ಮುಂಬೈ: ಭಾರತದಲ್ಲಿ ಏಕದಿನ ಕ್ರಿಕೆಟ್ ವಿಶ್ವಕಪ್ ಆರಂಭಕ್ಕೂ ಮುನ್ನ ಚೀನಾದ ಹ್ಯಾಂಗ್‌ಝೌನಲ್ಲಿ 19ನೇ ಏಷ್ಯನ್ ಗೇಮ್ಸ್ ನಡೆಯಲಿದೆ. ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಈ ವರ್ಷದ ಸ್ಪರ್ಧೆಗೆ ಭಾರತದ ಪುರುಷರ ಮತ್ತು ವನಿತೆಯರ ಕ್ರಿಕೆಟ್ ತಂಡ ಕಳುಹಿಸಲು ನಿರ್ಧರಿಸಿದೆ. ಈಗಾಗಲೇ ಗಾಯಕ್ವಾಡ್ ಮತ್ತು ಕೌರ್ ನೇತೃತ್ವದಲ್ಲಿ ತಂಡಗಳನ್ನು ಪ್ರಕಟಿಸಲಾಗಿದೆ.
ವಿಶ್ವಕಪ್ ಹಿನ್ನೆಲೆಯಲ್ಲಿ ಪುರುಷರ ತಂಡದ ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಅವರು ರೋಹಿತ್ ಬಳಗವನ್ನು ಟ್ರೈನ್ ಮಾಡುತ್ತಿದ್ದು, ಚೀನಾ ಪ್ರವಾಸಕ್ಕೆ ಬ್ಯಾಟಿಂಗ್ ದಿಗ್ಗಜ ಮತ್ತು ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿ (ಎನ್ಸಿಎ) ಅಧ್ಯಕ್ಷ ವಿ.ವಿ.ಎಸ್.ಲಕ್ಷ್ಮಣ್ ಕೋಚ್ ಆಗಿರಲಿದ್ದಾರೆ. ಹಾಗೆಯೇ ಭಾರತದ ಮಾಜಿ ಆಲ್‌ರೌಂಡರ್ ಹೃಷಿಕೇಶ್ ಕಾನಿಟ್ಕರ್ ಏಷ್ಯನ್ ಗೇಮ್ಸ್‌ಗೆ ಭಾರತ ಮಹಿಳಾ ಕ್ರಿಕೆಟ್ ತಂಡದ ಹಂಗಾಮಿ ಮುಖ್ಯ ಕೋಚ್ ಆಗಿ ನೇಮಕವಾಗಿದ್ದಾರೆ. ಸೆಪ್ಟೆಂಬರ್ 23ರಿಂದ ಅಕ್ಟೋಬರ್ 8 ರವರೆಗೆ ಏಷ್ಯನ್ ಗೇಮ್ಸ್ ನಿಗದಿಯಾಗಿದೆ.
ಪ್ರಸ್ತುತ ಲಕ್ಷ್ಮಣ್ ಅವರು ಉದಯೋನ್ಮುಖ ಆಟಗಾರರ ಶಿಬಿರಕ್ಕೆ ಮಾರ್ಗದರ್ಶ ನೀಡುತ್ತಿದ್ದಾರೆ. ಲಕ್ಷ್ಮಣ್ ಹೊರತಾಗಿ, ಏಷ್ಯಾಡ್‌ನಲ್ಲಿ ಭಾರತೀಯ ಪುರುಷರ ತಂಡಕ್ಕೆ ಬೌಲಿಂಗ್ ಕೋಚ್ ಆಗಿ ಭಾರತದ ಮಾಜಿ ಲೆಗ್ ಸ್ಪಿನ್ನರ್ ಸಾಯಿರಾಜ್ ಬಹುತುಲೆ ಮತ್ತು ಫೀಲ್ಡಿಂಗ್ ಕೋಚ್ ಆಗಿ ಮುನಿಶ್ ಬಾಲಿ ಇರಲಿದ್ದಾರೆ. ವನಿತೆಯರ ತಂಡಕ್ಕೆ ಡಿಸೆಂಬರ್ ವೇಳೆಯ ಅಂತರರಾಷ್ಟ್ರೀಯ ಹೋಮ್ ಸೀಸನ್ಗೆ ಹೊಸ ಕೋಚ್ ನೇಮಕ ಮಾಡುವ ನಿರೀಕ್ಷೆ ಇದೆ. ಹಂಗಾಮಿ ಮುಖ್ಯ ಕೋಚ್ ಆಗಿ ನೇಮಕರಾಗಿರುವ ಹೃಷಿಕೇಶ್ ಭಾರತ ತಂಡದಲ್ಲಿ 2 ಟೆಸ್ಟ್ ಮತ್ತು 34 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ. ಈ ವರ್ಷದ ಟಿ20 ವಿಶ್ವಕಪ್ ತಂಡದ ಕೋಚ್ ಆಗಿ ಕಾರ್ಯನಿರ್ವಹಿಸಿದ ಅನುಭವವಿದೆ. ಕಾನಿಟ್ಕರ್ ಜೊತೆಯಲ್ಲಿ ಬೌಲಿಂಗ್ ಕೋಚ್ ಆಗಿ ರಜಿಬ್ ದತ್ತಾ ಮತ್ತು ಫೀಲ್ಡಿಂಗ್ ಕೋಚ್ ಆಗಿ ಸುಭದೀಪ್ ಘೋಷ್ ಮಹಿಳಾ ತಂಡದಲ್ಲಿರಲಿದ್ದಾರೆ.