ಆಸ್ಟ್ರೇಲಿಯಾ ಕ್ರಿಕೆಟಿಗ ಸ್ಟೀವ್ ಸ್ಮಿತ್ ಈ ಹಿಂದೆ ಇಂಡಿಯನ್ ಪ್ರೀಮಿಯರ್ ಲೀಗ್ 2023 ರಲ್ಲಿ ಭಾಗವಹಿಸುವುದಾಗಿ ಟ್ವೀಟಿಸಿದ್ದರು. ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಪೋಸ್ಟ್ ಮಾಡಿದ್ದ ಅವರು, 'ಭಾರತದ ಅಸಾಧಾರಣ ತಂಡ'ವನ್ನು ಸೇರಲಿದ್ದೇನೆ ಎಂದು ಹೇಳಿದ್ದರು.
ಈ ಬಾರಿಯ ಐಪಿಎಲ್ ಮನರಂಜನೆ ವೀಕ್ಷಿಸಲು ಎರಡು ವೇದಿಕೆ ಬೇರೆ ಬೇರೆ ಒಡೆತನದ ಕಂಪನಿಗಳ ಕೈಯಲ್ಲಿ ಇರುವುದರಿಂದ ಜನರನ್ನು ಸೆಳೆಯಲು ಎರಡೂ ಸಂಸ್ಥೆಗಳು ವಿಭಿನ್ನ ಪ್ರಯತ್ನ ಮಾಡುತ್ತಿವೆ. ಇದರ ಫಲವಾಗಿ ಸ್ಟೀವ್ ಸ್ಮಿತ್ ಅವರನ್ನು ಸ್ಟಾರ್ ಸ್ಟೋರ್ಟ್ ಸಂಸ್ಥೆ ಕಾಮೆಂಟೆಟರ್ ಆಗಿ ತಮ್ಮ ಬಳಗಕ್ಕೆ ಸೇರಿಸಿಕೊಂಡಿದೆ.
ಸ್ಮಿತ್ ವೀಕ್ಷಕ ವಿವರಣೆಗಾರರಾಗಿ ಸೇರಿರುವ ಬಗ್ಗೆ ಸ್ಟಾರ್ ಸ್ಪೋರ್ಟ್ ಟ್ವಿಟ್ ಮಾಡಿ ತಿಳಿಸಿದೆ. ನಮ್ಮ ತಜ್ಞರ ತಂಡಕ್ಕೆ ಮತ್ತೊಬ್ಬ ವಿಶೇಷ ಸ್ಟಾರ್ ಸೇರ್ಪಡೆಯಾಗಿದ್ದಾರೆ. ನಾವು ಅವರನ್ನು ಸ್ವಾಗತಿಸಲು ಹೆಮ್ಮೆಪಡುತ್ತೇವೆ. ಇನ್ಕ್ರೆಡಿಬಲ್ ಸ್ಟಾರ್ ಕಾಸ್ಟ್ ಸ್ಟೀವ್ ಸ್ಮಿತ್ಗೆ ಸ್ವಾಗತ. ಮಾರ್ಚ್ 31 ರಿಂದ ಸ್ಟಾರ್ ಸ್ಪೋರ್ಟ್ನಲ್ಲಿ ನೋಡಿ ಎಂದು ತಿಳಿಸಿದೆ.
ಸ್ಮಿತ್ ಕೊನೆಯ ಬಾರಿಗೆ 2021 ರ ಆವೃತ್ತಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪ್ರತಿನಿಧಿಸಿದಾಗ ಐಪಿಎಲ್ ಪಂದ್ಯ ಆಡಿದ್ದರು. ಇವರು 103 ಪಂದ್ಯಗಳನ್ನು ಆಡಿದ್ದು, 2485 ರನ್ ಗಳಿಸಿದ್ದಾರೆ. ಇವರ ಅತ್ಯಧಿಕ ಸ್ಕೋರ್ 101 ಆಗಿದೆ. ಆದರೆ, ಐಪಿಎಲ್ 2022 ರ ಮೆಗಾ ಹರಾಜಿನಲ್ಲಿ ಮಾರಾಟವಾಗದ ಕಾರಣ ಯಾವುದೇ ತಂಡಕ್ಕೆ ಸೇರಿರಲಿಲ್ಲ. ಈ ಬಾರಿಯ ಐಪಿಎಲ್ ವೀಕ್ಷಕ ವಿವರಣೆಕಾರರಾಗಿ ಸ್ಥಾನ ಪಡೆದುಕೊಂಡಿದ್ದಾರೆ.