ಬ್ಯಾಟಿಂಗ್​ ಕಿಂಗ್​ ವಿರಾಟ್​ ಕೊಹ್ಲಿಯ ಬ್ಯಾಟ್​ ಬೆಲೆ ಎಷ್ಟು..? ವಿಶೇಷತೆಗಳೇನು ಗೊತ್ತಾ?

ಶ್ರೀಲಂಕಾ ವಿರುದ್ಧದ ಏಕದಿನ ಸರಣಿಯಲ್ಲಿ ವಿರಾಟ್​ ಕೊಹ್ಲಿ ಹಲವು ದಾಖಲೆಗಳನ್ನು ಸೃಷ್ಟಿಸಿದ್ದಾರೆ. ತಮ್ಮ ಹಳೆಯ ಖದರ್​ಗೆ ಬಂದ ಆಟಗಾರನ ಬ್ಯಾಟ್​ ಬಗ್ಗೆ ಕ್ರಿಕೆಟ್​ ಲೋಕ ಮಾತನಾಡುತ್ತಿದೆ. ಕೊಹ್ಲಿ ಬಳಸುವ ಬ್ಯಾಟ್​ನ ದರ ಮತ್ತು ವಿಶೇಷತೆಗಳೇನು ಎಂಬುದೇ ಈಗ ಪ್ರಶ್ನೆಯಾಗಿದೆ.

ನವದೆಹಲಿ:ಈ ವರ್ಷ ತವರಿನಲ್ಲಿ ನಡೆಯುವ ಏಕದಿನ ವಿಶ್ವಕಪ್​ಗೆ ಭಾರತ ತಂಡ ತಯಾರಿ ನಡೆಸುತ್ತಿದೆ. ಆಟಗಾರರು ವೈಯಕ್ತಿಕವಾಗಿ ಭರ್ಜರಿ ಲಯಕ್ಕೆ ಮರಳಿದ್ದು, ಶ್ರೀಲಂಕಾ ವಿರುದ್ಧದ ಸರಣಿಯಲ್ಲಿ ಅದು ಗೋಚರವಾಗಿದೆ. ಅದರಲ್ಲೂ ನಾಯಕ ರೋಹಿತ್​ ಶರ್ಮಾ, ಚೇಸಿಂಗ್​ ಮಾಸ್ಟರ್​​ ವಿರಾಟ್​ ಕೊಹ್ಲಿ, ಕೆಎಲ್​ ರಾಹುಲ್​ ಬ್ಯಾಟ್​ ಸದ್ದು ಮಾಡುತ್ತಿದ್ದರೆ, ಮೊಹಮದ್​ ಸಿರಾಜ್​, ಮೊಹಮದ್​ ಶಮಿ ವೇಗ ಮೊನಚು ಪಡೆದಿದೆ. ಯಜುವೇಂದ್ರ ಚಹಲ್​, ಕುಲದೀಪ್​ ಯಾದವ್​ ಸ್ಪಿನ್​ ಮೋಡಿ ಮಾಡುತ್ತಿದೆ.

ಲಂಕಾ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ನಿಜವಾಗಿಯೂ ಚರ್ಚೆಗೆ ಗ್ರಾಸವಾಗಿದ್ದು, ಬ್ಯಾಟಿಂಗ್​ ಕಿಂಗ್​ ವಿರಾಟ್​ ಕೊಹ್ಲಿ ಅವರ ಅಬ್ಬರ. ಕಳೆದ 4 ಇನಿಂಗ್ಸ್​​ಗಳಲ್ಲಿ 3 ಶತಕ ಬಾರಿಸಿರುವ ಕೊಹ್ಲಿ ವಿಶ್ವಕ್ರಿಕೆಟ್​ಗೆ ಹಳೆಯ ಕೊಹ್ಲಿಯನ್ನು ಪರಿಚಯಿಸಿದ್ದಾರೆ. ಅದರಲ್ಲೂ ಕೊನೆಯ ಏಕದಿನ ಪಂದ್ಯದಲ್ಲಿಮನ ಅಬ್ಬರ ನಿಜಕ್ಕೂ ಅಚ್ಚರಿಯ ಜೊತೆಗೆ ಅದ್ಭುತವೇ ಸರಿ. ಈ ಎಲ್ಲದರ ಮಧ್ಯೆ ವಿರಾಟ್​ ಬಳಸುತ್ತಿರುವ ಬ್ಯಾಟ್​ ಬಗ್ಗೆ ಕುತೂಹಲ ಮೂಡಿದೆ.

ವಿರಾಟ್​ ಕೊಹ್ಲಿ ಬಳಸುತ್ತಿರುವ ಎಂಆರ್​ಎಫ್​ ಕಂಪನಿಯ ಬ್ಯಾಟ್​ನ ವಿಶೇಷತೆ ಮತ್ತು ಅದರ ದರದ ಬಗ್ಗೆ ಕ್ರಿಕೆಟ್​ ಲೋಕ ಮಾತನಾಡುತ್ತಿದೆ. ಅದರಲ್ಲೂ ವಿರಾಟ್​ರೂಪದ ಬಳಿಕ ಸ್ವತಃ ಶ್ರೀಲಂಕಾ ಆಟಗಾರರೇ ಕೊಹ್ಲಿ ಬ್ಯಾಟ್​ ಅನ್ನು ಪರಿಶೀಲಿಸಿದ್ದಾರೆ ಎಂದು ಹೇಳಲಾಗಿದೆ. ಬ್ಯಾಟಿಂಗ್​ ಕಿಂಗ್​ ಬಳಸುವ ಶಸ್ತ್ರದಂತಹ ಬ್ಯಾಟ್​ನ ದರ ಮತ್ತು ಅದರ ವಿಶೇಷತೆ ಕುತೂಹಲದ ಕಣಜವಾಗಿದೆ.

ವಿರಾಟ್​ ಬಳಸುವ ಬ್ಯಾಟ್​ನ ದರವೆಷ್ಟು ಗೊತ್ತಾ?:ವಿರಾಟ್ ಕೊಹ್ಲಿ ಅವರು ಬೌಂಡರಿ ಮತ್ತು ಸಿಕ್ಸರ್ ಬಾರಿಸುವ ಬ್ಯಾಟ್ ಎಷ್ಟು ದುಬಾರಿ ಮತ್ತು ಅದರ ವಿಶೇಷಗಳೇನು ಎಂಬುದು ಈಗಿನ ಪ್ರಶ್ನೆಯಾಗಿದೆ. ವಿರಾಟ್​ಗಾಗಿ ಎಂಆರ್​ಎಫ್​ ಕಂಪನಿ ಬ್ಯಾಟ್​ ತಯಾರಿಸುತ್ತಿದ್ದು, ಇದನ್ನು ಇಂಗ್ಲಿಷ್​ ವಿಲೋ ಮರವನ್ನು ಬಳಸಲಾಗುತ್ತಿದೆ. ಕಳೆದ ವರ್ಷದ ಏಷ್ಯಾ ಕಪ್​ ವೇಳೆ ಕಂಪನಿ ವಿರಾಟ್​ಗೆ ಗೋಲ್ಡ್​ ವಿಝಾರ್ಡ್​ ಬ್ಯಾಟ್​ಗಳನ್ನು ತಯಾರಿಸಿದೆ. ಇದು ಕಂಪನಿಯ ಗ್ಯಾಂಡ್​ ಎಡಿಷನ್​ ಬ್ಯಾಟ್​ ಆಗಿದ್ದು, ಬೆಲೆ 20 ರಿಂದ 70 ಸಾವಿರ ರೂಪಾಯಿ ಇದೆ.

MRF ಕಂಪನಿ ಪ್ರಾಯೋಜಕತ್ವದ ಬ್ಯಾಟ್​ ಗಟ್ಟಿ ಮತ್ತು ಹೊಡೆತಗಳಿಗೆ ಹೆಸರಾಗಿದೆ. ವಿರಾಟ್​ ಬಳಸುವ ಬ್ಯಾಟ್​ ಈಗಲೇ ಹರಾಜಾದರೂ ಅದು ಕೋಟಿಗಟ್ಟಲೇ ಬೆಲೆ ಕಾಣಲಿದೆ ಎಂಬುದು ಕ್ರಿಕೆಟ್​ ವಲಯದ ಮಾತು. ಈ ಮೊದಲು ಕ್ರಿಕೆಟ್​ ದಂತಕಥೆ ಡಾನ್​ ಬ್ರಾಡ್ಮನ್​ ಅವರ ಬ್ಯಾಟ್​ ಅನ್ನು 2021 ರಲ್ಲಿ ಹರಾಜು ಮಾಡಲಾಯಿತು. ಅದು 1.9 ಕೋಟಿ ರೂಪಾಯಿಗೆ ಹರಾಜಾಗಿದೆ. ಈವರೆಗೂ ಆಟಗಾರನ ಬ್ಯಾಟ್​ ಕಂಡ ಅತಿ ಹೆಚ್ಚಿನ ಖರೀದಿ ಇದಾಗಿದೆ.

ವಿರಾಟ್​ ಬ್ಯಾಟ್​ ಬೀಸಿದರೆ ದಾಖಲೆಗಳು ಸೃಷ್ಟಿ:ಏಕದಿನ ವಿಶ್ವಕಪ್‌ಗೂ ಮುನ್ನ ಭಾರತ ತಂಡ ಅದ್ಭುತ ಫಾರ್ಮ್‌ಗೆ ಮರಳಿದೆ. ಚೇಸ್​ ಮಾಸ್ಟರ್​ ವಿರಾಟ್ ಕೊಹ್ಲಿ ಕೂಡ ಹಳೆಯ ಖದರ್​ ತೋರಿಸಿದ್ದಾರೆ. ಶ್ರೀಲಂಕಾ ವಿರುದ್ಧದ ಏಕದಿನ ಸರಣಿಯಲ್ಲಿ ಕೊಹ್ಲಿ 2 ಶತಕಗಳನ್ನು ಗಳಿಸಿದರೆ, ತಂಡ ವಿಶ್ವದಾಖಲೆಯ 317 ರನ್​ಗಳ ಗೆಲುವು ದಾಖಲಿಸಿದೆ. ಇದು ಏಕದಿನ ಇತಿಹಾಸದಲ್ಲಿ ದೊಡ್ಡ ರನ್‌ ಅಂತರದ ಗೆಲುವಾಗಿದೆ. ಈ ಪಂದ್ಯದಲ್ಲಿ ಕೊಹ್ಲಿ 110 ಎಸೆತಗಳಲ್ಲಿ 8 ಸಿಕ್ಸರ್ ಹಾಗೂ 13 ಬೌಂಡರಿಗಳ ಸಮೇತ ಅಜೇಯ 166 ರನ್ ಗಳಿಸಿದ್ದರು. ಈ ಟೂರ್ನಿಯಲ್ಲಿ ವಿರಾಟ್ ಕೊಹ್ಲಿ ಕ್ರಿಕೆಟ್​ ದಿಗ್ಗಜರ ಹಲವು ದಾಖಲೆಗಳನ್ನು ಮೀರಿದ್ದಾರೆ.

ಟಾಪ್​ 5 ಪಟ್ಟಿಯಲ್ಲಿ ವಿರಾಟ್​ ವಿರಾಜಮಾನ:ಏಕದಿನ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ರನ್​ ಬಾರಿಸಿದವರ ಪಟ್ಟಿಯಲ್ಲಿ ವಿರಾಟ್​ ಕೊಹ್ಲಿ ಲಂಕಾದ ಮಹೇಲಾ ಜಯವರ್ಧನೆ ಅವರನ್ನು ಹಿಂದಿಕ್ಕಿ ಟಾಪ್​ 5 ನೇ ಸ್ಥಾನ ಪಡೆದಿದ್ದಾರೆ. ಜಯವರ್ಧನೆ 12650 ರನ್​ ಮಾಡಿದ್ದರೆ, ವಿರಾಟ್​ ಸದ್ಯ 268 ಪಂದ್ಯಗಳಲ್ಲಿ 12754 ರನ್​ ಕಲೆ ಹಾಕಿದ್ದಾರೆ. ಸಚಿನ್​ ತೆಂಡೂಲ್ಕರ್​ 18426, ಕುಮಾರ ಸಂಗಕ್ಕಾರ 14234, ರಿಕ್ಕಿ ಪಾಂಟಿಂಗ್​ 13704, ಸನತ್​ ಜಯಸೂರ್ಯ 13430 ರನ್​ ಕಲೆಹಾಕಿ ಮೊದಲ 4 ಸ್ಥಾನಗಳಲ್ಲಿದ್ದಾರೆ.

ಓದಿ:ವಯಾಕಾಮ್​ 18 ಸಂಸ್ಥೆಗೆ ಮಹಿಳಾ ಐಪಿಎಲ್​ ಪ್ರಸಾರದ ಹಕ್ಕು.. ₹951 ಕೋಟಿ ರೂಪಾಯಿಗೆ ಬಿಡ್​