪೂರ್ಣವಾಗಿ ಸ್ಪಿನ್ ಸ್ನೇಹಿಯಾಗಿತ್ತು. ಮೂರು ಇನಿಂಗ್ಸ್ಗಳ 30 ವಿಕೆಟ್ಗಳಲ್ಲಿ 24 ಸ್ಪಿನ್ನರ್ಗಳ ಪಾಲಾದವು. ಅದರಲ್ಲಿ ರವೀಂದ್ರ ಜಡೇಜಾ 7, ಅಶ್ವಿನ್ 8, ಆಸೀಸ್ನ ಟಾಡ್ ಮೊರ್ಫಿ 7, ನಾಥನ್ ಲಿನ್, ಅಕ್ಷರ್ ಪಟೇಲ್ ತಲಾ 1 ವಿಕೆಟ್ ಪಡೆದರು. ಸರಣಿಯಲ್ಲಿ 1-0 ಮುನ್ನಡೆ ಹೊಂದಿದ್ದು, ಫೆಬ್ರವರಿ 17-21 ರವರೆಗೆ ದೆಹಲಿಯ ಫಿರೋಜ್ ಶಾ ಕೋಟ್ಲಾ ಮೈದಾನದಲ್ಲಿ ಎರಡನೇ ಪಂದ್ಯ ನಡೆಯಲಿದೆ.
ಇದನ್ನೂ ಓದಿ:ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದ ಜಡ್ಡುಗೆ 25 ಶೇಕಡಾ ದಂಡ ವಿಧಿಸಿದ ಐಸಿಸಿ: ಜಡೇಜಾ ಮಾಡಿದ ಆ ತಪ್ಪೇನು?
