ವಿರಾಟ್​ ಕೊಹ್ಲಿಯೂ ಸಾಧಿಸದ ದಾಖಲೆ ಬರೆದ ಸೂರ್ಯಕುಮಾರ್​​​.. ಏನದು?

ಟಿ20 ಇತಿಹಾಸದಲ್ಲಿಯೇ ಕ್ಯಾಲೆಂಡರ್​ ವರ್ಷದಲ್ಲಿ 1 ಸಾವಿರ ರನ್​ ಪೂರೈಸಿದ ಭಾರತದ ಮೊದಲ, ವಿಶ್ವದ 2ನೇ ಬ್ಯಾಟರ್​ ಎಂಬ ದಾಖಲೆಯನ್ನು ಸೂರ್ಯಕುಮಾರ್​ ಯಾದವ್​ ಬರೆದರು.

ಮೆಲ್ಬೋರ್ನ್(ಆಸ್ಟ್ರೇಲಿಯಾ):ಭರ್ಜರಿ ಬ್ಯಾಟಿಂಗ್​​ನಿಂದಾಗಿ ಟಿ20 ರ‍್ಯಾಂಕಿಂಗ್​ನಲ್ಲಿ ನಂ.1 ಸ್ಥಾನದಲ್ಲಿರುವ ಸೂರ್ಯಕುಮಾರ್​ ಯಾದವ್​ ಈ ಕ್ಯಾಲೆಂಡರ್​ ವರ್ಷದಲ್ಲಿ 1 ಸಾವಿರಕ್ಕೂ ಅಧಿಕ ರನ್​ ಗಳಿಸಿದ್ದಾರೆ. ಈ ದಾಖಲೆ ಮಾಡಿದ ಭಾರತದ ಮೊದಲ ಮತ್ತು ವಿಶ್ವದ 2ನೇ ಆಟಗಾರ ಎಂಬ ಖ್ಯಾತಿ ಪಡೆದರು. ಪಾಕಿಸ್ತಾನದ ಮೊಹಮ್ಮದ್​ ರಿಜ್ವಾನ್​ ಈ ದಾಖಲೆ ಮಾಡಿದ ಮೊದಲಿಗ.

ಟಿ20 ವಿಶ್ವಕಪ್​ನಲ್ಲಿ ಭಾನುವಾರ ನಡೆದ ಜಿಂಬಾಬ್ವೆ ವಿರುದ್ಧದ ಗುಂಪು ಹಂತದ ಕೊನೆಯ ಪಂದ್ಯದಲ್ಲಿ ಸೂರ್ಯಕುಮಾರ್​ ಭರ್ಜರಿ ಅರ್ಧಶತಕ ಸಿಡಿಸಿದರು. 244ರ ಸ್ಟ್ರೈಕ್​ರೇಟ್​ನಲ್ಲಿ ಬ್ಯಾಟ್​ ಬೀಸಿ 61 ರನ್​ ಗಳಿಸಿದ ಸೂರ್ಯ, ಈ ವಿಶ್ವಕಪ್​ನ ಮೂರನೇ ಫಿಫ್ಟಿ ಬಾರಿಸುವ ಮೂಲಕ 1 ಸಾವಿರ ರನ್​ ಸಾಧನೆಗೆ ಪಾತ್ರರಾದರು.

ಸೂರ್ಯಕುಮಾರ್​ ಯಾದವ್​ ಈ ವರ್ಷ ಆಡಿದ 28 ಇನ್ನಿಂಗ್ಸ್‌ಗಳಲ್ಲಿ 44.60 ಸರಾಸರಿಯಲ್ಲಿ 1,026 ರನ್ ಗಳಿಸಿದ್ದಾರೆ. ಇದರಲ್ಲಿ 1 ಶತಕ ಮತ್ತು 9 ಅರ್ಧಶತಕಗಳು ಅವರ ಬ್ಯಾಟ್‌ನಿಂದ ಸಿಡಿದಿವೆ. 117 ಅತ್ಯುತ್ತಮ ಸ್ಕೋರ್ ಆಗಿದೆ.

ಟಿ20 ಇತಿಹಾಸದಲ್ಲಿಯೇ ಕ್ಯಾಲೆಂಡರ್ ವರ್ಷವೊಂದರಲ್ಲಿ ಸಾವಿರ ರನ್ ಗಳಿಸಿದ 2ನೇ ಆಟಗಾರ ಎಂಬ ದಾಖಲೆಯನ್ನು ಸೂರ್ಯಕುಮಾರ್​ ಬರೆದರು. 2021ರಲ್ಲಿ ಪಾಕಿಸ್ತಾನದ ಬ್ಯಾಟರ್ ಮೊಹಮ್ಮದ್ ರಿಜ್ವಾನ್ 73.66ರ ಸರಾಸರಿಯಲ್ಲಿ 1,326 ರನ್ ಕಲೆ ಹಾಕಿದ್ದರು. ಆ ವರ್ಷದಲ್ಲಿ ರಿಜ್ವಾನ್ 1 ಶತಕ ಮತ್ತು 12 ಅರ್ಧ ಶತಕಗಳನ್ನು ಗಳಿಸಿದ್ದರು. ರಿಜ್ವಾನ್​ ದಾಖಲೆ ಮುರಿಯಲು ಸೂರ್ಯ 300 ರನ್​ ಹಿಂದಿದ್ದಾರೆ.

ಸದ್ಯ ವಿಶ್ವಕಪ್​ನಲ್ಲಿ ಭರ್ಜರಿ ಬ್ಯಾಟಿಂಗ್​​ ಮಾಡುತ್ತಿರುವ ಸೂರ್ಯಕುಮಾರ್​ ಯಾದವ್​ ಮೂರು ಅರ್ಧಶತಕ ಬಾರಿಸಿದ್ದಾರೆ. ಇದರಲ್ಲಿ 2 ಬಾರಿ ಪಂದ್ಯಶ್ರೇಷ್ಠ ಪ್ರಶಸ್ತಿಗೂ ಭಾಜನರಾಗಿದ್ದಾರೆ.

ಓದಿ:ಜಿಂಬಾಬ್ವೆ ವಿರುದ್ಧ ಭಾರತಕ್ಕೆ 71 ರನ್​ ಗೆಲುವು: ಸೆಮೀಸ್​ನಲ್ಲಿ ಇಂಗ್ಲೆಂಡ್​ ವಿರುದ್ಧ ಸೆಣಸು