ದುಬೈ: ಟಿ20 ವಿಶ್ವಕಪ್ ಸಿದ್ಧತೆಗಾಗಿ ನಡೆಯುತ್ತಿರುವ ಅಭ್ಯಾಸ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡ ಸ್ಟೀವ್ ಸ್ಮಿತ್ ಮತ್ತು ಸ್ಟೋಯ್ನಿಸ್ ಅವರ ಉತ್ತಮ ಬ್ಯಾಟಿಂಗ್ ನೆರವಿನಿಂದ ಭಾರತಕ್ಕೆ 153 ರನ್ಗಳ ಸಾಧಾರಣ ಗುರಿ ನೀಡಿದೆ.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಆಸ್ಟ್ರೇಲಿಯಾ ತಂಡ 2ನೇ ಓವರ್ನಲ್ಲೇ ಡೇವಿಡ್ ವಾರ್ನರ್(1) ಮತ್ತು ಮಿಚೆಲ್ ಮಾರ್ಷ್(0) ವಿಕೆಟ್ ಕಳೆದುಕೊಂಡಿತು. ಅಶ್ವಿನ್ ಈ ಇಬ್ಬರನ್ನು ಪೆವಿಲಿಯನ್ಗಟ್ಟಿದರೆ, ನಾಯಕ ಫಿಂಚ್ 8 ರನ್ಗಳಿಸಿ ಜಡೇಜಾ ಬೌಲಿಂಗ್ನಲ್ಲಿ ಎಲ್ಬಿ ಬಲೆಗೆ ಬಿದ್ದರು.
ಕೇವಲ 11 ರನ್ಗಳಾಗುವಷ್ಟರಲ್ಲಿ 3 ವಿಕೆಟ್ ಕಳೆದುಕೊಂಡು ಅಲ್ಪ ಮೊತ್ತಕ್ಕೆ ಕುಸಿಯುವ ಭೀತಿಯಲ್ಲಿದ್ದ ಆಸೀಸ್ಗೆ ಮ್ಯಾಕ್ಸ್ವೆಲ್ ಮತ್ತು ಸ್ಮಿತ್ ಜೊತೆಯಾಟ ಚೇತರಿಕೆ ನೀಡಿತು. ಇವರಿಬ್ಬರು 4ನೇ ವಿಕೆಟ್ಗೆ 61 ರನ್ ಸೇರಿಸಿದರು. 12ನೇ ಓವರ್ನಲ್ಲಿ ರಾಹುಲ್ ಚಹರ್ ಬೌಲಿಂಗ್ನಲ್ಲಿ ಬೌಲ್ಡ್ ಆದ ಮ್ಯಾಕ್ಸ್ವೆಲ್ 28 ಎಸೆತಗಳಲ್ಲಿ 5 ಬೌಂಡರಿ ಸಹಿತ 37 ರನ್ಗಳಿಸಿದ್ದರು.
ನಂತರ ಸ್ಮಿತ್ ಜೊತೆಗೂಡಿದ ಸ್ಟೋಯ್ನಿಸ್ ಸ್ಫೋಟಕ ಬ್ಯಾಟಿಂಗ್ ಮೂಲಕ ರನ್ ಗತಿ ಹೆಚ್ಚಿಸಿದರು. ಅವರು 25 ಎಸೆತಗಳಲ್ಲಿ 4 ಬೌಂಡರಿ ಮತ್ತು 1 ಸಿಕ್ಸರ್ ನೆರವಿನಿಂದ ಅಜೇಯ 41 ರನ್ಗಳಿಸಿದರೆ, ಸ್ಮಿತ್ 48 ಎಸೆತಗಳಲ್ಲಿ 7 ಬೌಂಡರಿ ಸಹಿತ 57 ರನ್ಗಳಿಸಿ ಕೊನೆಯ ಓವರ್ನಲ್ಲಿ ಭುವನೇಶ್ವರ್ಗೆ ವಿಕೆಟ್ ಒಪ್ಪಿಸಿದರು.
ಭಾರತದ ಪರ ಆರ್ ಅಶ್ವಿನ್ 2 ಓವರ್ಗಳಲ್ಲಿ 8 ರನ್ ನೀಡಿ 2 ವಿಕೆಟ್ ಪಡೆದರು. ಭುವನೇಶ್ವರ್ ಕುಮಾರ್ 27ಕ್ಕೆ1, ಜಡೇಜಾ 35ಕ್ಕೆ 1 ಮತ್ತು ರಾಹುಲ್ ಚಹರ್ 17ಕ್ಕೆ1 ವಿಕೆಟ್ ಪಡೆದರು.
