ಮುಂಬೈ ಉಗ್ರರ ದಾಳಿಗೆ 13 ವರ್ಷ: 'ಈ ದಿನವನ್ನೆಂದಿಗೂ ಮರೆಯಲಾರೆವು'- ಕೊಹ್ಲಿ ಸೇರಿದಂತೆ ಕ್ರಿಕೆಟಿಗರಿಂದ ಸ್ಮರಣೆ

2008ರಲ್ಲಿ ಮುಂಬೈನಲ್ಲಿ ನಡೆದಿದ್ದ ಉಗ್ರರ ದಾಳಿಗೆ ಇಂದಿಗೆ 13 ವರ್ಷ ತುಂಬಿದೆ. ಈ ದಿನವನ್ನು ಎಂದಿಗೂ ಮರೆಯಲು ಸಾಧ್ಯವಿಲ್ಲ ಎಂದು ಟೀಂ ಇಂಡಿಯಾ ಬ್ಯಾಟರ್​ ವಿರಾಟ್​​ ಕೊಹ್ಲಿ ಟ್ವೀಟ್ ಮಾಡಿದ್ದಾರೆ.

ನವದೆಹಲಿ:ಕಳೆದ 13 ವರ್ಷಗಳ ಹಿಂದೆ ಭಯೋತ್ಪಾದಕರು ಭಾರತದೊಳಗೆ ನುಗ್ಗಿ ರಕ್ತದೋಕುಳಿ ನಡೆಸಿದ್ದರು. ಈ ವೇಳೆ ಭಾರತೀಯ ಯೋಧರು ಸೇರಿದಂತೆ 166 ಅಮಾಯಕರು ತಮ್ಮ ಪ್ರಾಣ ಕಳೆದುಕೊಂಡಿದ್ದರು. ಈ ಭೀಕರ ದಾಳಿಗೆ ಇಂದು 13 ವರ್ಷ ತುಂಬಿದ್ದು, ಅನೇಕರು ಟ್ವೀಟ್ ಮಾಡಿ ದುರಂತದ ನೆನಪನ್ನು ಮೆಲುಕು ಹಾಕಿದ್ದಾರೆ.

ಟೀಂ ಇಂಡಿಯಾ ಟೆಸ್ಟ್​, ಏಕದಿನ ಕ್ಯಾಪ್ಟನ್​ ವಿರಾಟ್​​ ಕೊಹ್ಲಿ ಮುಂಬೈ ಭಯೋತ್ಪಾದಕ ದಾಳಿ ಬಗ್ಗೆ ಟ್ವೀಟ್​ ಮಾಡಿದ್ದು, ಮುಂಬೈ ದಾಳಿ ಮರೆಯಲು ಎಂದಿಗೂ ಸಾಧ್ಯವಿಲ್ಲ ಎಂದಿದ್ದಾರೆ. ಈ ದಿನ ಹಾಗೂ ಘಟನೆಯಲ್ಲಿ ಪ್ರಾಣ ಕಳೆದುಕೊಂಡವರನ್ನು ನಾವೆಂದಿಗೂ ಮರೆಯುವುದಿಲ್ಲ. ತಮ್ಮ ಪ್ರೀತಿ ಪಾತ್ರರನ್ನು ಕಳೆದುಕೊಂಡಿರುವ ಕುಟುಂಬಗಳಿಗೆ ಪ್ರಾರ್ಥಿಸುತ್ತೇನೆ ಎಂದಿದ್ದಾರೆ.

ವಿರೇಂದ್ರ ಸೆಹ್ವಾಗ್ ಟ್ವೀಟ್​

ಈ ದಾಳಿಯ ಬಗ್ಗೆ ಟ್ವೀಟ್ ಮಾಡಿರುವ ಟೀಂ ಇಂಡಿಯಾ ಮಾಜಿ ಸ್ಪೋಟಕ ಆಟಗಾರ ವಿರೇಂದ್ರ ಸೆಹ್ವಾಗ್​, ಈ ದುಃಖದ ದಿನಕ್ಕೆ 13 ವರ್ಷಗಳು. ಅವರು ನಮ್ಮ ಮಣ್ಣಿನ ಶ್ರೇಷ್ಠ ಪುತ್ರರು. ಶಹೀದ್​ ತುಕಾರಾಂ ಓಂಬ್ಳೆ. ಅಂದು ತೋರಿದ ಧೈರ್ಯ, ನಿಸ್ವಾರ್ಥತೆಗೆ ಯಾವುದೇ ಪದ, ಪ್ರಶಸ್ತಿಗಳು ನ್ಯಾಯ ನೀಡುವುದಿಲ್ಲ. ಇಂತಹ ಮಹಾನ್​ ವ್ಯಕ್ತಿಗೆ ಶಿರಬಾಗಿ ನಮಿಸುವೆ ಎಂದಿದ್ದಾರೆ.

ಸಚಿನ್ ತೆಂಡೂಲ್ಕರ್ ಟ್ವೀಟ್

ಉಗ್ರರ ದಾಳಿಗೆ ಸಂಬಂಧಿಸಿದಂತೆ ಮಾಸ್ಟರ್ ಬ್ಲಾಸ್ಟರ್​ ಸಚಿನ್ ತೆಂಡೂಲ್ಕರ್ ಕೂಡ ಟ್ವೀಟ್ ಮಾಡಿದ್ದು, ಇದು ಹೃದಯವಿದ್ರಾವಕ ಮತ್ತು ನೋವಿನ ಸಮಯವಾಗಿತ್ತು. ಆದರೆ ಎಲ್ಲರೂ ತೋರಿಸಿರುವ ಮನೋಭಾವ ನಮ್ಮನ್ನು ಬಲಪಡಿಸಿದೆ. 26/11ರ ಸಮಯದಲ್ಲಿ ನಾವು ಕಳೆದುಕೊಂಡ ಎಲ್ಲ ಧೈರ್ಯಶಾಲಿಗಳಿಗೆ ನನ್ನ ಹೃತ್ಪೂರ್ವಕ ಶ್ರದ್ಧಾಂಜಲಿ ಎಂದಿದ್ದಾರೆ.

ಇದರ ಜೊತೆಗೆ, ವಾಸೀಂ ಜಾಫರ್​, ವೆಂಕಟೇಶ್ ಪ್ರಸಾದ್​ ಸೇರಿದಂತೆ ಅನೇಕ ಕ್ರಿಕೆಟಿಗರು ಟ್ವೀಟ್ ಮಾಡಿ ಸಂತಾಪ ಸೂಚಿಸಿದ್ದಾರೆ.

2008ರಲ್ಲಿ ದಾಳಿ ನಡೆಸಿದ್ದ 10 ಲಷ್ಕರ್​-ಎ-ತೊಯ್ಬಾ ಉಗ್ರರು ಪ್ರಮುಖವಾಗಿ ಛತ್ರಪತಿ ಶಿವಾಜಿ ಟರ್ಮಿನಲ್​​, ಒಬೆರಾಯ ಟ್ರೈಡೆಂಟ್​, ತಾಜ್​ ಹೋಟೆಲ್​​, ಲಿಯೋಪೋಲ್ಡ್​ ಕೆಫೆ ಸೇರಿದಂತೆ ಅನೇಕ ಸ್ಥಳಗಳ ಮೇಲೆ ದಾಳಿ ನಡೆಸಿದ್ದರು.

ಈ ವೇಳೆ 18 ಭದ್ರತಾ ಸಿಬ್ಬಂದಿ ಸೇರಿದಂತೆ 166 ಜನರು ತಮ್ಮ ಪ್ರಾಣ ಕಳೆದುಕೊಂಡಿದ್ದರು. ಈ ವೇಳೆ ಸೆರೆ ಸಿಕ್ಕಿದ್ದ ಅಜ್ಮಲ್​ ಕಸಬ್​ಗೆ 2012ರಲ್ಲಿ ಗಲ್ಲಿಗೇರಿಸಲಾಯಿತು.