ಸಿಡ್ನಿ(ಆಸ್ಟ್ರೇಲಿಯಾ):ಹಾಲಿ ವಿಶ್ವ ಚಾಂಪಿಯನ್ ಆಸ್ಟ್ರೇಲಿಯಾ ತನ್ನದೇ ನೆಲದಲ್ಲಿ ನಡೆದ ಟಿ20 ವಿಶ್ವಕಪ್-2022 ರ ಮೊದಲ ಸೂಪರ್ 12 ಪಂದ್ಯದಲ್ಲಿ ನ್ಯೂಜಿಲೆಂಡ್ ವಿರುದ್ಧ ಹೀನಾಯ ಸೋಲನುಭವಿಸಿದೆ. ಡೆವೋನ್ ಕಾನ್ವೇ, ಮಿಚೆಲ್ ಸ್ಯಾಂಟ್ನರ್, ಟಿಮ್ ಸೌಥಿ ಹೋರಾಟದಿಂದ ಡಾರ್ಕ್ಹಾರ್ಸ್ ಕುಖ್ಯಾತಿಯ ನ್ಯೂಜಿಲೆಂಡ್ 89 ರನ್ಗಳ ಭರ್ಜರಿ ಜಯ ಸಾಧಿಸಿತು.
ಮೊದಲು ಬ್ಯಾಟ್ ಮಾಡಿದ ನ್ಯೂಜಿಲೆಂಡ್ ಭರ್ಜರಿ ಪ್ರದರ್ಶನ ನೀಡಿ 20 ಓವರ್ಗಳಲ್ಲಿ 200 ರನ್ ಗಳಿಸಿತು. ಬೌಲಿಂಗ್ಗೆ ನೆರವಾಗುವ ಸಿಡ್ನಿ ಮೈದಾನದಲ್ಲಿ ಕಠಿಣ ಗುರಿ ಬೆನ್ನತ್ತಿದ್ದ ತವರು ತಂಡ ಆಸ್ಟ್ರೇಲಿಯಾ ಬ್ಯಾಟಿಂಗ್ ವೈಫಲ್ಯದಿಂದ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 111 ರನ್ಗಳಿಗೆ ಆಲೌಟ್ ಆಯಿತು. ಇದು ಚುಟುಕು ಕ್ರಿಕೆಟ್ನಲ್ಲಿ ತವರಿನಲ್ಲಿ ತಂಡ ದಾಖಲಿಸಿದ ಅತಿ ಕಡಿಮೆ ಮೊತ್ತವಾಗಿದೆ. ಇದಕ್ಕೂ ಮೊದಲು ಪಾಕಿಸ್ತಾನ ವಿರುದ್ಧ 127 ರನ್ ಗಳಿಸಿದ್ದೇ ಕನಿಷ್ಠ ಮೊತ್ತವಾಗಿತ್ತು.
ಆಸೀಸ್ ಬ್ಯಾಟಿಂಗ್ ಧೂಳಿಪಟ:ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡಗಳಲ್ಲಿ ಒಂದಾದ ವಿಶ್ವಕಪ್ ಆಯೋಜಕ ತಂಡ ಆಸ್ಟ್ರೇಲಿಯಾದ ಬ್ಯಾಟಿಂಗ್ ಪಡೆ ಅಕ್ಷರಶಃ ಧೂಳೀಪಟ ಕಂಡಿತು. ನ್ಯೂಜಿಲ್ಯಾಂಡ್ ಬೌಲರ್ಗಳ ಬೆಂಕಿಚೆಂಡಿಗೆ ತರಗೆಲೆಗಳಂತೆ ಉದುರಿದರು. ಆಸೀಸ್ ಪಡೆಯ ಬ್ಯಾಟಿಂಗ್ ದೈತ್ಯ ಡೇವಿಡ್ ವಾರ್ನರ್ 5 ರನ್ಗೆ ಔಟ್ ಆದರು. ಇದಾದ ಬಳಿಕ ತಂಡದ ಯಾವುದೇ ಬ್ಯಾಟರ್ ಪ್ರತಿರೋಧ ತೋರಲಿಲ್ಲ. ಗ್ಲೆನ್ ಮ್ಯಾಕ್ಸವೆಲ್ 28, ಪ್ಯಾಟ್ ಕಮಿನ್ಸ್ 21 ರನ್ ಗಳಿಸಿದ್ದೇ ಅಧಿಕ ಮೊತ್ತವಾಗಿತ್ತು.