ಗೆಲುವಿನ ಅಂಚಿನಲ್ಲಿ ಬಾಂಗ್ಲಾಗೆ ಶರಣಾದ ಜಿಂಬಾಬ್ವೆ: ಮತ್ತೊಂದು ಅಚ್ಚರಿ 3 ರನ್ನಿಂದ ಮಿಸ್​

ಕಳೆದ ಪಂದ್ಯದಲ್ಲಿ ಪಾಕಿಸ್ತಾನವನ್ನು ಸೋಲಿಸಿ ಅಚ್ಚರಿ ಮೂಡಿಸಿದ್ದ ಜಿಂಬಾಬ್ವೆ ತಂಡ ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ಗೆಲುವಿನ ತುದಿಯಲ್ಲಿ ಸೋಲು ಕಂಡಿತು.

ಟಿ20 ವಿಶ್ವಕಪ್​ನ​ಲ್ಲಿ ಪಾಕಿಸ್ತಾನದ ವಿರುದ್ಧ ಐತಿಹಾಸಿಕ ಗೆಲುವು ಸಾಧಿಸಿದ್ದ ಕ್ರಿಕೆಟ್​ ಶಿಶು ಜಿಂಬಾಬ್ವೆ ಮತ್ತೊಂದು ಗೆಲುವಿನ ಹೊಸ್ತಿಲಲ್ಲಿ ಎಡವಿತು. ಬ್ರಿಸ್ಬೇನ್​ನ ಗಬ್ಬಾ ಕ್ರೀಡಾಂಗಣದಲ್ಲಿ ಬಾಂಗ್ಲಾದೇಶ ವಿರುದ್ಧ ನಡೆದ ಪಂದ್ಯದಲ್ಲಿ ಜಿಂಬಾಬ್ವೆ 3 ರನ್ನಿಂದ ಪರಾಭವಗೊಂಡಿತು. ಇದು ಪಾಕ್​ ವಿರುದ್ಧದ ಪಂದ್ಯದ ರೋಚಕತೆಯನ್ನೇ ಮರುಕಳಿಸಿತು.

ಟಾಸ್​ ಗೆದ್ದ ಬಾಂಗ್ಲಾದೇಶ ಮೊದಲು ಬ್ಯಾಟ್​ ಮಾಡಿ 7 ವಿಕೆಟ್​ಗೆ 150 ರನ್​ ಗಳಿಸಿತು. ಸವಾಲಿನ ಗುರಿ ಚೇಸ್​ ಮಾಡಿದ ಜಿಂಬಾಬ್ವೆ ದಿಟ್ಟ ಹೋರಾಟ ನೀಡಿ 8 ವಿಕೆಟ್​ಗೆ 147 ರನ್​ ಮಾಡಿತು. ಬಾಂಗ್ಲಾ ಟೈಗರ್ಸ್​ 3 ರನ್ನಿಂದ ಗೆದ್ದು ಅಂಕ ಪಟ್ಟಿಯಲ್ಲಿ 4 ಅಂಕಗಳೊಂದಿಗೆ 2 ನೇ ಸ್ಥಾನಕ್ಕೆ ಜಿಗಿಯಿತು.

ಸೀನ್​ ವಿಲಿಯಮ್ಸ್​ ಏಕಾಂಗಿ ಫೈಟ್​:ವಿಶ್ವಕಪ್​ನಲ್ಲಿ ಅಚ್ಚರಿಯ ಫಲಿತಾಂಶ ನೀಡಿದ್ದ ಕ್ರೇಗ್​ ಇರ್ವಿನ್​ ಪಡೆ ಬಾಂಗ್ಲಾದೇಶ ವಿರುದ್ಧವೂ ಮತ್ತೊಂದು ಶಾಕಿಂಗ್​ ಇನಿಂಗ್ಸ್​ ಕಟ್ಟಿತು. ಆರಂಭಿಕರು ಕೈಕೊಟ್ಟರೂ ಏಕಾಂಗಿ ಹೋರಾಟ ನಡೆಸಿದ ಸೀನ್​ ವಿಲಿಯಮ್ಸ್​ 42 ಎಸೆತಗಳಲ್ಲಿ 8 ಬೌಂಡರಿ ಸಮೇತ 64 ರನ್​ ಚಚ್ಚಿದರು. ರೇಗಿಸ್​​ ಚಕಬ್ವಾ 15, ರ್ಯಾನ್​ ಬರ್ಲ್ ಔಟಾಗದೇ​ 27 ರನ್​ ಗಳಿಸಿದರು. ಪಂದ್ಯ ಗೆಲ್ಲಲು 8 ಎಸೆತಗಳಲ್ಲಿ 16 ರನ್​ ಅಗತ್ಯವಿದ್ದಾಗ ಸೀನ್​ ವಿಲಿಯಮ್ಸ್​ ರನೌಟ್​ ಆದರು.

ಬಳಿಕ ಸತತ 2 ವಿಕೆಟ್​ ಕಳೆದುಕೊಂಡು ಒತ್ತಡಕ್ಕೊಳಗಾದ ಜಿಂಬಾಬ್ವೆ ಕೊನೆಯಲ್ಲಿ 3 ರನ್ನಿಂದ ಸೋತು ಮತ್ತೊಂದು ದಾಖಲೆಯ ಗೆಲುವಿನಿಂದ ತಪ್ಪಿಸಿಕೊಂಡಿತು. ಬಾಂಗ್ಲಾ ಪರವಾಗಿ ಟಸ್ಕಿನ್​ ಅಹ್ಮದ್​ 3, ಮೊಸಾದ್ದೆಕ್​ ಹೋಸೈನ್​, ಮುಸ್ತಾಫಿಜರ್​ ರೆಹಮಾನ್​ ತಲಾ 2 ವಿಕೆಟ್​ ಪಡೆದರು.

ಬಾಂಗ್ಲಾಗೆ ಶ್ಯಾಂಟೋ ಅರ್ಧಶತಕದ ನೆರವು​:ಮೊದಲು ಬ್ಯಾಟ್​ ಮಾಡಿದ ಬಾಂಗ್ಲಾದೇಶ ಗೆಲ್ಲಲೇಬೇಕಾದ ಪಂದ್ಯದಲ್ಲಿ ಎಚ್ಚರಿಕೆಯ ಆಟವಾಡಿತು. ಆರಂಭಿಕ ನಜ್ಮುಲ್​ ಹೊಸೈನ್​ ಶ್ಯಾಂಟೋ 55 ಎಸೆತಗಳಲ್ಲಿ 7 ಬೌಂಡರಿ 1 ಸಿಕ್ಸರ್​ ನೆರವಿನಿಂದ 70 ರನ್​ ಗಳಿಸಿದ ತಂಡಕ್ಕೆ ಆಧಾರವಾದರು. ಸೌಮ್ಯ ಸರ್ಕಾರ್​(0) ಮತ್ತೆ ಫೇಲ್​ ಆದರೆ, ಲಿಟನ್​ ದಾಸ್​ 14, ಶಕೀಬ್​ ಅಲ್​ ಹಸನ್​ 23, ಅಫಿಫ್​ ಹೊಸೈನ್​ 29 ರನ್​ ಗಳಿಸಿದರು.

ಬಾಂಗ್ಲಾ 20 ಓವರ್​ಗಳಲ್ಲಿ 7 ವಿಕೆಟ್​ ಕಳೆದುಕೊಂಡು 150 ರನ್​ ಗಳಿಸಿತು. ಜಿಂಬಾಬ್ವೆ ಪರವಾಗಿ ಕಳೆದ ಪಂದ್ಯದ ಹೀರೋ ರಿಚರ್ಡ್​ ನಗರ್ವ, ಬ್ಲೆಸ್ಸಿಂಗ್​ ಮುಜರಬಾನಿ ತಲಾ 2 ವಿಕೆಟ್​ ಕಿತ್ತರು.

ಇದನ್ನೂ ಓದಿ:ಭಾರತ ದಕ್ಷಿಣ ಆಫ್ರಿಕಾ ಪಂದ್ಯಕ್ಕೂ ಮಳೆ ಅಡ್ಡಿ?; ಮ್ಯಾಚ್​​ ನಡೆಯುವ ಸಾಧ್ಯತೆ 50:50