ವೆಂಕಟೇಶ್​- ಸೂರ್ಯಕುಮಾರ್ ಅಬ್ಬರ: ವಿಂಡೀಸ್​ಗೆ 185 ರನ್​ಗಳ ಗುರಿ ನೀಡಿದ ಭಾರತ

ಕೋಲ್ಕತ್ತಾದ ಈಡನ್ ಗಾರ್ಡನ್​​ನಲ್ಲಿ ನಡೆಯುತ್ತಿರುವ ಅಂತಿಮ ಪಂದ್ಯದಲ್ಲಿ ಟಾಸ್​ ಸೋತು ಬ್ಯಾಟಿಂಗ್​ ಇಳಿದಿದ್ದ ಭಾರತ ತಂಡ ಆರಂಭಿಕ ಆಘಾತದ ನಡುವೆಯೂ ಸೂರ್ಯಕುಮಾರ್ ಯಾದವ್​ ಅವರ ಅರ್ಧಶತಕದ ನೆರವಿನಿಂದ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಿತು.

ಕೋಲ್ಕತ್ತಾ: ಸೂರ್ಯಕುಮಾರ್ ಯಾದವ್​ ಮತ್ತು ವೆಂಕಟೇಶ್​ ಅಯ್ಯರ್​ ಅವರ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ಭಾರತ ತಂಡ ಪ್ರವಾಸಿ ವೆಸ್ಟ್​ ಇಂಡೀಸ್​ಗೆ 185 ರನ್​ಗಳ ಗುರಿ ನೀಡಿದೆ.

ಕೋಲ್ಕತ್ತಾದ ಈಡನ್ ಗಾರ್ಡನ್​​ನಲ್ಲಿ ನಡೆಯುತ್ತಿರುವ ಅಂತಿಮ ಪಂದ್ಯದಲ್ಲಿ ಟಾಸ್​ ಸೋತು ಬ್ಯಾಟಿಂಗ್​ ಇಳಿದಿದ್ದ ಭಾರತ ತಂಡ ಆರಂಭಿಕ ಆಘಾತದ ನಡುವೆಯೂ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಿತು. ಸೂರ್ಯಕುಮಾರ್ ಯಾದವ್​ 31 ಎಸೆತಗಳಲ್ಲಿ 1 ಬೌಂಡರಿ ಮತ್ತು 7 ಸಿಕ್ಸರ್​ಗಳ ಸಹಿತ 65 ರನ್​ಗಳಿಸಿದರೆ, ಇವರಿಗೆ ಸಾಥ್ ನೀಡಿದ ವೆಂಕಟೇಶ್ ಅಯ್ಯರ್​ 19 ಎಸೆತಗಳಲ್ಲಿ 4 ಬೌಂಡರಿ, 2 ಸಿಕ್ಸರ್ ಸಹಿತ ಅಜೇಯ 35 ರನ್​ಗಳಿಸಿದರು. 13.5 ಓವರ್​ಗಳಲ್ಲಿ 93ಕ್ಕೆ4 ವಿಕೆಟ್​ ಕಳೆದುಕೊಂಡಿದ್ದ ಸಂದರ್ಭದಲ್ಲಿ ಒಂದಾದ ಈ ಜೋಡಿ 37 ಎಸೆತಗಳಲ್ಲಿ 91ರನ್​ ಸೂರೆಗೈದು ಬೃಹತ್​ ಮೊತ್ತಕ್ಕೆ ಕಾರಣರಾದರು.

ಸರಣಿಯಲ್ಲಿ 3ನೇ ಬಾರಿ ಇನ್ನಿಂಗ್ಸ್ ಆರಂಭಿಸಿದ ಇಶಾನ್ ಕಿಶನ್​ 31 ಎಸೆತಗಳಲ್ಲಿ 34 ರನ್​ ಮತ್ತು ಸರಣಿಯಲ್ಲಿ ಮೊದಲ ಅವಕಾಶ ಪಡೆದಿದ್ದ ರುತುರಾಜ್ 4 ರನ್​ಗಳಿಗೆ ವಿಕೆಟ್ ಒಪ್ಪಿಸಿ ವೈಫಲ್ಯ ಅನುಭವಿಸಿದರು.

3ನೇ ಕ್ರಮಾಂಕಕ್ಕೆ ಬಡ್ತಿಪಡೆದು ಬಂದ ಶ್ರೇಯಸ್​ ಅಯ್ಯರ್​ 16 ಎಸೆತಗಳಲ್ಲಿ 25, 4ನೇ ಕ್ರಮಾಂಕಕ್ಕೆ ಹಿಂಬಡ್ತಿ ಪಡೆದಿದ್ದ ರೋಹಿತ್ ಶರ್ಮಾ 15 ಎಸೆತಗಳಲ್ಲಿ 7 ರನ್​ಗಳಿಸಿ ಔಟಾದರು.

ವಿಂಡೀಸ್ ಪರ ಜೇಸನ್​ ಹೋಲ್ಡರ್​, ರಾಸ್ಟನ್ ಚೇಸ್​, ಡೊಮೆನಿಕ್ ಡ್ರೇಕ್ಸ್​ ಹೇಡನ್​ ವಾಲ್ಶ್​ ಮತ್ತು ರೊಮಾರಿಯೋ ಶೆಫರ್ಡ್​ ತಲಾ ಒಂದು ವಿಕೆಟ್ ಪಡೆದರು.

ಇದನ್ನೂ ಓದಿ:ಭಾರತ ತಂಡದಿಂದ ಕೈಬಿಟ್ಟ ಮಾರನೇ ದಿನವೇ 83 ಎಸೆತಗಳಲ್ಲಿ 91 ರನ್​ ಸಿಡಿಸಿದ ಪೂಜಾರ