ಟಿ20 ವಿಶ್ವಕಪ್​: ನೆದರ್ಲ್ಯಾಂಡ್‌​ ವಿರುದ್ಧ ಭಾರತಕ್ಕೆ 56 ರನ್​ ಜಯ; ಬಿ ಗುಂಪಿನಲ್ಲಿ ಅಗ್ರ ಸ್ಥಾನ

ಸಿಡ್ನಿಯಲ್ಲಿ ಭಾರತ ಮತ್ತೊಂದು ಗೆಲುವು ದಾಖಲಿಸಿತು. ಕ್ರಿಕೆಟ್​ ಕೂಸು ನೆದರ್ಲ್ಯಾಂಡ್‌​ ವಿರುದ್ಧ 56 ರನ್​ಗಳ ವಿಕ್ರಮ ಸಾಧಿಸಿ, 4 ಅಂಕಗಳೊಂದಿಗೆ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ.

ಸಿಡ್ನಿ(ಆಸ್ಟ್ರೇಲಿಯಾ):ಬ್ಯಾಟಿಂಗ್​, ಬೌಲಿಂಗ್​ನಲ್ಲಿ ಸಾಂಘಿಕ ಪ್ರದರ್ಶನ ತೋರಿದ ಭಾರತ, ಸಿಡ್ನಿ ಮೈದಾನದಲ್ಲಿ ಕ್ರಿಕೆಟ್​ ಕೂಸು ನೆದರ್ಲ್ಯಾಂಡ್‌​ ವಿರುದ್ಧ ನಡೆದ ಗುಂಪು ಹಂತದ 2ನೇ ಪಂದ್ಯದಲ್ಲಿ 56 ರನ್​ಗಳ ಮತ್ತೊಂದು ಗೆಲುವು ದಾಖಲಿಸಿತು. ಮೊದಲು ಬ್ಯಾಟ್​ ಮಾಡಿದ್ದ ಭಾರತ ನಾಯಕ ರೋಹಿತ್​ ಶರ್ಮಾ, ವಿರಾಟ್​ ಕೊಹ್ಲಿ, ಸೂರ್ಯಕುಮಾರ್​ ಯಾದವ್​ ಅವರ ಅರ್ಧಶತಕದ ಬಲದಿಂದ 179 ರನ್​ ಗಳಿಸಿತು. ನೆದರ್ಲ್ಯಾಂಡ್‌​ 9 ವಿಕೆಟ್​ ಕಳೆದುಕೊಂಡು 123 ರನ್​ ಗಳಿಗೆ ಸೋಲೊಪ್ಪಿಕೊಂಡಿತು.

ಬೌಲಿಂಗ್​ ಬಿಗಿಹಿಡಿತಕ್ಕೆ ನಲುಗಿದ ಡಚ್ಚರು:ಮೊದಲ ಪಂದ್ಯದಲ್ಲಿ ಪಾಕಿಸ್ತಾನಕ್ಕೆ ಮಣ್ಣುಮುಕ್ಕಿಸಿದ ಭಾರತದ ಆಟಗಾರರಿಗೆ ಕ್ರಿಕೆಟ್​ ಪಾಠ ಕಲಿಯುತ್ತಿರುವ ನೆದರ್​ಲ್ಯಾಂಡ್ ಯಾವುದೇ ಹಂತದಲ್ಲಿ ಸವಾಲು ಆಗಲಿಲ್ಲ. ಆರಂಭದಿಂದಲೇ ಡಚ್​ ಆಟಗಾರರ ಮೇಲೆ ಸವಾರಿ ಮಾಡಿದ ಬೌಲರ್​ಗಳು ರನ್​ ಗಳಿಸಲು ಅವಕಾಶ ನೀಡಲಿಲ್ಲ.

3 ಓವರ್​ ಎಸೆದ ಭುವನೇಶ್ವರ್​ ಕುಮಾರ್​ 2 ಓವರ್​ ಮೇಡನ್​ ಮಾಡಿ 9 ರನ್​ಗೆ 2 ವಿಕೆಟ್​ ಕಿತ್ತು ಪ್ರಭಾವಿಯಾದರು. ಇನ್ನೊಂದು ತುದಿಯಲ್ಲಿ ಮೊದಲ ಪಂದ್ಯದ ಹೀರೋ ಅರ್ಷದೀಪ್​ ಸಿಂಗ್​, ಸ್ಪಿನ್‌ದ್ವಯರಾದ ಅಕ್ಸರ್​ ಪಟೇಲ್​, ರವಿಚಂದ್ರನ್​ ಅಶ್ವಿನ್​ ತಲಾ 2 ವಿಕೆಟ್​ ಉರುಳಿಸಿದರು. ಮೊಹಮದ್​ ಶಮಿ 1 ವಿಕೆಟ್​ ಕಿತ್ತರು.

ಆರಂಭದಿಂದಲೇ ವಿಕೆಟ್​ ಕಳೆದುಕೊಳ್ಳುತ್ತಾ ಸಾಗಿದ ಡಚ್​ ಆಟಗಾರರು ದೊಡ್ಡ ಸಹಭಾಗಿತ್ವ ಕಟ್ಟಲಿಲ್ಲ. ಟಿಮ್​ ಪ್ರಿಂಗ್ಲೆ 20 ರನ್​ ಗಳಿಸಿದ್ದೇ ಅತ್ಯಧಿಕ ಮೊತ್ತವಾಗಿತ್ತು. ಮ್ಯಾಕ್ಸ್​ ಡೌಡ್​, ಬಸ್​ ಡೆ ಲಿಡೆ, ಶಾರೀಜ್ ಅಹ್ಮದ್​ ತಲಾ 16 ರನ್​ ಗಳಿಸಿದರೆ, ಕೊಲಿನ್​ ಅಕ್ಕರ್​ಮನ್​ 17 ರನ್​ ಮಾಡಿದರು. ಇದರಿಂದ 20 ಓವರ್​ಗಳಲ್ಲಿ 9 ವಿಕೆಟ್​ಗೆ 123 ರನ್ ಮಾತ್ರ ಗಳಿಸಲು ಶಕ್ತವಾಯಿತು. ಆಡಿದ 2 ಪಂದ್ಯಗಳಲ್ಲಿ ಡಚ್ಚರು ಎರಡನ್ನೂ ಸೋತು ಪಟ್ಟಿಯಲ್ಲಿ ಕೆಳ ಹಂತಕ್ಕೆ ಕುಸಿದರು.

ಭಾರತದ ತ್ರಿವಳಿಗಳ ಅರ್ಧಶತಕ:ಮೊದಲು ಬ್ಯಾಟ್​ ಮಾಡಿದ ಬಲಾಢ್ಯ ಬ್ಯಾಟಿಂಗ್​ ಪಡೆ ಇರುವ ಭಾರತಕ್ಕೆ ಆರಂಭಿಕ ಕೆ ಎಲ್​ ರಾಹುಲ್​ ಮತ್ತೆ ಕೈಕೊಟ್ಟರು. 9 ರನ್​ಗೆ ರಾಹುಲ್​ ವಾನ್​ ಮೀಕೆರೆನ್​ ಎಲ್​ಬಿ ಬಲೆಗೆ ಬಿದ್ದರು. ಇದಾದ ಬಳಿಕ ಬಂದ ಚೇಸ್​ ಮಾಸ್ಟರ್​ ವಿರಾಟ್​ ಕೊಹ್ಲಿ, ನಾಯಕ ರೋಹಿತ್​ ಜೊತೆಗೂಡಿ ನಿಧಾನವಾಗಿ ರನ್​ ಕಲೆಹಾಕಿದರು. ರೋಹಿತ್​ ಶರ್ಮಾ 3 ಸಿಕ್ಸರ್​ 4 ಬೌಂಡರಿ ಸಮೇತ 53 ರನ್​ ಗಳಿಸಿ ಔಟಾದರು.

ಮತ್ತೆ ಉದಯಿಸಿದ ಸೂರ್ಯ:ರೋಹಿತ್​ ಔಟಾದ ಬಳಿಕ ಕಣಕ್ಕಿಳಿದ ಡ್ಯಾಶಿಂಗ್​ ಬ್ಯಾಟರ್​ ಸೂರ್ಯಕುಮಾರ್​ ಯಾದವ್​ ಕಳೆದ ಪಂದ್ಯದಲ್ಲಿನ ರನ್​ ಬರ ನೀಗಿಸಿಕೊಂಡರು. ವಿರಾಟ್​ ಕೊಹ್ಲಿ ಒಂದೆಡೆ ಇನಿಂಗ್ಸ್​ ಕಟ್ಟುತ್ತಿದ್ದರೆ, ಹೊಡಿಬಡಿ ಆಟವಾಡಿದ ಯಾದವ್​ 7 ಬೌಂಡರಿ, 1 ಸಿಕ್ಸರ್​ಗಳಿಂದ 25 ಎಸೆತಗಳಲ್ಲಿ 51 ರನ್​ ಮಾಡಿದರು.

ವಿರಾಟ್​ ಕೊಹ್ಲಿ 2ನೇ ಅರ್ಧಶತಕ:ಪಾಕಿಸ್ತಾನ ವಿರುದ್ಧ ಗೆಲುವಿನ 82 ರನ್​ ಬಾರಿಸಿದ ವಿರಾಟ್​ ಕೊಹ್ಲಿ ಡಚ್ಚರ ವಿರುದ್ಧವೂ ಸಿಡಿದರು. 3 ಬೌಂಡರಿ, 2 ಸಿಕ್ಸರ್​ ಚಚ್ಚಿ 44 ಎಸೆತಗಳಲ್ಲಿ 62 ರನ್​ ಗಳಿಸಿದರು. ಈ ವಿಶ್ವಕಪ್​ನಲ್ಲಿ ಕೊಹ್ಲಿಗೆ ಇದು ಸತತ 2 ನೇ ಅರ್ಧಶತಕವಾಗಿದೆ.

ಪಟ್ಟಿಯಲ್ಲಿ ಭಾರತ ಟಾಪ್​:ಬಿ ಗುಂಪಿನಲ್ಲಿ 2 ಪಂದ್ಯವನ್ನಾಡಿ ಗೆದ್ದಿರುವ ಭಾರತ 4 ಅಂಕಗಳೊಂದಿಗೆ ಅಗ್ರಸ್ಥಾನ ಪಡೆಯಿತು. ಇಷ್ಟೇ ಪಂದ್ಯವಾಡಿರುವ ದಕ್ಷಿಣ ಆಫ್ರಿಕಾ 3 ಅಂಕಗಳೊಂದಿಗೆ 2 ನೇ ಸ್ಥಾನದಲ್ಲಿದೆ. ಜಿಂಬಾಬ್ವೆ ವಿರುದ್ಧದ ಪಂದ್ಯ ಮಳೆಯಿಂದಾಗಿ ರದ್ದಾಗಿ 1 ಅಂಕ ಪಡೆದಿದೆ. ಬಾಂಗ್ಲಾದೇಶ ತಂಡ 2 ರಲ್ಲಿ ತಲಾ 1 ಸೋತು, ಗೆದ್ದು 2 ಅಂಕದೊಂದಿಗೆ 3 ನೇ ಸ್ಥಾನದಲ್ಲಿದೆ.

ಇದನ್ನೂ ಓದಿ:ಸಮಾನ ವೇತನ ಪ್ರಕಟಿಸಿದ ಬಿಸಿಸಿಐ ನಿರ್ಧಾರಕ್ಕೆ ಮಹಿಳಾ ಆಯೋಗ, ಆಟಗಾರ್ತಿಯರೂ ಖುಷ್​