ದುಬೈ:ಪ್ರಸಕ್ತ ಸಾಲಿನ ಏಷ್ಯಾ ಕಪ್ ಗೆಲ್ಲುವ ನೆಚ್ಚಿನ ತಂಡವಾಗಿ ಟೂರ್ನಮೆಂಟ್ನಲ್ಲಿ ಭಾಗಿಯಾಗಿದ್ದ ರೋಹಿತ್ ಶರ್ಮಾ ನಾಯಕತ್ವದ ಹಾಲಿ ಚಾಂಪಿಯನ್ ಟೀಂ ಇಂಡಿಯಾ ಫೈನಲ್ ಹಾದಿ ಕಠಿಣವಾಗಿದೆ. 'ಮಾಡು ಇಲ್ಲವೇ ಮಡಿ' ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಎಡವಿಬಿದ್ದ ಭಾರತ, ಪ್ರಶಸ್ತಿ ಸುತ್ತು ತಲುಪಬೇಕಾದರೆ ಇತರೆ ಪಂದ್ಯಗಳ ಫಲಿತಾಂಶಗಳನ್ನೇ ಅವಲಂಬಿಸಬೇಕಿದೆ.
ದುಬೈನ ಅಂತಾರಾಷ್ಟ್ರೀಯ ಮೈದಾನದಲ್ಲಿ ನಡೆದ ಸೂಪರ್ 4 ಹಂತದ ನಾಲ್ಕನೇ ಪಂದ್ಯದಲ್ಲಿ ಭಾರತದ ವಿರುದ್ಧ ಶ್ರೀಲಂಕಾ 6 ವಿಕೆಟ್ಗಳ ಜಯ ಸಾಧಿಸಿತು. ಆಡಿರುವ ಎರಡು ಪಂದ್ಯಗಳಲ್ಲಿ ಗೆದ್ದು ಫೈನಲ್ ಹಾದಿ ಸುಗುಮಗೊಳಿಸಿದೆ. ಆದರೆ, ಸೂಪರ್ ಫೋರ್ನಲ್ಲಿ ಟೀಂ ಇಂಡಿಯಾ ಸತತ 2ನೇ ಸೋಲು ಕಂಡಿದೆ.
ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ರೋಹಿತ್ ಬಳಗ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 173 ರನ್ ಗಳಿಸಿತ್ತು. ಈ ಗುರಿ ಬೆನ್ನತ್ತಿದ ಸಿಂಹಳೀಯರು ಒಂದು ಎಸೆತ ಬಾಕಿ ಇರುವಂತೆ 4 ವಿಕೆಟ್ ಕಳೆದುಕೊಂಡು ಗೆಲುವಿನ ನಗೆ ಬೀರಿದರು.
ಟೀಂ ಇಂಡಿಯಾ ಇನ್ನಿಂಗ್ಸ್ ಹೀಗಿತ್ತು..:ಟಾಸ್ ಸೋತು ಬ್ಯಾಟ್ ಮಾಡಿದ ಟೀಂ ಇಂಡಿಯಾ ಉತ್ತಮ ಆರಂಭ ಪಡೆದುಕೊಳ್ಳಲಿಲ್ಲ. ಕೆ.ಎಲ್.ರಾಹುಲ್(6) ಔಟಾದರು. ವಿರಾಟ್ ಕೊಹ್ಲಿ(0) ಕ್ಲೀನ್ ಬೌಲ್ಡ್ ಆದರು. ಹೀಗಾಗಿ, ತಂಡ ಕೇವಲ 13 ರನ್ ಗಳಿಸುವಷ್ಟರಲ್ಲಿ 2 ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಬಳಿಕ ಕ್ರೀಸಿನಲ್ಲಿ ಒಂದಾದ ರೋಹಿತ್-ಸೂರ್ಯ ಜೋಡಿ 97 ರನ್ಗಳ ಜೊತೆಯಾಟ ನೀಡಿದರು.
ಇದನ್ನೂ ಓದಿ:ರವೀಂದ್ರ ಜಡೇಜಾ ಮೊಣಕಾಲು ಶಸ್ತ್ರಚಿಕಿತ್ಸೆ ಯಶಸ್ವಿ..ಅನಾರೋಗ್ಯದಿಂದ ಆವೇಶ್ಖಾನ್ ಟೂರ್ನಿಯಿಂದ ಔಟ್
ಹಿಟ್ಮ್ಯಾನ್ ಖ್ಯಾತಿಯ ರೋಹಿತ್ ಶರ್ಮಾ 72 ರನ್, ಸೂರ್ಯಕುಮಾರ್ ಯಾದವ್ 34 ರನ್ಗಳಿಕೆ ಮಾಡಿದರು. ಇವರ ವಿಕೆಟ್ ಬೀಳುತ್ತಿದ್ದಂತೆ ಹಾರ್ದಿಕ್ ಪಾಂಡ್ಯ (17), ಪಂತ್ (17), ದೀಪಕ್ ಹೂಡಾ (3) ಹಾಗೂ ಅಶ್ವಿನ್ ಅಜೇಯ(15) ರನ್ಗಳಿಕೆ ಮಾಡಿದರು.
ಲಂಕಾ ಪರ ದಿಲ್ಯಾನ್ 3 ವಿಕೆಟ್, ಕರುಣರತ್ನೆ, ಶಾನಕ ತಲಾ 2 ವಿಕೆಟ್ ಪಡೆದುಕೊಂಡರೆ, ತೀಕ್ಷಣ 1 ವಿಕೆಟ್ ಕಿತ್ತರು.
ಸಿಂಹಳೀಯರ ಇನ್ನಿಂಗ್ಸ್:174 ರನ್ಗಳ ಸ್ಪರ್ಧಾತ್ಮಕ ಗುರಿ ಬೆನ್ನತ್ತಿದ ಶ್ರೀಲಂಕಾ ತಂಡ ಉತ್ತಮ ಆರಂಭ ಪಡೆದುಕೊಂಡಿತು. ಆರಂಭಿಕ ಜೋಡಿ ನಿಸ್ಸಾಂಕ-ಕುಸಾಲ್ ಮೆಂಡಿಸ್ ತಂಡಕ್ಕೆ ಸ್ಫೋಟಕ ಆರಂಭ ಒದಗಿಸಿದರು. ಈ ಜೋಡಿ ಮೊದಲ ವಿಕೆಟ್ಗೆ 97 ರನ್ ಆಟವಾಡಿತು. ಕೊನೆಗೂ, ಈ ಜೋಡಿಯ ವಿಕೆಟ್ ಪಡೆದುಕೊಳ್ಳುವಲ್ಲಿ ಯಶಸ್ವಿಯಾದ ಟೀಂ ಇಂಡಿಯಾ ಬೌಲರ್ಸ್ ಕಮ್ಬ್ಯಾಕ್ ಮಾಡಿದ್ದರು. ಮಧ್ಯಮ ಕ್ರಮಾಂಕದ ಅಸಲಂಕಾ(0) ಹಾಗೂ ಗುಣತಿಲಕ(1) ವಿಕೆಟ್ ಪಡೆದು ಗೆಲುವಿನ ಮುನ್ಸೂಚನೆ ನೀಡಿದ್ದರು. ಆದರೆ, ಈ ವೇಳೆ ಒಂದಾದ ರಾಜಪಕ್ಸೆ ಹಾಗೂ ಕ್ಯಾಪ್ಟನ್ ಶಾನಕ ತಂಡವನ್ನು ಗೆಲ್ಲಿಸಿಕೊಟ್ಟರು.
ರಾಜಪಕ್ಸೆ-ಶಾನಕರನ್ನು ಕಾಡಿದ ಅರ್ಷ್‌ದೀಪ್: ಶ್ರೀಲಂಕಾ ತಂಡಕ್ಕೆ ಕೊನೆ ಓವರ್ನಲ್ಲಿ ಗೆಲುವು ಸಾಧಿಸಲು 7 ರನ್ಗಳ ಅವಶ್ಯಕತೆ ಇತ್ತು. ಅತ್ಯುತ್ತಮವಾಗಿ ಬೌಲಿಂಗ್ ಮಾಡಿದ ಅರ್ಷ್‌ದೀಪ್ ಲಂಕಾ ಬ್ಯಾಟರ್ಗಳನ್ನು ಇಕ್ಕಟ್ಟಿಗೆ ಸಿಲುಕಿಸಿದ್ದರು. ಮೊದಲ ನಾಲ್ಕು ಎಸೆತಗಳಲ್ಲಿ ಕೇವಲ 5ರನ್ ಬಿಟ್ಟುಕೊಟ್ಟರು. ಆದರೆ, 5ನೇ ಎಸೆತದಲ್ಲಿ ರನೌಟ್ ಮಾಡುವ ಭರದಲ್ಲಿ ಥ್ರೋ ಮಾಡಲು ಹೋಗಿ ಎರಡು ರನ್ ಬಿಟ್ಟುಕೊಟ್ಟರು. ಜೊತೆಗೆ ರನ್ಔಟ್ ಅವಕಾಶ ಸಹ ತಪ್ಪಿಸಿಕೊಂಡರು. ಹೀಗಾಗಿ, ಶ್ರೀಲಂಕಾ ಜಯ ಸಾಧಿಸಿತು. ಈ ಗೆಲುವಿನೊಂದಿಗೆ ಶ್ರೀಲಂಕಾ ತಂಡವು ಏಷ್ಯಾ ಕಪ್ ಫೈನಲ್ ಆಡುವುದನ್ನು ಖಚಿತಪಡಿಸಿಕೊಂಡಿದೆ.
ಟೀಂ ಇಂಡಿಯಾ ಪರ ಚಹಲ್ 3 ವಿಕೆಟ್ ಪಡೆದುಕೊಂಡರೆ, ಆರ್.ಅಶ್ವಿನ್ 1 ವಿಕೆಟ್ ಕಿತ್ತರು. ಉಳಿದಂತೆ ಯಾವುದೇ ಬೌಲರ್ ಕೂಡಾ ಗಮನಾರ್ಹ ಪ್ರದರ್ಶನ ನೀಡಲಿಲ್ಲ.
