ಹಿಟ್​ಮ್ಯಾನ್​ ರೋಹಿತ್ ಶರ್ಮಾ ಹೆಸರಿನಲ್ಲಿ 'ನೂರಾರು' ದಾಖಲೆ: ಏನೆಲ್ಲಾ ಇಲ್ಲಿ ನೋಡಿ..

ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ವಿಶ್ವಕಪ್​ನಲ್ಲಿ ಅಫ್ಘಾನಿಸ್ತಾನ ವಿರುದ್ಧದ ಪಂದ್ಯದಲ್ಲಿ 'ಶತಕಗಳ ದಾಖಲೆ' ನಿರ್ಮಿಸಿದರು.

ನವದೆಹಲಿ: 'ಏಕದಿನ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ವಿಶ್ವದ ಮೂರನೇ ಕ್ರಿಕೆಟಿಗ, ವಿಶ್ವಕಪ್​ನಲ್ಲಿ ಅತಿಹೆಚ್ಚು ಶತಕ, ವಿಶ್ವಕಪ್​ನಲ್ಲಿ ವೇಗದ 6ನೇ ಶತಕ, ಆರಂಭಿಕನಾಗಿ ಅತಿಹೆಚ್ಚು ಹಂಡ್ರೆಡ್​ ಬಾರಿಸಿದ ವಿಶ್ವದ 2ನೇ ಆಟಗಾರ'..! ಇಲ್ಲಿನ ಅರುಣ್​ ಜೇಟ್ಲಿ ಕ್ರಿಕೆಟ್​ ಮೈದಾನದಲ್ಲಿ ಅಫ್ಘನ್​ ವಿರುದ್ಧದ ಪಂದ್ಯದಲ್ಲಿ ರೋಹಿತ್​ ಶರ್ಮಾ ಸಿಡಿಸಿದ ಒಂದು ಶತಕ ಇಷ್ಟೆಲ್ಲಾ ದಾಖಲೆಗಳನ್ನು ಬರೆದಿದೆ.

ಅಫ್ಘನ್ನರ ವಿರುದ್ಧ ವೀರಾವೇಷದ ಬ್ಯಾಟಿಂಗ್​ ಮಾಡಿದ ರೋಹಿತ್​ ಶರ್ಮಾ 63 ಎಸೆತಗಳಲ್ಲಿ ಶತಕ ಸಾಧನೆ ಮಾಡಿದರು. ಇದು ವಿಶ್ವಕಪ್​ನಲ್ಲಿ ರೋಹಿತ್​ ದಾಖಲಿಸಿದ 7ನೇ ಶತಕ. ಈ ಮೂಲಕ ಕ್ರಿಕೆಟ್ ದೇವರು ಸಚಿನ್​ ತೆಂಡೂಲ್ಕರ್​ (6 ಶತಕ) ಹೆಸರಿನಲ್ಲಿದ್ದ ದಾಖಲೆ ಮುರಿದರು.

ಏಕದಿನದಲ್ಲಿ ಮೂರನೇ ಅತ್ಯಧಿಕ ಶತಕ:ಅಂತರರಾಷ್ಟ್ರೀಯ ಏಕದಿನ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಆಟಗಾರರಲ್ಲಿ ರೋಹಿತ್​ ಮೂರನೇ ಸ್ಥಾನ ಪಡೆದರು. 31 ಹಂಡ್ರೆಡ್​ ಸಿಡಿಸಿರುವ ಹಿಟ್​ಮ್ಯಾನ್​, ಆಸ್ಟ್ರೇಲಿಯಾದ ದಂತಕಥೆ ರಿಕ್ಕಿ ಪಾಂಟಿಂಗ್​ ಶತಕಗಳನ್ನು ಮೀರಿದರು. ಪಾಂಟಿಂಗ್​ 30 ಶತಕ ಬಾರಿಸಿದ್ದರು. ರೋಹಿತ್​ಗೂ​ ಮುನ್ನ ಸಚಿನ್​ ತೆಂಡೂಲ್ಕರ್​ 49, ವಿರಾಟ್​ ಕೊಹ್ಲಿ 47 ಶತಕ ಬಾರಿಸಿದ್ದಾರೆ.

ವಿಶ್ವಕಪ್​ನಲ್ಲಿ ಅತಿ ಹೆಚ್ಚು ರನ್​:ವಿಶ್ವಕಪ್​ನಲ್ಲಿ ಅತಿಹೆಚ್ಚು ರನ್​ ಗಳಿಸಿದ ಭಾರತೀಯ ಆಟಗಾರರ ಪೈಕಿ ರೋಹಿತ್​ ಶರ್ಮಾ ಮೂರನೇ ಸ್ಥಾನ ಪಡೆದರು. ಸಚಿನ್​ 2,278 ರನ್​ ಗಳಿಸಿದ್ದರೆ, ವಿರಾಟ್ ಕೊಹ್ಲಿ 1115, ರೋಹಿತ್​ ಶರ್ಮಾ 1009 ರನ್​ ಗಳಿಸಿದರು. ಇದಾದ ಬಳಿಕ ಸೌರವ್​ ಗಂಗೂಲಿ 1006, ರಾಹುಲ್​ ದ್ರಾವಿಡ್​ 860 ರನ್​ ಮಾಡಿದ್ದಾರೆ.

ಕಡಿಮೆ ಇನ್ನಿಂಗ್ಸ್‌ನಲ್ಲಿ ಸಾವಿರ ರನ್​:ವಿಶ್ವಕಪ್​ ಇತಿಹಾಸದಲ್ಲಿ ಕಡಿಮೆ ಇನ್ನಿಂಗ್ಸ್​ನಲ್ಲಿ 1 ಸಾವಿರ ರನ್​ ಪೂರೈಸಿದವರಲ್ಲಿ ರೋಹಿತ್​ ಜಂಟಿ ಅಗ್ರ ಸ್ಥಾನ ಪಡೆದರು. 19 ಇನಿಂಗ್ಸ್​ನಲ್ಲಿ ಶರ್ಮಾ ಸಾವಿರ ರನ್​ ಪೂರೈಸಿದರು. ಇದಕ್ಕೂ ಮೊದಲು ಆಸೀಸ್​ನ ಡೇವಿಡ್​ ವಾರ್ನರ್​ ಇಷ್ಟೇ ಇನ್ನಿಂಗ್ಸ್​ನಲ್ಲಿ ಸಾವಿರ ರನ್​ ಕಲೆ ಹಾಕಿದ್ದಾರೆ. ಸಚಿನ್​ ತೆಂಡೂಲ್ಕರ್​, ಎಬಿ ಡಿವಿಲಿಯರ್ಸ್​ 20 ಇನ್ನಿಂಗ್ಸ್​ ತೆಗೆದುಕೊಂಡಿದ್ದರು.

ಆರಂಭಿಕನಾಗಿ ಎರಡನೇ ಅತಿ ಹೆಚ್ಚು ಶತಕ:ಏಕದಿನದಲ್ಲಿ ಆರಂಭಿಕ ಆಟಗಾರರ ಪೈಕಿ ಅತಿ ಹೆಚ್ಚು ಶತಕ ಬಾರಿಸಿದ ವಿಶ್ವದ ಎರಡನೇ ಆಟಗಾರ ಎಂಬ ದಾಖಲೆಗೂ ರೋಹಿತ್​ ಪಾತ್ರರಾದರು. ಈವರೆಗೂ 29 ಮೂರಂಕಿ ಮೊತ್ತವನ್ನು ದಾಟಿದ್ದಾರೆ. ಸಚಿನ್​ ತೆಂಡೂಲ್ಕರ್​ 45 ಬಾರಿ ಶತಕ ಬಾರಿಸಿದ್ದಾರೆ. ಇದಲ್ಲದೇ, ಶ್ರೀಲಂಕಾದ ಸನತ್​ ಜಯಸೂರ್ಯ 28 ಹಂಡ್ರೆಡ್​ ಗಳಿಸಿದ್ದಾರೆ.

ಇದರ ಜೊತೆಗೆ ಬಿರುಸಿನ ಬ್ಯಾಟ್​ ಬೀಸಿದ ರೋಹಿತ್​ ಶರ್ಮಾ ವಿಶ್ವಕಪ್​ನಲ್ಲಿ ಅತಿವೇಗದ ಶತಕ ಗಳಿಸಿದ 6ನೇ ಆಟಗಾರನಾಗಿಯೂ ಗುರುತಿಸಿಕೊಂಡರು. 63 ಎಸೆತಗಳಲ್ಲಿ ಮೂರಂಕಿ ದಾಟಿದರು. ದಕ್ಷಿಣ ಆಫ್ರಿಕಾದ ಐಡನ್​ ಮಾರ್ಕರಮ್​ ಕೇವಲ 49 ಎಸೆತಗಳಲ್ಲಿ ಲಂಕಾ ವಿರುದ್ಧ ಇದೇ ವಿಶ್ವಕಪ್​ನಲ್ಲಿ ಶತಕ ಸಾಧನೆ ಮಾಡಿ ಅಗ್ರಸ್ಥಾನದಲ್ಲಿದ್ದಾರೆ. ಭಾರತ ಪರವಾಗಿ ವೇಗದ ಶತಕದ ಸಾಲಿನಲ್ಲಿ 6 ನೇ ಸ್ಥಾನ ಪಡೆದರು.

ಇದನ್ನೂ ಓದಿ:556 ಸಿಕ್ಸರ್ಸ್! ವಿಶ್ವ ಕ್ರಿಕೆಟ್​ನಲ್ಲಿ ರೋಹಿತ್​ ಶರ್ಮಾ ಹೊಸ ಮೈಲುಗಲ್ಲು, ಕ್ರಿಸ್​ಗೇಲ್​ ವಿಶ್ವದಾಖಲೆ ದಾಖಲೆ ಪುಡಿ