ಬಾಕಿಂಗ್ಸ್​ ಡೇ ಟೆಸ್ಟ್​: ರಬಾಡಗೆ 5 ವಿಕೆಟ್‌; ಭಾರತಕ್ಕೆ ಆಸರೆಯಾದ ಕೆ.ಎಲ್‌.ರಾಹುಲ್​ ಏಕಾಂಗಿ ಪ್ರದರ್ಶನ

IND vs RSA 1st Test: ಭಾರತ-ದಕ್ಷಿಣ ಆಫ್ರಿಕಾ ನಡುವಣ ಬಾಕ್ಸಿಂಗ್‌ ಡೇ ಮೊದಲ ಟೆಸ್ಟ್‌ ಪಂದ್ಯದ ಮೊದಲ ದಿನದಾಟ ಮುಗಿದಿದೆ.

ಸೆಂಚುರಿಯನ್(ದಕ್ಷಿಣ ಆಫ್ರಿಕಾ): ಕಗಿಸೊ ರಬಾಡ ಕರಾರುವಾಕ್ ಬೌಲಿಂಗ್​ ದಾಳಿಯೆದುರು ಭಾರತೀಯರ ಬ್ಯಾಟಿಂಗ್​ ಮಂಕಾಯಿತು. 59 ಓವರ್​​ಗಳ ಪಂದ್ಯ ನಡೆಯುತ್ತಿದ್ದಂತೆ ಮಳೆ ಸುರಿದು ದಿನದಾಟ ಕೊನೆಗೊಂಡಿತು. ಭಾರತ 8 ವಿಕೆಟ್​ ಕಳೆದುಕೊಂಡು 208 ರನ್​ ಗಳಿಸಿದೆ. ರಬಾಡ 5 ವಿಕೆಟ್​ ಉರುಳಿಸಿ ಪ್ರಭಾವಿ ಬೌಲರ್​ ಎನಿಸಿದರು. 70 ರನ್​ ಗಳಿಸಿದ ಕೆ.ಎಲ್.ರಾಹುಲ್​ ಮತ್ತು ಮೊಹಮ್ಮದ್​ ಸಿರಾ​ಜ್​ ನಾಳೆಗೆ ಕ್ರೀಸ್ ಕಾಯ್ದುಕೊಂಡಿದ್ದಾರೆ.

ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗಿಳಿದ ಭಾರತ ಹರಿಣಗಳ ಬಿಗು ಬೌಲಿಂಗ್ ದಾಳಿಗೆ ತಕ್ಕ ಪ್ರತಿರೋಧ ತೋರುವಲ್ಲಿ ವಿಫಲವಾಯಿತು. ಆರಂಭದ ಮೂರು ವಿಕೆಟ್​ಗಳನ್ನು ತಂಡ ಕೇವಲ 24 ರನ್​ ಗಳಿಸುವಷ್ಟರಲ್ಲೇ ಕಳೆದುಕೊಂಡಿತು. ರೋಹಿತ್​ ಶರ್ಮಾ (​5 ರನ್), ಯಶಸ್ವಿ ಜೈಸ್ವಾಲ್​ (17) ಮತ್ತು ಶುಭಮನ್​ ಗಿಲ್​ (2) ದೊಡ್ಡ ಕೊಡುಗೆ ನೀಡುವಲ್ಲಿ ವಿಫಲರಾದರು.

ನಾಲ್ಕನೇ ವಿಕೆಟ್​ಗೆ ವಿರಾಟ್​ ಕೊಹ್ಲಿ ಮತ್ತು ಶ್ರೇಯಸ್​ ಅಯ್ಯರ್ 67 ರನ್​ಗಳ ಪಾಲುದಾರಿಕೆ ಹಂಚಿಕೊಂಡರು. ಭೋಜನ ವಿರಾಮ ಮುಗಿಸಿ ಕ್ರೀಸ್​ ಮರಳುತ್ತಿದ್ದಂತೆ ಅಯ್ಯರ್​ ವಿಕೆಟ್​ ಪತನವಾಯಿತು. ಅಯ್ಯರ್​ 50 ಎಸೆತಗಳಲ್ಲಿ 31 ರನ್​ ಗಳಿಸಿ ಔಟಾದರು. ಇವರ ಬೆನ್ನಲ್ಲೇ 38 ರನ್​ ಗಳಿಸಿ ವಿರಾಟ್​ ಕೊಹ್ಲಿ ಕೂಡಾ ಪೆವಿಲಿಯನ್​ಗೆ ಮರಳಿದರು.

ರಾಹುಲ್​ ಏಕಾಂಗಿ ಹೋರಾಟ: ತಂಡ ವಿಕೆಟ್​ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ಕೆ.ಎಲ್.ರಾಹುಲ್ ಏಕಾಂಗಿಯಾಗಿ ಇನ್ನಿಂಗ್ಸ್​ ಕಟ್ಟಿದರು. 2021ರ ಪ್ರವಾಸದಲ್ಲಿ ಶತಕ ಗಳಿಸಿದ್ದ ರಾಹುಲ್​ ಅದೇ ಅನುಭವವನ್ನು ಮೈದಾನದಲ್ಲಿ ಪ್ರದರ್ಶಿಸಿದರು. ಆದರೆ ಅವರಿಗೆ ಕೆಳ ಕ್ರಮಾಂಕದಲ್ಲಿ ಯಾರೂ ಜೊತೆಯಾಟ ನೀಡಲಿಲ್ಲ. ರವಿಚಂದ್ರನ್​ ಅಶ್ವಿನ್​ 8, ಶಾರ್ದೂಲ್​ ಠಾಕೂರ್ 24 ಮತ್ತು ಉಪನಾಯಕ ಜಸ್ಪ್ರೀತ್​ ಬುಮ್ರಾ 1 ರನ್​ಗೆ ವಿಕೆಟ್​ ಒಪ್ಪಿಸಿದರು.

ಹರಿಣಗಳ ಬೌಲಿಂಗ್​ ವಿರುದ್ಧ ಚಾಣಾಕ್ಷತನದ ಇನ್ನಿಂಗ್ಸ್​ ಕಟ್ಟಿದ ರಾಹುಲ್​ ತಮ್ಮ 14ನೇ ಟೆಸ್ಟ್​ ಅರ್ಧಶತಕವನ್ನು ಪೂರೈಸಿದರು. ಇನ್ನಿಂಗ್ಸ್​​ನಲ್ಲಿ 105 ಬಾಲ್​ ಎದುರಿಸಿರುವ ಅವರು 10 ಬೌಂಡರಿ ಮತ್ತು 2 ಸಿಕ್ಸ್​ ಸಹಾಯದಿಂದ 70 ರನ್​ಗಳಿಸಿ ಎರಡನೇ ದಿನಕ್ಕೆ ಬ್ಯಾಟಿಂಗ್​ ಕಾಯ್ದಿರಿಸಿಕೊಂಡಿದ್ದಾರೆ.

ಮಳೆ ಸಾಧ್ಯತೆ: ಮೈದಾನ ತೇವಾಂಶದಿಂದ ಕೂಡಿದೆ ಎಂಬ ಕಾರಣಕ್ಕೆ ಅರ್ಧ ಗಂಟೆ ತಡವಾಗಿ ಆರಂಭವಾಗಿತ್ತು. ನಾಳೆಯೂ ಪಂದ್ಯಕ್ಕೆ ಮಳೆ ಅಡ್ಡಿಯಾಗುವ ಆತಂಕವಿದೆ.

ಇದನ್ನೂ ಓದಿ:ದ.ಆಫ್ರಿಕಾ ಪರಿಸ್ಥಿತಿಯಲ್ಲಿ ಸರಣಿ ಗೆಲ್ಲಲು ಸ್ವಲ್ಪ ಅದೃಷ್ಟ ಬಲ ಬೇಕು: ದ್ರಾವಿಡ್