ಚುಟುಕು ಕ್ರಿಕೆಟ್​ನಲ್ಲಿ ಅತ್ಯಧಿಕ 50.. ರೋಹಿತ್​ ಶರ್ಮಾ ಜೊತೆ ವಿರಾಟ್​ ಕೊಹ್ಲಿಗೆ ಅಗ್ರಸ್ಥಾನ

ಹಾಂಗ್​ಕಾಂಗ್​ ಪಂದ್ಯದಲ್ಲಿ ಅರ್ಧಶತಕ ಗಳಿಸುವ ಮೂಲಕ ವಿರಾಟ್​ ಕೊಹ್ಲಿ ಚುಟುಕು ಮಾದರಿಯ ಕ್ರಿಕೆಟ್​ನಲ್ಲಿ ಅತಿಹೆಚ್ಚು 50 ಗಳಿಸಿದವರ ಪಟ್ಟಿಯಲ್ಲಿ ರೋಹಿತ್​ ಶರ್ಮಾ ಜೊತೆ ಜಂಟಿ ಅಗ್ರಸ್ಥಾನ ಪಡೆದರು.

ರನ್​ ಬರ ಎದುರಿಸುತ್ತಿರುವ ರನ್​ಮಷಿನ್​ ವಿರಾಟ್ ಕೊಹ್ಲಿ ಏಷ್ಯಾ ಕಪ್ ಟೂರ್ನಿಯಲ್ಲಿ ಲಯ ಕಂಡುಕೊಳ್ಳುವ ಮುನ್ಸೂಚನೆ ನೀಡಿದ್ದಾರೆ. ನಿನ್ನೆ ನಡೆದ ಹಾಂಗ್​ಕಾಂಗ್​ ವಿರುದ್ಧದ ಪಂದ್ಯದಲ್ಲಿ ಅರ್ಧಶತಕ ಗಳಿಸಿ ಮಿಂಚಿದರು. ಇದು ವಿರಾಟ್​ರ 31ನೇ ಫಿಫ್ಟಿಯಾಗಿದೆ. ಈ ಮೂಲಕ ವಿರಾಟ್​, ಹಿಟ್​ಮ್ಯಾನ್​ ರೋಹಿತ್​ ಶರ್ಮಾ ಅವರೊಂದಿಗೆ ಅಂತಾರಾಷ್ಟ್ರೀಯ ಟಿ20ಯಲ್ಲಿ ಅತಿಹೆಚ್ಚು ಫಿಫ್ಟಿ ಬಾರಿಸಿದವರ ಪಟ್ಟಿಯಲ್ಲಿ ಜಂಟಿ ಅಗ್ರಸ್ಥಾನ ಪಡೆದರು.

101 ನೇ ಅಂತಾರಾಷ್ಟ್ರೀಯ ಟಿ20 ಪಂದ್ಯವಾಡಿದ ವಿರಾಟ್​ ಕೊಹ್ಲಿ, 94 ಇನ್ನಿಂಗ್ಸ್‌ಗಳಲ್ಲಿ 31 ಅರ್ಧಶತಕಗಳನ್ನು ಬಾರಿಸಿದ್ದಾರೆ. ವೆಸ್ಟ್ ಇಂಡೀಸ್ ವಿರುದ್ಧ ಗಳಿಸಿದ 94* ಅವರ ಗರಿಷ್ಠ ಸ್ಕೋರ್ ಆಗಿದೆ. ಭಾರತ ತಂಡದ ನಾಯಕ ರೋಹಿತ್ ಶರ್ಮಾ 134 ಪಂದ್ಯಗಳಿಂದ 4 ಶತಕಗಳೊಂದಿಗೆ 31 ಅರ್ಧ ಶತಕಗಳನ್ನು ಚಚ್ಚಿದ್ದಾರೆ.

ಪಾಕಿಸ್ತಾನ ತಂಡದ ನಾಯಕ ಬಾಬರ್ ಅಜಮ್ 26 ಅರ್ಧಶತಕ ಗಳಿಸಿ ಎರಡನೇ ಸ್ಥಾನದಲ್ಲಿದ್ದಾರೆ. ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್ (22), ನ್ಯೂಜಿಲ್ಯಾಂಡ್​ನ ಮಾರ್ಟಿನ್ ಗಪ್ಟಿಲ್ (20) ಮತ್ತು ಪಾಲ್ ಸ್ಟಿರ್ಲಿಂಗ್(20) ಚುಟುಕು ಕ್ರಿಕೆಟ್​ನಲ್ಲಿ ಅರ್ಧಶತಕ ಮತ್ತು ಅದಕ್ಕಿಂತಲೂ ಹೆಚ್ಚು ರನ್​ ಗಳಿಸಿ ನಂತರದ ಸ್ಥಾನದಲ್ಲಿದ್ದಾರೆ. ವಿರಾಟ್ ಚುಟುಕು ಕ್ರಿಕೆಟ್​ನಲ್ಲಿ 100 ನೇ ಪಂದ್ಯವಾಡುವ ಮೂಲಕ ಏಕದಿನ, ಟೆಸ್ಟ್​ ಸೇರಿ ಮೂರೂ ಮಾದರಿಯಲ್ಲಿ 100 ಪಂದ್ಯವಾಡಿದ ಭಾರತದ ಮೊದಲ ಕ್ರಿಕೆಟಿಗರಾಗಿದ್ದಾರೆ.

ಓದಿ:ಎಬಿಡಿ ರೀತಿ ಬ್ಯಾಟ್​ ಬೀಸಿದ ಸೂರ್ಯ! 1 ಓವರ್‌ 4 ಸಿಕ್ಸರ್: ಸಹ ಆಟಗಾರನಿಗೆ ಶಿರಬಾಗಿದ ಕೊಹ್ಲಿ​