ಚೆಸ್ಟರ್-ಲೆ-ಸ್ಟ್ರೀಟ್: ಪ್ರವಾಸಿ ಶ್ರೀಲಂಕಾ ವಿರುದ್ಧ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡ 5ವಿಕೆಟ್ಗಳ ಭರ್ಜರಿ ಗೆಲುವು ದಾಖಲು ಮಾಡಿದ್ದು, ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಪಡೆದುಕೊಂಡಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ತಂಡ ಕ್ಯಾಪ್ಟನ್ ಕುಸಾಲ್ ಪರೇರಾ 73ರನ್ ಹಾಗೂ ಹಸರಂಗ 54 ರನ್ಗಳ ನೆರವಿನಿಂದ 42.3 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 185ರನ್ ಮಾತ್ರ ಗಳಿಕೆ ಮಾಡಿತು. ತಂಡದ ಪರ ಮೂರು ಪ್ಲೇಯರ್ಸ್ ಮಾತ್ರ ಎರಡಂಕಿ ರನ್ಗಳಿಕೆ ಮಾಡಿದ್ರೆ, ಉಳಿದಂತೆ ಎಲ್ಲರೂ ವೈಫಲ್ಯ ಅನುಭವಿಸಿದರು.
ಇಂಗ್ಲೆಂಡ್ ಪರ ಮಾರಕ ಬೌಲಿಂಗ್ ಪ್ರದರ್ಶನ ನೀಡಿದ ಕ್ರಿಸ್ ವೋಕ್ಸ್ 4, ವಿಲ್ಲೆ 3 ವಿಕೆಟ್ ಪಡೆದುಕೊಂಡರೆ ಮೊಯಿನ್ 1ವಿಕೆಟ್ ಪಡೆದುಕೊಂಡರು.
186ರನ್ಗಳ ಸಾಧಾರಣ ಗುರಿ ಬೆನ್ನತ್ತಿದ್ದ ಇಂಗ್ಲೆಂಡ್ ಆರಂಭದಲ್ಲೇ ಲಿವ್ಹಿಂಗ್ಸ್ಟೋನ್ (9)ವಿಕೆಟ್ ಕಳೆದುಕೊಂಡಿತು. ವಿಕೆಟ್ ಕೀಪರ್ ಬೈರ್ಸ್ಟೋ ಅವರ 43ರನ್ ಹಾಗೂ ರೂಟ್ರ ಅಜೇಯ 79 ರನ್ಗಳ ನೆರವಿನಿಂದ ಗೆಲುವಿನತ್ತ ದಾಪುಗಾಲು ಹಾಕಿತು. ಬೈರ್ಸ್ಟೋ ವಿಕೆಟ್ ಪತನದ ಬಳಿಕ ಮಾರ್ಗನ್(6) ರನ್, ಸ್ಯಾಮ್ ಬಿಲ್ಲಿಂಗ್ಸ್(3)ರನ್ಗಳಿಕೆ ಮಾಡಿದರು. ಉಳಿದಂತೆ ಮೊಯಿನ್ ಅಲಿ 28ರನ್ ಹಾಗೂ ಕರ್ರನ್ ಅಜೇಯ 9 ರನ್ಗಳಿಕೆ ಮಾಡಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.
ತಂಡ 34.5 ಓವರ್ಗಳಲ್ಲಿ 5ವಿಕೆಟ್ನಷ್ಟಕ್ಕೆ 189 ರನ್ಗಳಿಕೆ ಮಾಡಿ ಗೆಲುವು ಸಾಧಿಸಿತು. ಜತೆಗೆ ಸರಣಿಯಲ್ಲಿ ಮುನ್ನಡೆ ಸಾಧಿಸಿತು. ಲಂಕಾ ಪರ ಚಮೇರಾ 3 ವಿಕೆಟ್, ಫರ್ನಾಡೋ ಹಾಗೂ ಕರುಣರತ್ನೆ ತಲಾ 1ವಿಕೆಟ್ ಪಡೆದುಕೊಂಡರು.
