ಮಿಂಚಿದ ಜಂಪಾ, ಸ್ಟಾರ್ಕ್​: ಶ್ರೀಲಂಕಾ ತಂಡವನ್ನು 154ಕ್ಕೆ ನಿಯಂತ್ರಿಸಿದ ಆಸ್ಟ್ರೇಲಿಯಾ

ಕುಸಾಲ್ ಪರೆರಾ 35, ಚರಿತ್​ ಅಸಲಂಕಾ 35 ಭಾನುಕ ರಾಜಪಕ್ಷೆ 33 ರನ್​ಗಳಿಸಿದರೆ, ಆಸ್ಟ್ರೇಲಿಯಾ ಪರ ಮಿಚೆಲ್ ಸ್ಟಾರ್ಕ್​ 27ಕ್ಕೆ2, ಆ್ಯಡಂ ಜಂಪಾ 12ಕ್ಕೆ 2 ಮತ್ತು ಕಮ್ಮಿನ್ಸ್​ 34ಕ್ಕೆ 2 ವಿಕೆಟ್ ಪಡೆದರು.

ದುಬೈ: ಸಂಘಟಿತ ಬೌಲಿಂಗ್ ಪ್ರದರ್ಶನ ತೋರಿದ ಆಸ್ಟ್ರೇಲಿಯಾ ತಂಡ ಟಿ20 ವಿಶ್ವಕಪ್​ನ ಸೂಪರ್​ 12ನಲ್ಲಿ ಶ್ರೀಲಂಕಾ ತಂಡವನ್ನು 154 ರನ್​ಗಳಿಗೆ ನಿಯಂತ್ರಿಸಿದೆ.

ಟಾಸ್​ ಸೋತು ಬ್ಯಾಟಿಂಗ್ ಇಳಿದ ಶ್ರೀಲಂಕಾ ಮೂರನೇ ಓವರ್​ನಲ್ಲೇ ಆರಂಭಿಕ ಪತುಂ ನಿಸಾಂಕ(7) ಅವರ ವಿಕೆಟ್ ಕಳೆದುಕೊಂಡಿತು. ಆದರೆ 2ನೇ ವಿಕೆಟ್​ಗೆ ಜೊತೆಯಾದ ಕುಸಾಲ್ ಪೆರೆರಾ ಮತ್ತು ಅಸಲಂಕಾ 63 ರನ್​ಗಳ ಜೊತೆಯಾಟದ ಮೂಲಕ ಚೇತರಿಕೆ ನೀಡಿದರು. ಆದರೆ 35 ರನ್​ಗಳಿಸಿದ್ದ ಅಸಲಂಕಾ ವಿಕೆಟ್ ಬೀಳುತ್ತಿದ್ದಂತೆ ಲಂಕಾ ಪತನ ಆರಂಭವಾಯಿತು. ಇವರ ಬೆನ್ನಲ್ಲೇ 27 ಎಸೆತಗಳಲ್ಲಿ 35 ರನ್​ಗಳಿಸಿದ್ದ ಪೆರೆರಾ ಕೂಡ ಔಟಾದರು.

ನಂತರ ಬಂದ ಅವಿಷ್ಕಾ ಫರ್ನಾಂಡೊ ಕೇವಲ 4 ರನ್​ಗಳಿಸಿ ಬಂದಷ್ಟೇ ವೇಗವಾಗಿ ಪೆವಿಲಿಯನ್​ಗೆ ಮರಳಿದರು. ಶನಕಾ 19 ಎಸೆತಗಳನ್ನೆದುರಿಸದರೂ ಕೇವಲ 12 ರನ್​ಗಳಿಸಿ ಕಮಿನ್ಸ್​ಗೆ ವಿಕೆಟ್​ ಒಪ್ಪಿಸಿದರು.

ಭಾನುಕ ರಾಜಪಕ್ಷೆ 26 ಎಸೆತಗಳಲ್ಲಿ 4 ಬೌಂಡರಿ ಮತ್ತು 1 ಸಿಕ್ಸರ್​ ನೆರವಿನಿಂದ ಅಜೇಯ 33 ರನ್​ಗಳಿಸಿ 155ರನ್​​ಗಳ ಸ್ಪರ್ಧಾತ್ಮಕ ಗುರಿ ನೀಡಲು ನೆರವಾದರು.

ಆಸ್ಟ್ರೇಲಿಯಾ ಪರ ಮಿಚೆಲ್ ಸ್ಟಾರ್ಕ್​ 27ಕ್ಕೆ2, ಆ್ಯಡಂ ಜಂಪಾ 12ಕ್ಕೆ 2 ಮತ್ತು ಕಮ್ಮಿನ್ಸ್​ 34ಕ್ಕೆ 2 ವಿಕೆಟ್ ಪಡೆದರು.

ಇದನ್ನು ಓದಿ: ಇದೊಂದು ಕಾರಣಕ್ಕೆ ಡೆಲ್ಲಿ ತಂಡ ಬಿಡಲಿದ್ದಾರೆ ಶ್ರೇಯರ್ ಅಯ್ಯರ್!