ಇಂಗ್ಲೆಂಡ್​​ನ ದುರ್ಬಲ ಬ್ಯಾಟಿಂಗ್​​ನಿಂದ ಟೀಂ ಇಂಡಿಯಾ ಸೋಲಿಸುವುದು ಕಠಿಣ: ವಾನ್‌

ಇಂಗ್ಲೆಂಡ್​​ ವಿರುದ್ಧದ ಟೆಸ್ಟ್​​ ಸರಣಿಯಲ್ಲಿ ಇದೀಗ ಟೀಂ ಇಂಡಿಯಾ ಭಾಗಿಯಾಗಲಿದ್ದು, ಅದರ ಬಗ್ಗೆ ಇಂಗ್ಲೆಂಡ್​ ತಂಡದ ಮಾಜಿ ನಾಯಕ ಮೈಕಲ್​ ವಾನ್​ ಭವಿಷ್ಯ ನುಡಿದಿದ್ದಾರೆ.

ಲಂಡನ್​:ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ ಸೋಲು ಕಂಡಿರುವ ಟೀಂ ಇಂಡಿಯಾ ಇದೀಗ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ಭಾಗಿಯಾಗಲಿದ್ದು, ಆಗಸ್ಟ್ ​​- ಸೆಪ್ಟೆಂಬರ್​ ತಿಂಗಳಲ್ಲಿ ಈ ಸರಣಿ ಆರಂಭಗೊಳ್ಳಲಿದೆ. ಟೆಸ್ಟ್​​ ಪಂದ್ಯಗಳು ಆರಂಭಗೊಳ್ಳುವುದಕ್ಕೂ ಮುಂಚಿತವಾಗಿ ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಮೈಕಲ್ ವಾನ್‌ ಭವಿಷ್ಯ ನುಡಿದಿದ್ದಾರೆ.

ಇಂಗ್ಲೆಂಡ್​​ನ ಇಂತಹ ದುರ್ಬಲ ಬ್ಯಾಟಿಂಗ್​​ನಿಂದ ಟೀಂ ಇಂಡಿಯಾ ಸೋಲಿಸುವುದು ಕಠಿಣ ಎಂದು ಅವರು ಹೇಳಿದ್ದಾರೆ. ಟೆಸ್ಟ್​​ ಚಾಂಪಿಯನ್​ಶಿಪ್​ ಫೈನಲ್​ ಆರಂಭಗೊಳ್ಳುವುದಕ್ಕೂ ಮುಂಚಿತವಾಗಿ ನ್ಯೂಜಿಲ್ಯಾಂಡ್​ ವಿರುದ್ಧ ನಡೆದ ಎರಡು ಟೆಸ್ಟ್​​​​ ಪಂದ್ಯಗಳ ಸರಣಿಯಲ್ಲಿ ಇಂಗ್ಲೆಂಡ್​​​ 1-0 ಅಂತರದಿಂದ ಸೋಲು ಕಂಡಿದೆ.

ಅದಕ್ಕೆ ಮುಖ್ಯ ಕಾರಣವಾಗಿದ್ದು, ಆಂಗ್ಲರ ಕಳಪೆ ಬ್ಯಾಟಿಂಗ್​​ ಪ್ರದರ್ಶನ ಎಂದು ಅವರು ತಿಳಿಸಿದ್ದಾರೆ. ಆಗಸ್ಟ್​​​ 4ರಿಂದ ಪ್ರಾರಂಭಗೊಳ್ಳಲಿರುವ ಸರಣಿಯಲ್ಲಿ ಇಂಗ್ಲೆಂಡ್​ ತಂಡ ಭಾರತಕ್ಕೆ 3-1 ಅಂತರದಲ್ಲಿ ಸೋಲುಣಿಸಲಿದೆ ಎಂಬ ಭರವಸೆ ಇದೆ.

ಆದರೆ, ಇಂಗ್ಲೆಂಡ್​ನ ಬ್ಯಾಟಿಂಗ್​​ ದುರ್ಬಲವಾಗಿದ್ದು, ಇದು ಅಷ್ಟೊಂದು ಸುಲಭವಲ್ಲ ಎಂದಿದ್ದಾರೆ. ತಂಡಕ್ಕೆ ಬಟ್ಲರ್​, ಸ್ಟೋಕ್ಸ್​​ ಕಮ್​ಬ್ಯಾಕ್​ ಮಾಡಲಿದ್ದಾರೆ. ಆದರೆ ಬ್ಯಾಟಿಂಗ್​ ವಿಭಾಗ ಮತ್ತಷ್ಟು ಬದಲಾಗಬೇಕು ಎಂದು ಹೇಳಿದ್ದಾರೆ.

ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್ ನಡೆದಿದ್ದ ವೇಳೆ ಟೀಂ ಇಂಡಿಯಾ ವಿರುದ್ಧ ಅಪಹಾಸ್ಯ ಮಾಡಿದ್ದ ವಾನ್​, "ಮಳೆಯಿಂದಾಗಿ ಇಂದು ಟೀಂ ಇಂಡಿಯಾ ಬಚಾವಾಗಿದೆ" ಎಂದು ಸಾಮಾಜಿಕ ಜಾಲತಾಣದಲ್ಲಿ ಟ್ವೀಟ್​ ಮಾಡಿಕೊಂಡಿದ್ದರು. ಇದರ ವಿರುದ್ಧ ವ್ಯಾಪಕ ಆಕ್ರೋಶ ವ್ಯಕ್ತವಾಗಿತ್ತು.